[dropcap]М[/dropcap]арт зурул 19-нний «Колизей Холл» тIисса ВДНХ-лийсса банкетру бай залдануву, Москавуллал «Дагъусттан» Культуралул центрданул сипталийну хьунни аьдатравун дагьсса Интнил хьхьунил байран.  

БавтIцири барча буллай Культуралул центрданул президент, профессор Арсен ХIусайновлул кIицI лавгунни Интнил хьхьунил байран дуваву, ччянира цIакь хьусса аьдат душиву, гъурбатрайгу миллатрал культура­лул хIурмат мудангу лахъну бивкIшиву ва ялун нанисса никирттангу миллатирттал культура ххирану дикIаншиврул укун­сса мероприятияртту дуллай бушиву жагьилми ва оьрчIругу гьурттуну. «Интнил хьхьунил байран жулва ппухъруннал шанма гьантлий кIицI лагайва, дахьра тIабиаьт чантI увку­сса, къурнил давуртту дайдирхьусса гьантрай. Аьвзал заманная шихунмай байбивхьуну, хIакьинусса кьинигу яхьуну дур ва байрандалуцIун дархIусса аьдат­ру: аслисса лакку дукрардал ссупра тIитIаву, бартри даву. Буллугъсса, авадансса ссупрарду тIитIайсса бивкIссар, шин авадансса бакIлахъия дусса, барачатсса хьуншиврул.

[dropcap]Ж[/dropcap]увагу хъуннасса шадлугърай хьунадакьлай буру, лакрал аьдатругу дуручлай, цаннал ца бувгьуну, укун­сса тяхъашиву дуваншиврул», – увкунни Арсен ХIусайновлул. Хасну ва мажлис бачин буван МахIачкъалалия увкIсса Лакрал театрданул артист, Дагъусттаннал лайкь хьусса артист Аьбдул Мурадовлул лакку мазрай ва оьрус мазрай балжийну бувсуна аьсрурдал куртIнива нанисса Интнил хьхьунил байрандалия ва муницIун дархIусса аьда­тирттая. Москавуллал агьлу ва хъамал барча буллалисса ихтилатру бувна медициналул элмурдал доктор, И.М. Сеченовлул цIанийсса Москавуллал Цалчинмур медициналул университетрал профессор Астемир Шайхаьлиевлул, Аьрасатнал паччахIлугърал гуманитар университетрал проректор МахIаммад Оьмаровлул.

Культуралул центрданул хъуниминнал цIанияту барчаллагьрай кIицI лавгуна центрданул дуллалисса давурттал спонсоршиву дувайсса Расул Кьаландаровлул, Ибрагьим Гьаруновлул, Сергей Давдиевлул цIарду. Дагъусттаннал культура гьаз дувавриву биялсса бутIа бивхьусса меценат хIисаврай Расул Кьаландаровлун дуллуна «За верность Дагестану» тIисса медаль. Вара медаль дуллуна Аьрасатнал Жяматийсса палаталул член Айгун МахIаммадовлун ва Лианозовский электромеханикалул заводрал гендиректорнал хъиривчу Сулайман ХIусайновлун. Арсен ХIусайновлул барча бувна уттигъанну ниттил мазрайсса шеърирдал лу «Ттиркьюкьал чарсса» итабавкьусса Ххадижат ЦIаххаева. Культуралул центрданул президиумрал член Абас Аьлишаевлул барчаллагь увкуна байран лавайсса даражалий тIайла дуккан биялсса хIарачат бувсса душваврахь: Мариян Кьаландаровахь, Басират Билаловахь, ПатIимат Садикьовахь ва Шавлухъ ХIасановахь. Концертрал программа чIюлугу, дюхъангу дурна Дагъусттаннал халкьуннал артистка Лариса ХIажиевал балайрдал.

[dropcap]П[/dropcap]рограммалул яргсса лахIзарду бия этнограф, искусствовед, Да­гъусттаннал лайкь хьусса культуралул зузала ХIаммадова ПатIиматлул хIадур бувсса халкьуннал лаххиялул исвагьий­сса коллекция аьнтIикIасса душваврал сахIналий ккаккан дуллалиний. Ккаккан дуллайгу бия Лариса ХIажиевал бювхъуну экьи нанисса балайлухун. Балайрду увкуна Аьрасатнал лайкь хьусса артист Артур Готфридлул, Дагъусттаннал эстрадалул артистка СалихIат Валиевал, балайчи Ирада Асваровал. ПатIимат Хайбуллаева каялувшиву дуллалисса халкьуннал къавтIаврил «Рассвет» ансамбльданул ккаккан дурна миллатирттал къавтIавуртту.Авадан-я миллатирттал дукрардугу. Мах1ачкъалаливсса «Инт» этно-кафелул усттарсса ц1игьуртурал дурсса бартардал ч1юлу бувну бия байрандалул ссупра.

«Жу бюхъавай хIарачат бувару жура дуллалисса давурттавун жагьилмигу кIункIу буван, залдануву жагьилтал ва оьрчIру бушиврия дакI ххишалану ххари хъанай дия. Жул гьанумур мурадвагу жагьилтуран, оьрчIан жулла культура, фольклор, миллатрал лаххия, дукрарду лахьхьин дуваву духьувкун. Тарих къакIулсса, мархрая ят бувцсса дагъусттанлувтал къабикIаншиврул. Коронавирусрал пандемия сававну махъсса шиннардий, укун лахъа-хъунну Интнил хьхьунил байран дуван къархьуна, чIалай бия инсантал байрандалух мякь бувккун бушиву, циняв ца зумату кунма, байран лахъсса даражалий ларгунни тIий, барчаллагьрай бия», – увкунни байрандалул хIакъиравусса информация ттухь бувсъсса «Дагъусттан» Культуралул центрданул вице-президент БатIи Оьмаровал. Байрандалийн бавтIцириннал хъиншивуртту чIа тIутIисса, мяъна-мурадру куртIсса дуаьрду дунни цинявппагу лакрал агьулдануха. Вай дуаьрттугу дацIаннав тIий, ялунчIингу байранну дуллансса цIуллушиву чIа тIий буру Москавливсса Да­гъусттаннал Культуралул кюр­ттаран ва ванил лагма лавгминнан.