![](https://ilchi.info/wp-content/uploads/2023/04/IMG_6896-e1681400634663.jpg)
«Дагестан» РИА-лул залдануву хьунни интнил призыврал хIакъиравусса пресс-конференция. Журналистътуращал хьунабакьин бувкIун бия МахIачкъала шагьрулул мэрнан кIанайсса Ризван ГъазимахIаммадов ва шагьрулул аьралий комиссар, 1-мур ранграл капитан Геннадий Кьурбанов.
Геннадий Кьурбановлул бувсунни цIана, интнил призыврал кампаниялул чIумал, ссуттилнияр чIявусса буцинтIишиву аьралуннаву къуллугъ бан. Ванал кIицI лавгунни солдатътал-срочниктал хасъсса аьралий операция нанисса кIанттурдай къуллугъ буллан гьан къабантIишиву.
– Аьралуннаву къуллугъ буллалиссаксса хIаллай лавхьхьумур жагьилтурал оьрмулуву бучIи лякъинтIиссар. Му бакъассагу, аьралий къуллугърая махъаллил хьумигу, миннан кабакьу буллалимигу жавабрайн буцинтIиссар, – увкунни аьралий комиссарнал.
ЦIанасса тагьардания гъалгъа тIий, Ризван ГъазимахIаммадовлул кIицI лавгунни жула халкьуннал мудангу, иш багьний, ккаккан дуршиву цала чувшиву ва ватандалухсса ччаву.
— 1999 шинал, Дагъусттаннайн ярагъуннищалсса къачагътал ххявхсса чIумал, на уссияв Шагьрулул мажлисрал председательну. Хъуннасса даву дурссия жу МахIачкъалаллал интербригада сакин бан. Шанма гьантлул дянив 350 инсан салкьи хьуна шагьрулул ополчениялул кьюкьлуву.
Ярагъгу буллуну, интербригада Бущихъиял райондалийн тIайла бувкссар, – бувсунни шагьрулул бакIчинал.
Мукунма бувсунни, мобилизациялул хьуну, хасъсса аьралий операциялуву гьуртту хъанахъиминнал кулпатирттан буллалисса кумаграя.
«Дагъусттаннал БакIчи Сергей Меликовлул тапшур бувну, сакин бувну буссар аьралитурал кулпатирттан ка-кумаг буллансса фонд.
Му бакъассагу, шагьрулул хъуниминнал цала бакIрайн лавсъссагу масъалартту буссар. Масала, къатри ягу аьрщи дулаврил масъала», – увкунни ГъазимахIаммадовлул.
Журналистътурал суаллахьхьун жавабру дуллай, Геннадий Кьурбановлул ва Ризван ГъазимахIаммадовлул бувсунни альтернатив ва контрактрайсса къуллугърая, медкомиссиярттал даврия.