БатIул хьунни жуятува дунияллийх цIа дурксса аьлимчу
Хъунасса аьлимчу-атомщик Жабраиллул арс Амир Амаев жуятува личIи шаврийн бувну Лакрал райондалул администрациялул ва цинявппагу агьалинал цIанияту дакIнийхтунусса жижара буллай буру Амирдул ичIуваминнахь ва цинявппагу гъан-маччаминнахь.
Амир Амаев увну ур 1921 шинал Лакрал райондалийсса ГьунчIукьатIрал шяраву. 1934 шинал Гъумук ххюва классгу бувккуну, увххун ур МахIачкъалаллал Механикалул техникумравун. Зий ивкIун ур Каспийскаллал заводрай (№182). 1942 шинал, бронгу бунува, цала хушрай цува лавгун ур фронтрайн. 1943 шинал захIматсса щаву дирну, агьну ур демобилизациялухьхьун. 1945 шинал увххун ур Москавуллал Механикалул институтравун (хIакьину — цIанихсса МИФИ). Институт къуртал бувну махъ тIайла увккун ур Игорь Курчатов каялувчисса хъинну кьюлтIсса лабораториялувун (№2). Му лаборатория яла махъ кIура баен бувссар Атомрал энергиялул институтрайн, мунияргу махъ (1991 ш.) – Аьрасатнал элмулул центр «Курчатовлул институтрайн».
Техникалул элмурдал доктор, профессор Амир Амаевлун 1963 шинал дуллуссар Лениннул премия. Ва хъанахъиссар Дагъусттаннай Лениннул премиялул цалчинсса лауреат.
Та ухьурчагу, Лаккуйн учIайтари, Жабраиллул арс Амир чара бакъа хьунаакьайссия райондалул хъуниминнащал ва жяматирттащал, кIидачIайссия ххаришивуртту ва буруккинтту. Мудангу дакI цIий икIайва цалва жяматрай, райондалий ва щалагу республикалий.
Жабраиллул арс Амир Амаевлуясса чаннасса аьпа абадлий личIантIиссар жула дакIурдиву.
Лакрал райондалул бакIчи Ю.ХI. МахIаммадов
—————————————-
ЖАБРАИЛЛУЛ АРС АМАЕВ АМИР
Август зурул 18-нний, оьрмулул 93 шинаву, жуятува личIи хьунни хъунасса аьлимчу, ххишала акъа лавайсса пагьму-гьунарданул заллу, Хъун дяъвилул ветеран, цала бронгу цайминнан буллуну, душманнащал талан лавгсса, ГьунчIукьатIрал Амаев Амир Жабраиллул арс.
Москавлий Физикалул институтгу бувккуну, КурчатовлучIан зун тIайла увккун махъ цува дунияллия гьаннин га институтраву зий ивкIссар Амир.
Ва щаллагу дунияллийх цIа дурксса аьлимчу-атомщик. Амир Амаев хъанахъиссар Дагъусттаннай цалчинсса Лениннул премиялул лауреат. Ванал дунияллий хьхьичIра-хьхьичI дуккан дурссар атомный котеллансса материал. Мукунсса материалдания бувссар «Ленин» атомный ледоколданунсса ва атомный подводный лодкардансса котеллу.
Амир Амаев лайкь хьуну ия чIявусса министерствардал ва отраслирдал премиярттан. Ванал дия дяъвилул ва захIматрал орденну.
Амир Жабраиловичлул циняв регалияртту чичин так кIицI дангума чIярусса чIапIив аьркинни.
Му ия ххишала акъа марцIсса, цалва ниттил мазгу, буттахъал улчагу ххирасса, лакрал миллатрай дакI цIуцIисса лаккучу. АцIрахъул шиннардий Амир цала пенсия къаласлай ивкIссар, цал дяъвилий ппухълу ливтIусса оьрчIан булара тIий.
Жуна хъинну ххирасса, хIурмат лавайсса Амир Жабраиловичлул бивкIулул кьурчIишиву кIидачIлай, жижара буллай буру ванал арснахь, уссихь, ссурваврахь, цинявппагу гъан-маччаминнахь. РухI хъинний дишиннав, гьав нурданул дуцIиннав.
ГьунчIукьатIрал
ва КIямашрал жямат
—————————————
РАМАЗАННУЛ АРС РАМАЗАНОВ ХIАЖИРАМАЗАН
Август зурул 10-нний, оьрмулул 85 шинаву, дунияллия лавгунни Цалчинмур ЦIувкIратусса ххаллилсса зунтталчу, захIматрал ветеран, Щайху Бажал ва ХIуризатлул арс Рамазанов ХIажирамазан. ЧIавасса оьрмулий нитти-буттацIа шаврицIун, дяъвилул захIматсса шиннардий ссурвалгу, уссугу ливтIуну, аьрая хъунама уссугу зана къавхьуну цувалу ливчIссия ХIажирамазан.
Оьрмулул 12 шинаву хIухчил ттархь дугьан багьсса мунал оьрму лавгссар ризкьилуха къуллугърай, зий ивкIссар яттил фермалул бригадирнугу, удаманнугу. ХIажирамазан удаманну зузисса шиннардий АхIмад-Хан Султаннул цIанийсса колхозрал цIа машгьурну дуссия, ХIажирамазаннул суратгу райондалул ХIурматрал улттуя хIура къархьуссия. Шяраваллил агьулданул му мудангу увчIайссия Шяраваллил советрал депутатну. Дагъусттаннал Верховный Советрал чулухасса дикIу, райондалул хъуниминнал цIаниятусса дикIу ХIурматрал грамотардугу дуллуссия мунан, «За трудовую доблесть» ва цаймигу медальлу.
ЧIярусса захIматшивуртту ва кьурчIишивуртту духIан багьарчагу, ХIажирамазаннул адаврай ядурссар дакIнил хъиншиву ва узданшиву. Акъассар мунал махъ увкунувагу къаччан бикIан бувсса инсан. ЧIявусса буссар мунал дакI хъиншиврул бутIа бивну бусраврай мунал цIа зумух ласласисса. Бакреслив, Бажиганнай, Южно-Сухокумскалий ва СсурхIив, Ахъушиял райондалий мунал чIявусса дустал-гьалмахтал буссия, ккурчIавва къатта бусса ХIажирамазаннул ва Загьидатлул ужагърай бухху-букку чан къашайссия. Чаривату увксса чув ХIажирамазан цувагу лайкьну чивун увккун, 7 оьрчIгу ччаннай бацIан бувну чивун буккан бувссия. Хъунама арс МахIаммадрамазаннул, арснал щарнил Фирузал, миннал душнил Зульфиял, душния личIи бакъасса ХIабибатлул нязаннийсса бивкIурдугу кьюлтI учин багьссия мунан. Амма язинацIа хьурчагу, ва кьартIа, ва алшибакъашиву ттул чIарату хIура къархьунни увкусса цIуру-кIуру мунал къабувссия, гьазгу бувайссия так хъинмур, ххуймур. ХIажирамазаннул бивкIулул кьурчIишиву кIидачIлай, жижара буллай буру кулпат Загьидатлухь, арсурваврахь Магьанмалухь, Юнуслухь, Манаплухь, арсурваврал оьрчIахь Оьмардухь, Илдардухь, ХIажирамазаннухь, Магьанмалухь, душваврахь, куявтурахь, арснал хъаннихь ва щалвагу агьлу-авладрахь. ХIажирамазаннул бунагьирттал аьпа баннав, рухI Алжаннул ххари даннав, махъминнал оьрмурдай цIими бишиннав!
1-мур ЦIувкIуллал жямат
—————————————
КьурчIишивугу кIидачIлай, жижара буллай буру жулва уртакь ПатIимат Рамазановахь, ванил аьзизсса ппу, ххаллилсса зунтталчу
ХIажирамазан дунияллия лагаврийн бувну.
ХIажирамазан 1-мур ЦIувкIуллал жяматран дакIний личIантIиссар яхI-къирият дусса, аьмал-хIал бавкьусса шяравучуну, кулпатравугу цинявннан эбратну оьрчIру тарбия бувсса ва аякьа дусса буттану.
ХIажирамазан ия бусса оьрмулий зий-захIмат буллай ивкIсса, захIматрал кьадру кIулсса адамина. Ванал цалва оьрчIругу мукунма захIмат ххирану, яхI-намус буну, ларайсса зунттал кьануннай тарбия бувну бур. Цалла уздансса, иминсса хасиятирттайну ва бусравну ия гъан-маччанан ва шяраваллил жяматран.
ХIайп, ХIажирамазан дунияллия гьаннин ванан оьрчIал дард ккаккансса бувккунни. Я Аллагь, къаккакканнав нитти-буттан оьрчIал дард.
ХIажирамазаннул рухIгу хъинний дишиннав, алжаннул ххари аннав.
Ванал оьрчIай, оьрчIал оьрчIай барачат бишиннав, оьрмулул буччин битаннав.
«Илчи» кказитрал редакция
——————————————
ШАГЬАБУТТИННУЛ АРС МУРАДОВ МАКЬСУД
Августрал 16-нний оьрмулул 83 шинаву хархавар бакъа Москав шагьрулий дунияллия лавгунни цалва хъунмур оьрму «Дагдизель» заводрай зий лавгсса лавайсса классрал слесарь-сборщик, заводрал яла кьюлтIмур 7-сса цехрал зузала Мурадов Макьсуд Шагьабуттиннул арс.
Ванал ппу Шагьабуттингу Каспийск шагьрулул гьану бизлай ивкIссар. Зувилку шиннардий халкьуннал душманни тIий, увгьуну, акъа-къатIа увссар.
Макьсуд ия ххишала акъа ларайсса усттаршиврул заллу. Цалла дурмур ххалдигьин (испытать дан) ванайн оьвчайва Камчаткалийн, Мурманскалийн ва цаймигу кIанттурдайн.
Макьсудлул бивкIулул кьурчIишиву кIидачIлай, жижара буллай буру ванал кулпат Савдатлухь, ссурваврахь, арснахь, душваврахь, гъан-маччанахь.
Гьав нурданул дуцIиннав.
ГьунчIукьатIрал жямат
—————————————
ИСРАПИЛЛУЛ АРС ГУСИЕВ ЗАЙДУ
Август зурул 17-нний оьрмулул 75 шинаву, мадара хIаллай къашавайгу ивкIун, аьпалухьхьун лавгунни мукъулгу, тIуллалгу уздансса лаккучу, ГьунчIукьатIрал шяравасса Исрапиллул арс Гусиев Зайду.
Зайду увну ур 1940 шинал ГьунчIукьатIув. Буттал шяраву байбихьулул школагу къуртал бувну, цала нитти-буттащал Бабаюртуллал райондалийсса даэлийн бивзун бур. Тамаза-Тюбеллал школалий 8 классгу бувккуну, зун ивкIун ур колхозраву механизаторну. 1965 шинал колхозрал ва тIайла увкссар Чачаннавун лухIитIутIул пишакартал хIадур байсса курсирдайн. Зий уссия тIутIул багърал бригадирну. Яла Дарбантлив къуртал бувссар шяраваллил хозяйствалул техникум. Зайду ия цалва пиша лавайну кIулсса инсан. 1973 шинал зий уссия ЯтIул ттугъ колхозрал председательнал заместительну.
Зайдул бивкIулул кьурчIишиву кIидачIлай, жижара буллай буру ванал душваврахь, уссурваврахь, куявтурахь, гъан-маччаминнахь.
Цал бунагьирттал аьпа баннав, рухI хъинний дишиннав.
ГьунчIукьатIрал
ва КIямашрал жямат
