Февральданул 3-нний Каспийскалий Аьли Аьлиевлул цIанийсса Спортрал къатраву хьунни ХIамид ХIамидовлул цIа абад даврин хасъсса лачIун буккаврил Дагъусттаннал тIиртIусса чемпионат. ХIасан Аьдилов Уттисса ва хъанахъиссар 20-мур турнир, дуллай байбивхьу­ссар 1997 шиная шинмай. Шадлугърал тагьарданий чемпионат тIитIаврий гьуртту хьунни ДР-лул ХIукуматрал ПредседательАьбдуссамад ХIамидов.Чемпионатрай гьуртту хьусса спортсментурахьгу, тренертурахьгу, судиятурахьгу ганал барчаллагь увкунни ХIамид Мустапаевич ХIамидовлул аьпалул хIурмат баврихлу. «ДакIнийн бутанну, ХIамид ХIамидовлул тамансса давур­тту дурссар Дагъусттаннай спорт хьхьичIунмай бавриву, хаснува – лачIун буккаврил бутIуву». На дакI дарцIуну ура бяст-ччаллавух гьуртту хьуминнал цалва пагьму-гьунар ккаккан баншиврий, судьятурал – гьарзат тIайлану хIисавравун ласуншиврий», - увкунни Аьбду­ссамад ХIамидовлул. Чемпионат тIитIаврий балайчи Кристинал увкунни «ХIамидовлухасса балай» ва къавтIаву ду­нни «Дагестан» ансамбльданул къавтIалтрал. Бяст-ччаллах тамаша бан бувкIун бия ДР-лул ХIукуматрал Председательнал 1-ма хъиривчу Анатолий Карибов, ДР-лул физкультуралул ва спортрал министр МахIаммад МахIаммадов, цIа дурксса спортсментал, тренертал ва цаймигу жяматийсса ишккаккулт. Турнирданий гьуртту хьуссар республикалиясса 300-нная ливчусса лачIунбуккулт. Ххув хьунни: Хасавюртлиясса МахIаммадрасул Дагиров (42 кило), Даитбек Амирханов (46 кило), Имам Ганишев (54 кило); МахIачкъалалиясса ИбрагьимхIажи АбутIалимов (50 кило), Амир АхIмадов (58 кило), Аьбдулкьадир Аьбдуллаев (63 кило), МахIаммадхIабиб Ибрагьимов (69 кило), Ма­хIаммадрасул Расулов (76 кило), Рамазан Шяъбанов (85 кило), АхIмадхIажи МахIаммадов (100 кило) ва ХIамзат Кебедов (120 кило).