МахIачкъалалив Лениннул Комсомолданул цIанийсса паркраву ларгсса ххуллун кьини – сентябрьданул 12-нний хьунни уттинин жулла республикалий цаллагу къархьусса даву – Дауннул синдром дусса оьрчIал чIаравбацIаву хIисаврайсса ихIсандалийсса лечаву.

Бадрижамал Аьлиева
Ва пробеграл сакиншинначитал бия цIуллу-сагъшиврул ссуссукьуминнан кумаг буллалисса Дагъусттаннал регионал жяматийсса организация «Жизнь без слез».
Ва лечаву хьунни щаллагу Аьра­сатнал «Спорт во благо» проект­рал лагрулуву, цувгу сакин дурсса Дауннул синдром дусса оьрчIан кумаг буллалисса ихIсандалул «Даунсайд Ап» фондрал. Ва даврил чIаравбацIаву, мукунна, дурну дур АьФ-лул Минэкономразвитиялул, МахIачкъалаллал шагьрулул администрациялул, ДР-лул Физическая культуралул ва спортрал министерствалул, ДР-лул Жагьилтурал иширтталсса байсса министерствалул ва МахIачкъалаллал шагьрулул Спортрал, туризмалул ва жагьилтурал иширтталсса байсса комитетрал.
Ва кьини МахIачкъалалий куннасса даву вара кьини хьуссар Иркутск ва Рязань шагьрурдайгу.
Ва хъанай дур Аьрасатнаву цалчинна цалчин щаллу дуллали­сса спортрал ихIсандалул проект, ванил цачIун буллай бур цивппагу спортрахун багьсса ва цайминнан кумаг буллан ччисса инсантал. Ва проектрал агьаммур оьвчаву дур «Вноси пожертвование и выходи на старт!» тIисса. Мукун, Дауннул синдром дусса оьрчIан кумагрансса ихIсандалул взносру дия укунсса:
— Оьрмулул 10 шинава 17 шинавун бияннинссанная – 150 къуруш
— Оьрмулул 18 шинава тинмайминная – 300 къуруш.

Агарда Дауннул синдром дусса оьрчIан кумаг буван ччай, амма лечавривух гьуртту хьун, лечин къаччисса ухьурча, миннаща бюхълай бия цанна ччиссаксса, цащара хъанахъиссаксса арцу дичин ва расчетный счетрайн:
№ 40703810960320004003 СЕВЕРО-КАВКАЗСКИЙ БАНК ОАО «СБЕРБАНК РОССИИ»
банковский идентификационный код (БИК) 040702660
номер корреспондентского счета 30101810600000000660

Ва счетрайн арцу пробег хьу­сса сентябрьданул 12-сса кьини дакъассагу, ччимур чIумал гьан дуван бюхълай бур ччинаща, цалва ахIвал-хIалданух урувгун. Амма, ци кIюласса ахIвал-хIал бунугу, 50-100 къурушрагу гьан дуван къашайсса инсан жула дянив ушиву къакIулли вай оьрчIан кумагран.
Ва ихIсандалул лечаврил сакиншинначитурал агьаммур мурад бия инвалидшиву дусса оьрчIал ва жагьилтурал оьрму баххана баву. Вайннал хьхьичI бивхьусса агьамми масъаларттугу бур инвалидшиву дусса, цIуллу-сагъшиврул ссуссукьусса оьрчIан ва жагьилтуран дяхттасса хъунмасса Центр бансса арцу датIаву, обществалуву укунсса ляличIийсса оьрчIахсса хъинчулийннайсса бургаву хIасул даву, социал масъалартту щаллу бавриву НКО-рдал ва бизнесрал гужру цачIун баву.
Ва кьини пробеграву гьуртту хъанахъиминнансса дистанциярду дия укунсса:
— Оьрмулул 6 шинава тинмайсса оьрчIан – 50 метра
— Оьрмулул 7 шинава 9 шинавун бияннинсса оьрчIан – веселые старты
— Оьрмулул 10 шинава 15 шинавун бияннинсса оьрчIан ва чIаважагьилтуран – 300 метра
— Оьрмулул хъуниминнан – 1 ва 2 км.
Ва хьунни цинявннансса мяйжаннугусса байран, щаллусса кулпатирттан кунна, цивппа-цив­ппалу гьуртту хъанахъиминнангу, командарттангу, левчуну цала дакIнил хIалгу лавай бувну, цанма чирилун цайминнангу кумаг бувсса давуну.
Ва давривух гьуртту хьунни 200-нния ливчусса инсантал. Гьуртту хъанахъиминнавух бия Дауннул синдром дусса оьрчIру цивппагу ва миннал нину-ппугу. Цинявппагу лайкь хьунни бахшиширттан, хьхьичIун ливчуминнан дуллунни наградартту.
— Хъунмасса барчаллагь жул оьрчIан ва миннал нитти-буттан цукссагу хIаллай хъамакъадитансса ва байран дурсса цинявн­нанмагу. ЛичIиссава барчаллагь, МахIачкъалалив увкIун, жул чIарав авцIусса «Даунсайд Ап» фондрал вакил С. Левкиннун, — тIий бур «Жизнь без слез» организациялул председатель Аьйшат ХIамзаева.