Экологиялул шинал лагрулий баян бувну бур щалагу Аьрасатнал конкурс «Щюллисса планета». Ва конкурсрал кIанттул этап хьунни ттигъанну Лакрал райондалий. Конкурс хьунни бутIра-бутIрайх бавчIуну: КIундиннал школалий – ВицIхъиял махIлалийсса школардал дянив ва ШавкIуллал школалий – лагма щархъал школарттал дянив.

Ттигъанну Лакрал райондалий хьунни аьдатравун багьсса Интнил байрандалун хас бувсса волейболданул бяст-ччал. Бяст-ччал шайссар гьарца шинал райондалул спорткомитетрал сакиншиндарайну.

Шадлугърал даражалий хьунадаркьунни Интнил байран ЦIуминалийсса Чапаевкаллал шяравусса «Солнышко» садикрай. Ва кьини садикрайн оьрчIал нину-ппу бувкIун бия, жура-журасса бартри-гургригу дурну.

Мартрал 14-нний МахIач­къалалив хьунни Аьрасатнал ветерантурал жяматийсса организациялун 60 шин ва Дагъус­ттаннал ветерантурал организациялун 30 шин там шаврин хас був­сса пленум.

Укунсса цIанилу мартрал 20-нний Ккуллал шяраваллил оьрчIал багъраву хьунни райондалийсса оьрчIал ряхвагу багърал тарбиячитурал дянивсса конкурс. Конкурсрал мурадну бия оьрчIал тарбиячинал касмулул сий гьаз даву, цалла давриву мунал ишла буллалисса кьяйдарду цаймигу тарбиячитуран кIул баву.

Мартрал 18-нний Ккуллал райондалий, Ваччиял школалий, хьунни дуклаки оьрчIал дянивсса, «Белая ладья» тIисса шахматирттай буккаврил турнир. Турнирданул сиптачину бия райондалул УО.

Апрель зурул 8-нний ЧIяй­ннал шяраву хьун­тIиссар Хъарас щаврил байран.

Мартрал 21-нний хъинну чIярусса тяхъашивурттайну хьунадаркьунни Интнил кьини Ккуллал райондалий. Ва кьини Ваччиял шяраву хьунни Интнил кьинилул байрандалун хас дур­сса тяхъашивуртту.

Мартрал 21-нний Каспийскалий, Аьрасатнал халкьуннал аслийсса культуралул центрданий, хьунни Интнил байран – Навруз хьунадакьлакьисса батIаву. Муний гьуртту хьунни шагьрулул администрациялул, КIулшиву дулаврил управлениялул, культуралул идарарттал вакилтал, дуклаки оьрчIру.

Ларгсса нюжмардий Каспийскалий, ОьрчIал творчествалул центрданий, хьунни дуклаки оьрчIал техникалул ва декоратив-прикладной творчествалул выставка.