Ухссавнил Ккавкказ хьхьичIунмай баву мурадрайсса программалул лагрулий хIадур дувантIиссар хасну Дагъусттаннайсса социал-экономикалул тагьар ххуй дувансса продпрограмма. Муния балжийну бувсунни август зурул 5-нний Пятигорскалий хьусса СКФО-рал регионнал бакIчитурал Советрал заседаниялий Ухссавнил Ккавкказ хьхьичIунмай баврил министр Лев Кузнецовлул.

«Жу Рамазан ХIажимурадо­вичлущал икьрал дуварду хъиривмур нюжмардий му программалунсса документру хIадур буван Дагъусттаннайн бучIан» - увкунни Лев Кузнецовлул. Заседаниялий гьуртту хьунни республикалул бакIчи Р. АьбдуллатIиповгу. СКФО-лийсса Аьрасатнал президентнал полпред Сергей Меликовлул кIицI лавгунни Ухссавнил Ккавкказуллал иширтталсса буллалисса министерство Ккавкказуллал экономика, социал тагьар лябукку буну ва сантирай хьхьичIуннай шавриха зузисса душиву, цIу-цIусса проектру бартдигьлай, ххуллу-чараннах луглай Ккавкказуллал регион хьхьичIуннай хъит учин дувантIишиву. Ххалбивгьунни инвестициялул проектру бартдигьавриямур масъалагу.