Уттигъанну Каспийскалий ларгунни ДР-лул МВД-лул зузалтрал дянивсса закканттай буккаврил чемпионат.

А. Аьбдуллаева Шикку гьуртту хьунни виваллил иширттал органнал подразделениярттал 15 команда. Ччалли увккунни 58 спортсмен. Бяст-ччал унгу-унгусса хьунни. Гьарица ринграйн увкманан бувчIлай бия цува цахлувагу, командалухлугу ччалай ушиву. ХьхьичIунсса кIанттухсса ягинсса бяст-ччал хьунни МВД-лул пишакартал хIадур баврил центрданул (Центр профессиональной подготовки - ЦПП) ва лавайсса къуллугъирттайминнал мюхчаншиву дузал даврил центрданул (Центр по обеспечению безопасности высших должностных лиц ФГКУУВО) зузалтрал дянив. Вай бяст-ччаллаву ххув хьунни ЦПП-лул зузалт. Командардал дянив вайннал командалул бувгьунни цалчинсса кIану. КIилчинсса кIану бувгьунни лавайсса къуллугъирттайминнал мюхчаншиву дузал даврил центрданул командалул. Шамилчинсса – вневедомственный охраналул управлениялул командалул. Цалла-цалла кIушиврийсса бяст-ччалливу ххув хьуми гьуртту хьунтIиссар март зуруй Пермь шагьрулий хьунтIисса Аьрасатнал МВД-лул закканттай буккаврил чемпионатрай. Дагъусттаннал полициялул хIал ккаккан бан гьантIисса спортсментуран чIа тIий буру тIайлабацIу.