[dropcap]М[/dropcap]артрал 18-нний Москавуллал Миллатирттал къатлуву хьунни «Актуальные проблемы медицины и здравоохранения, перспективы развития» цIанилусса Москавлив зузисса Дагъусттаннаясса жагьилсса хIакинтурал форум.

[dropcap]Ф[/dropcap]орум тIитIлай, ихтилат бунни «Дагъусттан» МЦК-лул Президент, цIанихсса аьлимчу, профессор, Аьрасатнал техникалул элмурдал академиялул академик Арсен ХIусайновлул.

Гьурттучитуран ва хъамаллуран ккаккан дунни Дагъусттаннал цIуллу-сагъшиву дуруччаврил министр Т. Беляевал ва Дагъусттаннал паччахIлугърал медициналул университетрал ректор В. Хан­аьлиевлул видеообращение.

Форумрай гьуртту хъанахъими барча бунни Дагъусттаннал ЦIуллу-сагъшиву дуруччаврил зузалтрал профсоюзрал председатель, Аьрасатнал лайкь хьусса хIакин, Дагъусттаннал Халкьуннал мажлисрал 6-мур созыврал депутат Зумруд Бучаевал. Ванил кIицI лавгунни форум къулайсса шартIну хъанахъишиву хIакинтурал цала кIулшивуртту кIидачIинсса, цала пикри аьч бансса ва пишалул ххуллийсса дахIавуртту цIакь дансса.

– ХIакьину оьрмулул цила тIалав буллай бур агьамсса ма­съалартту щаллу баву мурадрай медициналул ххуллийх наними цачIун шаву, – увкунни ванил.
Хъирив ихтилат бунни «Да­­гъусттан» МЦК-лул вице-президент, медициналул элмурдал доктор, профессор Астемир Шайхаьлиевлул. Цала ихтилатраву ванал кIицI лавгунни Дагъус­ттаннаясса ч1явусса медиктал Москавлив зун букIлай бушиву.

[dropcap]Ф[/dropcap]орумрай мукунма ихтилатру бунни медициналул элмурдал доктор, профессор Багьавдин АхIмадовлул, медициналул элмурдал доктор, ДР-лул лайкь хьусса хIакин Сакинат Хархарова-Маккаевал, Щелковскаллал шагьрулул азарханалул неврологиялул отделениялул хъунмур Тутубава Башанаевал, «Медицина» АО клиникалул (академик Ройтберглул клиника) хъунама консультант Насип Алипбековлул, экономикалул элмурдал кандидат Аминат МахIаммадовал, хIакин-невролог Гюльнара МахIмудовал ва м.ц.
Ихтилатру къуртал хьуну махъ дуллунни наградартту.

Дагъусттаннал ЦIуллу-сагъ­шиву дуруччаврил зузалтрал профсоюзрал чулуха студентътуран, ординатортуран, аспирантътуран ва хIакинтуран ХIурматрал грамотартту ва медаллу дуллунни Зумруд Бучаевал.

ДР-лул ЦIуллу-сагъшиву дуруччаврил министерствалул ва «Дагъусттан» МЦК-лул чулуха­сса ХIурматрал грамотартту ва Барчаллагьрал чагъарду буллунни Арсен Буйдалаевичлул.
Ахирданий форумрай гьур­тту хьуминнахь ва хъамаллурахь барчаллагь тIисса ихтилат бунни «Дагъусттан» МЦК-лул Медиктурал ассоциациялул каялувчи, психологиялул элмурдал кандидат, доцент Гулизар Башанаевал.