Мартрал 17-нний Ваччиял школалий абад дунни Украиннаву хасъсса аьралий операциялий виричушиврий жан дуллусса Леонид Исупаевлул цIа. Ва школалий дуклай ивкIун ур цувагу.

Аьпалул ула тIитIин школалу­чIан бавтIун бия райондалул администрациялул бакIчи Шамил Рамазанов, идараттал зузалт, гъан-маччами, дуклаки оьрчIру, жямат.
БатIаврил дайдихьу дунни Аьра­сатнал ттугъ гимнрацIун гьаз баврийну. ХьхьичIва-хьичI махъ буллуна аьраличунал цалчинсса учительница Атта Рамазановахьхьун. Ванил Леонидлул дуклаки чIумалсса оьрмулиягу бувсун, дурккуна ванан хас дур­сса назмурду.
Шикку Леонид Исупаевлуя бувна чIявусса ихтилатру. Учительтал ца зумуну ваная хъинмур, ххуймур тIий бия – мяърипатрая, цайминнал чIарав ацIан хьхьичIун личаврия, дакI хъиншиврия, хъунанал хIурмат-кьимат бан кIулшиврия.

Увну ур ва Ваччиял шяраву, шиккува къуртал бувну бур школа. Колледжгу къуртал бувну, лавгун ур армиялийн, хъирив контракт чирчуну, лайкь хьуну ур ларайсса чиндалун. Ва тачIавгу пашман хьуну акъар цала язи бувгьусса пишалия – Ватан дуруччин бюхълахъишиву пахрулун ккалли дурну дур. Махъва- махъсса аьрххи тIурча, бавхIуну бур Украиннавусса хасъсса аьра­ий операциялуцIун. Мартрал 19-нний Леонидлуйн кIусса щаву дирну, ххассал ан къавхьуну ур.

БатIаврий аьпалул ула тIир­тIуна Шамил Рамазановлул ва Леонидлул ниттил Надежда Рамазановал. Бивхьуна тIутIал шалкри. Пахъ багьуна минутIрайсса.
– Ца акъа-акъасса арснацIа хьусса ниттил дакIнил хIал бувчI­лай бур. Барчаллагь ниттин виричусса арс тарбия аврихлу. Ва жуна дакIний личIантIиссар хъин­сса дусну, хьхьичIунсса дуклаки оьрчIну, нитти-буттал цIакь­сса къалану. Жу мудангу ваная пахрулий буссару – увкуна райондалул хъунаманал.
Ахирданий оьрчIал, кIяла кьурукьирттал кьюкьлуй бавцIуну, вирттаврал суратирттацIунсса, къавтIаву щаллу дуруна.