Дагъусттаннал ХIукуматрал хъунама Аьбдуссамад ХIамидовлул Дарбантлив юбилейрал шадлугърайн цукун хIадур хъанай буссарив ххалбигьлагьисса заседание дунни.

Премьер-министрнал кIицI лавгунни кIичIиртту ва паркру бакьин буллалисса давурттив къуртал даврицIун, байрандалул шадлугърал репетициягу дуван аьркиншиву. Заседаниялий ихтилатру бунни ДР-лул ХIукуматрал хъунаманал хъиривчу Анатолий Карибовлул, культуралул министр Зарема Буттаевал, Дарбантуллал музей-заповедникрал директор Аьли Ибрагьимовлул. Миннал бувсунни юбилейрайнсса давурттив цукун най дуссарив. Бувсунни 150 къулайсса хъуни автобус, 15 цIусса мюрщи автобус, 30 цIусса такси хIадурну бушиву хъамал аьркиннийн биян буллангу, буцлангу. Аьбдуссамад ХIамидов ивунни бакьин буллалисса кIичIиртту ва Нарын-къала ххал бувангу. Мунал ихтилат бунни строительтуращал ва къалалул лагма-ялтту яхъана­хъисса шагьрулул агьулданущал, тапшур бунни пенсионертурал къатрачIансса ххуллурдугу бакьин буван. Мура кьини премьер-министр хьунаавкьунни 3-мур Интернационалданул кIичIиравусса, лекьан нанисса къатрава бизан буллалисса агьалинащалгу. «Зун тIайлабацIу хьуссар укун гьилгьасса къат­равату бивзун, цIусса къатраву яхъанан», — увкунни мунал. Гьилгьасса къатрава 26 кулпат бувккун бур, 2 кулпат къабуклай бусса бур, цалла тIалавшиннарду биттур дурну мукьах бакъа къабизанну тIий. «Переселение граждан из ветхого и аварийного жилья» программалул лагрулий миннал тIалавшиннарду бартдигьин бюхъайсса куннасса дакъар, мунияту вице-премьернал аьй дунни бизан баврил программа ххуйну агьалинан дурчIин къадуллалисса Дарбантуллал мэриялий. — КIива кулпатрал цIаний цIусса къатри дуллай байбишин хъанай ба­къар, агар мэрия багьайкун зий бивкIссания, укунсса дайшишрурду къадикIантIиссия, — увкунни вице-премьернал. ХьхьичI кьини шагьрулул администрациялий агьали кьамул буллалисса совещаниялийгу мунал аьй дунни цайнма къабагьнува кIанттул администрациялий зузисса коллегащагу дуван шайсса даву дур куну. «ЧIявуми шагьрурдай ва районнай вара тагьар дур, чиновниктал кIани-кIанттурдайва зун аьркинссар агьалинащал, миннал мурадру цукунсса бурив лалавсун», — увкунни ХIамидовлул. Так ца гьашинусса шинал 658 инсан увккун ур Дарбантлия ХIукуматрал къуллугъчитурайн, Дарбантливва дузал буван шайсса масъаларттал хIакъираву. «Кабинетирттаву щябивкIун агьалинаву бумур кIул буван къашайссар, миннал мурадру цукунсса буссарив кIул буваншиврул, агьалинащал хьунабакьлан аьркинссару чIун-чIумуй, зула биялалиймур буллан аьркинссару», — увкунни Аьбдуссамад ХIамидовлул кIанттул чиновниктурал даву дащуй дихьлай.