ХIурмат бусса «Илчи» кказит­рал зузалт! КIирисса ссалам зуйн архсса Чарджав шагьрулия. Жу, Таканаву ялапар хъана­хъисса лакрал жямат, мякь був­ккун бикIару Дагъусттанная­сса, хаснува лакраясса хавардах.

Лакгу ххирасса ва миллатрая пахру буллайнасса лаккучу хIисаврай, на дакIнийхтуну ххарину ура жула «Илчи» республикалийсса миллатирттал кказитирттаву мудангу жаваблувну буккултрангу бусравну, цилва хьхьичIсса буржру биттур буллай буну тIий.

ХIурмат бусса «Илчи» кказит, кказитрал зузалт! На, ХIажиева Камилат, барча тIий бура зухь зул ххаллил­сса, бусравсса байран – 25 шинал таварих. ЧIа тIий бура зун цIуллушиву, талихI, тирхханну, паракьатшиву, барачатшиву, тIайлабацIу зу дуллалисса давриву.

Ххирасса «Илчи» кказитрал къуллугъчитал! На дакIнийхтуну барча буллай бура зу циняв кказитрал юбилейращал. ЧIа тIий бура зун цIакьсса цIуллушиву, даврих­сса гъира, даврил мурадру бартбигьлай букъаххаву.Гьаз хьуннав, гужлан хьуннав зул кказитрал сий, агьамшиву цIакь хьуннав, аькьлулул авадан хьуннав, кIулшилул бусрав баннав.

Барча буллай ура зунттаву, Дагъусттаннал ва Аьрасатнал шагьрурдай ялапар хъанахъисса щалвагу лакрал миллат жулва «Илчи» кказитрал юбилейращал.

Июнь зурул 27-нний «Нордавиа» авиакомпаниялул МахIач­къалалия Москавлий дайдихьлай дур цIусса рейсру. Рейсру дуллан тIий дур Бо­инг-737-500 самолетирттай, цирдагу агьалинан къулайсса шартIру дусса.

Ххирасса лакрал жямат! Ххирасса «Илчилул» буккулт! Гьашину июль зурул 15-нний А. Къапиевлул цIанийсса Лак­рал музыкалул ва драмалул театрданул залдануву хьунтIиссар «Илчи» кказит цIуницIакул дунияллийн бук­лай байбивхьусса кьинилия шиннай там хъанахъисса 25 шинал юбилейрацIун бавхIусса хъунмасса мажлис.

Ххирасса Качар, вил ккуран! Ттул хъунмасса хIалли зучIан чичинна тIий, амма цIуллу-сагъшиврул хIал ялтту буклай, хъунмав шаву дахчилай, уттинин чичин къабювхъунни. Бухьунссар цаймигу инсантал, на кунма жулва маз ххирасса, «Илчилуха» чIалачIин дакъасса, амма зучIан чичин ка хъирив къалаллалисса.

«Илчи» кказит бур ца яла бюхттулмур, марцIмур, гъилимур миллат­рал ккурчIа – лакку мазрал марцIшиву, пасихIшиву, ххаллилшиву ва куртIшиву дуручлачисса бакIщаращи, мунихсса мякь ялу-ялун гуж хъанай бур Лакку билаятгу, ниттил мазгу, миллатрал бюхттулсса тарихгу ххираминначIа, мугу хъанай бур ва 25 шинай кIанттуву оьрчIах кунна ттюнгъа аякьа дуллай ялув бавцIусса жунма хъинну ххирасса ххаллилсса кказитрал зузалтрал гьунар.

«Илчи» кказитрал редакциялул тавакъюрайн бувну кказитрацIун дархIусса кутIасса дакIнийн бутаву кIицI дуллай ура нагу.