Августрал 22-нний Аьрасатнал регионнай хьунни «Справедливая Россия – За правду» партиялул дуллалисса Аьрасатнал даражалийсса пресс-конференцияртту. МахIачкъалаливмур пресс-конференция хьунни ДР-лул Халкьуннал Мажлисрал председательнал хъиривчув, Дагъусттаннал региондалийсса «Справедливая Россия– За правду» партиелул отделениялул председатель Камил Давдиевлул каялувшиннаралу.

Шикку гьуртту хьунни «Сп­ра­ведливая Россия» партия­лул депутат Марат Аьлия­ров, СКФО-райсса «Молодежь справедливой России» тIисса суккушиннарал координатор, МахIачкъала шагьрулул Ленинский райондалул Мажлисрал депутат НурмахIаммад ХIабибуллаев, Къизилюрт шагьрулул Мажлисрал депутат хьуншиврийнсса кандидат Рашид МахIаммадов.

Пресс-конференциялий Камил Давдиевлул кIицI лавгунни хIакьинусса кьини республикалий цIурувкьюсса масъалар­тту ва ми дузал бансса ххуллу-чаранну.
– Ва зуруй республикалул агьали чани лешлай азурда хьуну бур. Ва тагьар хъиннура оьлухъ­лай дур ихтиярду дуну, дакъа буллалисса хъунисса идарарттал энергосетьру ишла дуллалаврийн бувнугу. Энергосетьру цирдагу лащинсса тагьарданий дур. Вай масъалартту дузрайн буккан баншиврул аьркинну бур федерал центрданул кумаграйну энергосетьру цIу дуккан дан. ЦIанасса ппурттуву республикалий ва масъала щаллу буллай буссар, – увкунни Камил Давдиевлул. Ванал мукунма кIицI лавгунни августрал 14-нний ЦIуминалийсса ЦIуссаккуллал шяравалличIан гъанну хьусса бала-апатI – ишбажаранчитуралгу, ялув бацIайсса органналгу биччи бакъулшиврийну хьушиву. КIицI лавгунни вай укунсса ишругу хъамабитан къабучIишиву, ишбажаранчитуран ва миннал даврил ялув бацIайсса органнал зузалтран, тIалавшиннарду щаллу дуллай, пикри буну зун аьркиншиву. Электросетирдал пишакар Рашид МахIаммадовлул балжину бувсунни хIакьинусса кьини республикалийсса тагьардания, ттукIрайн багьайсса ма­съаларттая.

– БувчIлай бур шагьрулул агьали чани лешлай азурда хъанай  бушиву. БувчIин бан ччай ура машинарттал ххуллурду бахI­лахIаврийну чани лещаврил та­гьар даххана къахьунтIишиву. ХIисаврайн ласун аьркинни Анаварсса кумаграл, цIу лещан дувай машинартту аглан хъанахъишиву. Ттул пикрилий, мукунсса чIумал шагьрулул электросетирдайн оьвчин къабюхъларчан, цаппара инсантал хъунаманачIан лавгун, паракьатну бувчIин буван аьркинни цала мурад, – увкунни Рашид МахIаммадовлул. Нур­махIаммад ХIабибуллаевлул бувсунни депутатътурал агьалинащал дуллалисса давурттая. Пресс-конференциялул ахирданий журналистътурал суаллахьхьун жавабругу дулунни.