ЦIуссалакрал райондалул Хъаннил союзрал члентурал чялиш­сса гьурттушинна дуллай бур «Посылка солдату» тIисса акциярттавух.

Вайннал хIарачатрайн бувну, цимилгу тIайла бувкссар СВО-лий гьуртту хъанахъисса жула аьралитурачIансса ссайгъатру. Аьмсса даврил лагма лавгун, аьра­литуран дакIнийхтуну кумаг бан ва чIарав бацIан хIадурну бушиву цал уттигу ккаккан бунни жула ниттихъал.
ЦIуссалакрал райондалул Хъаннил союзрал сипталийну, аьралитурачIан тIайла дурккунни ччяни зия къашайсса продукты, нацIу-кьацIурду, медикамент­ру, гъилисса яннарду(жуларду, кьяпри, катIри, лултту лаххай янна) ва аьралитурал аьркин дансса цаймигу кьай-кьуй. Кьай-кьуй дирхьусса къуршаву бивхьунни дуклаки оьрчIал чивчусса, аьралитурахь барчаллагь тIутIисса чагъарду.
– Хъунмасса барчаллагьрай бура ххаллилсса акциялувух гьур­тту хьусса ниттихъахь, душваврахь, хаснува ЦIуссалакрал райондалул кIулшивуртту дулаврил идарарттал коллективирттахь. ДакI ххари хъанай дур хъинбала-хъиншиву дан ччисса инсантал жула дянив гьарзасса бушиврия. Умуд бур СВО наниссаксса хIаллай жува укунма аьралитурал чIарав бацIлай бикIанссару тIисса. Цанчирчан, хIакьинусса кьини жущара миннан дан бюхъайсса хъиншиву кумаг бан хIадурну бушиврувур дусса, – увкунни Хъаннил союзрал председатель Светлана Къудаевал.