Августрал 14-нний респуб­ликалул журналистътуращал хьунаавкьунни ДР-лул печатьрал ва информациялул министрнал хъиривчу Зубайру Зубайруев.

Хьунабакьаврил мурад бия 2013 шинал ДР-лул Президентнал грантирттансса проектирдал конкурс нанаврил хIасиллащал журналистътал кIул баву. Зубайру Зубайруевлул бувсъсса куццуй, 2007 шинал октябрьданий бувксса ДР-лул ХIукуматрал хIукмулийн бувну ва 2013 шинал апрельданий бувксса ДР-лул Президентнал грантирттан хасъсса Советрал хIукмулийн бувну, 2013 шинал ДР-лул Печатьрал ва Информациялул министерствалул баян бувну бивкIссар СМИ-рдал бутIувусса грантирттансса проектирдал конкурс. Конкурсрайнсса документру кьамул буллай бивкIссар майрал 6-нния сентябрьданул 15-нин. Цинярдагу ккаккан дурну дур 21 грант 3 млн. къуруширттан­сса. Миннувату 4 грант, гьарца грант 150 азарда къурушрансса, ккаккан дурну дур республикалул миллатирттал мазурдийсса СМИ-рдал журналистътурал творчествалул проектирдацIун кабакьаврин. 3 грант, гьарца 100 азарда къурушран – районнал кказитирттал журналистътурал проектирдан кумагран. Миннуяр ххишала дур цаймигу грантру. Амма миллатирттал кказитирттал журналистътурая заявкарду къадуркIун дур. Зубайру Зубайруевлул уттигу цал бувсунни журналистътурахь ДР-лул Президентнал грантру ишла дуллан аьркиншиву.