Интнил бияла кьянкьану цила кIунттихьхьун лавсунни. Укунмасса инсантуран инт – му сайрду буллансса гъилисса чIун, яргну бивтсса баргъ ва лелуххантрал чIурду бухьурча, аьрщи ххираминнаннив ка цIаравусса, цу-цумур дуванссарив къакIулсса чIун хъанай дур. Амма жува, хъинмур буллалиссару тIий, аьрщарай цал-цал аьркин дакъасса, къацила чIумалсса даву дуллайгу лякъару.
Кьаркьсса уртту
ччуччаву
ХьхьичIмур шиналсса кьаркь уртту ччуччирча, ялун наними уртту ццунсса ва щюллисса дикIансса ххан бикIай чIявуми. Амма уртту ччуччаврийну тIабиаьтран жува зарал биян буллалиссару. Кьаркьсса урттуращал архIал ччучлачиссар аьрщарайсса ущу-щулгъигу, заралминнущал мюнпат бумигу. Аьрщарал ялттусса къат кIири лагаврийну духлаглагиссар «гуминовые» тIисса мюнпатсса затру, ванийну мискин хъанахъиссар аьрщарал буллугъшивугу.
Мурхьру кIяла баву
Мурхьру циван кIяла буллай буру тIисса суалданухьхьун дикIантIиссар кIира жаваб: ххуйну чIаланшиврул ва ущу-щулгъилия буруччиншиврул. Бяст бакъар, мурхьру кIяла бувкун, багърал диц-куц итталун дагьанну даххана шай. Ущу-щулгъирив мурхьру кIяла баврил бацIан байшиву къакIулли. Мурхьру хъунмурчIин хIулухIайссар кIинттулсса марххалттания махъуннай дизлазисса бургъил тIинттал мурхьру ччуччин къабаншиврул. Мунияту, инттунияр, ссутнил ахирданий ва кIинтнил дайдихьулий кIяла бувну хъинссар мурхьру. Мартрал дайдихьулийннин мурхьру кIяла буван хъирив къалавминнан ва мюнпат къахьунсса даву ссуттилнин кьаритарча хъинхьунссар.
КIучI дурмур ччяни ядишаву
Инттусса бургъил гъилишиврул хъяврин бувну, анавар мабуккару дякъия кIуч дурсса тIутIив ва цамур ядишин. Дакъа-дакъагу диркIун, дяркъу ччимур чIумал бюхъайссар зана хьун.
«ЧантI увкусса» хIавирду машан ласаву
Интту бугьан тIутIайх бивчусса, чIапIив хьусса хIавирду (мурхьру) ласун анавар мабуккару. Ца чулуха, вайннул тасттикь буллай бур мурхь щаллусса, цIуллусса бушиву. Вамур чулухарив, тIутIайх бичлай байбивхьусса, амма мархха, аьрщараву кIучIну бакъа, тIивтIусса хIави аьрщараву татаншиврул бази лапва чанни. «ЧантI увкусса» мурхьру, къатIри ва тIутIив машан ласлан бучIиссар так контейнердавуми. Мукунна мархри чимусуха лавхьхьусса тIутIивгу (вайннувух чIявучин ххирасса тюльпаннугу) интту чант1 увкуну махъ дургьуну къахъинссар, цанчирча вай я гьашину интту, я ялунчIингума тIутIайх дичинтIишивугу, вайннул мархри татантIишивугу бази чансса затри.
Зуйва зулмугу
мабаванну
Аьрщарай дуванмур чIярурча тIий, кутIасса чIумул дянив дувансса давурттал сияхIгу дикIай лахъисса. КIюрххил чани щяв дагьаврия байбивхьуну, цIан лакьиннин зуннин цал ххуйну пикри бувара кIинттул личIисса гуж къабагьлай хIура бувксса, бургъийн аьдат хьун бувасса зулва чурххай зура дуллалисса къиялул ялув. Дачалий тIитIи бавкьуну бигьалаглагияра тIисса кIанугу бакъар. Амма учин ччимур вари: бигьамур ва кIумур даву ла-яла дуллали, чурххахьхьун бигьалагансса мутта буллай. Даврихух лавгун, хъамамабитари лагма-ялтту ххярхсса уртту-тIутIай, лелуххантрал балайрдай тамаша бувангу, урттул чяйлул исттикан хIачIангу.
