Июнь зурул 26-нний Каспийск шагьрулийсса «Каспий» тIисса банкетру бай залдануву хъуннасса уттарашинна дия. Гур бу­сса хъатIул кьини куннасса. Цалчинмур ЦIувкIуллал жямат, лакрал интеллигенциялул вакилтал ва активистътал бавтIун бия «Удивительные люди» тIисса телешоулий ххув хьусса пагьламан Камил Маммаев барча уван, ванал гьунардания, сисаврия цивппа хIайранну бушиву бусан.

---

КIарттул ччатIущал ва цаймигу ссайгъатирттащал, ватандалул кьанкь дусса, щалва зал янхьа тIутIи бувсса, ЦIув­кIуллал бизанттая риртту­сса тIутIал чIапращал ялун бивуна ЦIувкIратусса делегациягу. Хъунмасса зал щапI куну бувцIуну бия. Мугьали хьуну, ца лахIзалул мутталий агьалинал дастта-дасттарду дарчуна гьар чулуха залданувун. Вайксса чIявусса агьлу къабатIинххива, шиккува, Каспийскалий, яхъанахъисса цIувкIул батIанххива тIий, бакIрайва барчаллагьрай ия ва мероприятиялул сиптачи, Камиллул ниттиуссу Ибадуллагь Даниялов. Мажлис бачин бувну ия Дагъусттаннал культуралул лайкь хьусса зузала, цIанихсса тямада Супиян Оьмаров. Ванал кIицI лавгуна, цIунилгу ЦIув­кIуллал пагьламантурал цIа бюхттулну гьаз дуршиву Камиллул.

Шяраваллил Жяматийсса советрал председатель, профессор МахIаммадбаг ХIусайхановлул увкуна: «ЦIувкIуллал шяраваллил цIа машгьур дурмур, дунияллийх ппив хьун дурмур пиша хъанай бур пагьламаншиву. ЦIувкIуллал пагьламантал къабивсса билаят бакъассар, гьарца кIанайгу пагьламантурал гьунардан лавайсса кьимат бивщуссар. Амма ца ппурттуву, шяраву пагьламантурал фестиваллугу къадуллай, цIувкIуллал искусство духлаглагисса кунма­сса иш бия. ХIатта, пагьламаншиврул гьунарду ягин баншиврул, оьрчIан пагьламан лахъан лахьхьин буллалисса школа шяраву тIитIирчагума. Шяравува оьрчIру чан хъанай бухьувкун, хьхьуттайх лахъан лахьхьин заназиссагу чанну бия. Санкт-Петербурглив Расул Абакаровлул цIунилгу гьаз дурна пагьламантурал цIа. Камилгу пагьламаншиврул ттугъ бюхттулну гьаз бувну най ия. Утти ваналгу телешоулий тамаша бувцирив махIаттал бунни, ванал гьунарданун жюрилулгу, тамашачитуралгу лахъсса кьимат бивщунни». Шяраваллил Жяматийсса советрал чулуха Камиллун дуллуна ХIурматрал грамотагу.

Дагъусттаннал лайкь хьу­сса строитель Мурта Муртаевлул кIицI лавгуна Камил Маммаевлул ниттил ппу МахIаммадагу цIанихса зюннавчи ва пагьламанчи ивкIшиву, барчаллагь баян бувна Камиллун лайкьсса тарбия дулаврихлу ванал ни­ттийн, захIмат ххирасса, дакI-аьмал ххуйсса Мугьажиратлуйн.
Буршиял жяматрал вакил Султан ЦIаххаевлул кIицI лавгуна Камил Маммаевлул щалвагу лакрал миллатрал дакIру тирх учин дувансса, лаккучувнал яхI, къирият ккаккан дувансса гьунар бувшиву.

Камил барча уллалисса ихтилатру бувна ЦIувкIуллал пагьламантурал школалул хъунама Рамазан ХIажиевлул, «Каспий» залданул заллу, предприниматель МахIаммад Аминовлул, Чувшиврул орденналун лайкь хьусса Полина Халиловал, жяматийсса ишккакку Забида Аьбдуллаевал, Каспийскалийсса цIувкIуллал активистка Соня Рамазановал ва цаймигу бусравсса инсантурал. Ихтилатру буллалицирив мукIру хъанай бия цивппа пахрулий бушиву кьянкьасса, вас-ццах цирив къакIулсса, пагьламандалий буцирив журалул гьунарду буллалисса Камиллуй. Щалва зал бивсса найраха лав­хьхьуну сукку тIий бия. Рищу-руцу, балайрду, къавтIавуртту, шадшиву. Гьарцаннал зумув­сса махъгу «Камил» тIисса бия. Ванал цIа микрофон бувгьуманал зумух ларстарив, залданува хъатурдил чIярх буккайва. Камиллущал сурат рищун ччисса агьлу чан хъанай бакъая. Залданувуми, кIулмигу, къакIулмигу куннах кув буруглай, симаннаву дусшиврул ва уссушиврул лишанну кьюлтI дан хъанай бакъая. Ахир­даний Ибадуллагь Данияловлул барчаллагь увкуна ва зал уква буллусса МахIаммад Аминовлухьгу, Камиллул кьини хъун дуван бувкIцириннахьгу.
Камиллул барчаллагь увкуна цаятува ва цала гьунардаяту бусайсса «Илчи» кказитрал редакциялухь.
Вайнна залданувун бавтIци­риннавасса цаппараннал пикрирдугу.
Зулайхат Кьурбанова (Тверь шагьрулиясса):
– На Камиллущал кIул хьу­ссияв Москавливсса мероприятиялий. ХъуручI кунна лухIисса, лахъисса чIарардащалсса, лухIи-пурщисса симандалущалсса, утта­сса хъачIунттащалсса ва лаккучув ухьунссар тIисса пик­ри ча багьайссия, кьатIаллил билаят­раясса жагьил ххива. Ва лаккучув усса кIул шайхту, ххари хьунав, ххишалдаран гъурбатрай лакку маз личIинува тIааьнну, нахIуну баллан бикIайхха. Яла, махъату, кIул хьуна ххалуйх тараза дакъа лахъайсса пагьламан ушиву. Ялугьлай, я батIин къахъанай бивкIра ванал «Ро­ссия» каналданийсса гьунардайгу. Буниялттунгу, караматсса, вих хьун къабюхъайсса номерду ккаккан буллай ур, щилчIав уттинин ккаккан къадурсса трюк­ру дуллай дур. Ттун хаварбакъулий кунма хавар хьуна ва лахъа-хъун уван жямат батIлай бушиву, ттунмагу бучIан бучIихьунссархха тIий, бувкра нагу, гьарзатгу кьариртун. Отпус­калий Дагъусттаннайн бувкIун бунува, укун ххуйсса мероприятиялий гьуртту хьун­сса сантгу дагьунни. Камиллул чIарав бавцIуну суратругу рищав.
Аьбдул Арсланов (Дарбант):
– Ттун хъинну ххуй дирзунни «Илчилул» лавгсса номерданий ва цIувкIрачувнал ххувшаврия бусласисса макьалалун «Караматсса Камил» тIисса цIа дизаву. Акъаривла караматсса оьрчI? Гьинта куна куклуну, зирангну ачай хьхьуттайх. Бургу тиккун, цIанакулгу леххан хIадурсса барзу куна ур. Ва ххувшаврийнгу ЦIув­кIуллал барзу гьаваллавун гьаз хьунни куну учайссар.
Эльвира Аьбдуллаева (ЦIу­ссаккул):
– Ва Камиллул бувсса гьарца гьунардануву циняв лак пахрулувун бутлатисса зунттал чувнал зирангшиву, чувшиву, сисаву чIалан дикIай. Ттун мадара­сса ккулгу чIалай бур залдануву, ва иширалгу дакI ххари дунни. ДакIнийхтунусса барчаллагьри цIувкIуллал агьалинан, Камиллун укун лахъсса кьимат бищун бувксса. Жулла нех хьхьичIра-хьхьичI жура хъун дан аьркин­ссар. Гьархьхьуну ва зал хъатурдил гургулул лавсун бия. Хъунмасса пахру багьунни жулва лак­рая. Камиллун дунияллул лаг­рулийсса шоулийгу ххув хьун­сса тIайлабацIу чIа тIий бура. Лайкьри, валлагь, мукунми ххувшавурттангу!
Суратру авторнал