ТтурчIиял шяравасса Шагьмиловхъал тухумрая хьхьичIвагу чивчуссия. Ва ххуллух бусан ччай буру жяматрал дянив хIурмат-кьиматрайсса АьвдурахIманнул арс Заурбаглуя.

Заурбаг увну ур 1946 шинал Гъунив. Дяъвилия махъсса ккашикарсса шиннардийн оьрчIшиву тIайла дарцIусса Заурбаглун багьну бур чIумуцIун дархIусса захIматшивуртту ду­хIан. Ванал нину, Ххадижат, диркIун дур ЧIухърал шяравасса. Ппу, АьдурахIман, дурккусса, итххявхсса адамина ивкIун ур. Дяъвилул ва дяъвилия махъсса шиннардий зий ивкIун ур Гъунив заготовительну. Ши­кку кIул хьуну, бувцуну бур ванал Ххадижат. Цувагу яхьуну ур 94 шинай. Гъунив ялапар хъанай цаппара шинну дурну махъ, вайннал кулпат бивзун бур Щурагьун. Щурагь ппу зий ивкIун ур Дагпотребсоюзрай. Заурбаглун ряхра шин хьусса ппурттуву вайннал кулпатрал къатри машан ларсун дур Хасаврай. Та чIумал Хасаврай ялапар хъанай ивкIун ур АьвдурахIманнул хъунама уссугу. Ваналгу бивкIун бур 11 оьрчI бусса хъунмасса кулпат. Заурбаг цалчинмур классравун лавгун ур, га ппурттуву яла хьхьичIунмурну ккаллисса, Хасавюртуллал 1-мур школалийн. Шикку зий бивкIун бур цIанихсса учительтал, чIявуми цивппагу бивкIун бур оьрус миллатраясса. Заурбаглул шикку арулва класс къуртал бувну бур марцIсса ххювардай. Тани арулва класс къуртал бувну махъ училищалувун, техникумравун буххансса ихтияр дусса документ булайсса бивкIун бур. Нитти-буттан ччай бивкIун бур Заурбаглуя хIакин хьуну. Ваналгу манеъшиву къадурну, увххун ур медучилищалувун. Дуклан ухлахисса шинал, акушерский отделениялийн бакъа, документру кьамул къабуллай бивкIун бур. Фельдшертуралмур отделениялийнсса документру кьамул буллай бивкIун бур шин ляхну. Мукун, ва фельдшертуралмур отделениялийн къаагьну, 35 душ бу­сса акушертал хIадур байсса группалувун агьну ур.

БувчIлай бур цукун ивкIссарив 1-мур сентябрьданий медучилищалувун дарсирдайн увкIсса чIумал, марцIсса душваврал бувцIусса группалийн я щусса, начлилсса чIаважагьил. Дуклакисса мукьрагу шинай тIурча, ва душвавран, ца уссу куна, ххира хьуну ивкIун ур.
– Тай чIунну тачIав дакIния къалагай. Гьарца шинал 23-мур февральданул байрандалул гьантрай на барча уллали­сса 35 карточка дучIайва душваврал. Мунияту ттунгу 8-мур мартрал байрандалийн гьарца душнин цIа куну барча буллалисса карточкартту чичлан багьайва. ХIакьинусса кьинигу ттул архивраву дуссар ми ядуллай, – тIий ур Заурбаг.
Училище къуртал баврийну гьашиву къадурну, 1964 шинал Заурбаг дуклан увххун ур Дагъусттаннал медициналул институтравун. Мукьилчинсса курс къуртал байхту, хьхьичIунну дуклаки­сса студентътуравух гьан увну ур Саратоврал мединститутрачIасса аьралий-медициналул факультетрай дуклан.Тай шиннардий гьарца курсирая дуккавриву ххуйсса ккаккияртту хьун дур­сса ххюя студент гьан айсса ивкIун ур Саратоврал аьралий медициналул факультетрайн. Лейтенантнал чиндалущал 1970 шинал къуртал бувну бур Заурбаглул Саратоврал мединститут. Дуккаву къуртал дайхту, Заурбаглул бувну бур кулпат. Ванал бувцуну бур цалва Шагьмиловхъал тухумраясса ХIажи-МахIаммадлул арснал Аьдиллул душ Галина. Хъунмур оьрму гъурбатрай зий гьан бувсса кулпатрал ххуллий хьунадаркьусса захIматшивурттугу чансса къадиркIун дур. ЗахIмат­шивурттугу нахIу-хIалимну ялапар хъанахъисса вайннал кулпатрал цачIу духIайсса диркIун дур.

Мединститут къуртал бувну махъ Заурбаг увцуну ур Германнаву къуллугъ буллалисса Совет аьралуннал группалувун (ГСВГ). Тикку ва ивкIун ур Шперенбергуллал авиациялул полкрал лазаретрал хъунаману. Ванащал медпунктрай стоматологну зий бивкIун бур кулпат Галинагу. Германнаву вайннал дурну дур ххюра шин. Тикку ларсун дур Заурбаглул медициналул къуллугърал капитаннал чингу. Германнава ва гьан увну ур Молдавиянавусса Маркулешты тIисса поселокрайсса авиациялул полкрал медициналул хъунаману. Тикку дачIи шин дурну дур авиациялул-космический медициналул хIакиннал пишакаршиврул курсирдай.

Ва полкраву зий хъун хIал къавхьуну, дуллуну дур ванан майорнал чин. 1978 шинал Заурбаг ивтун ур Одессалул округрайсса Буялык тIисса поселокрайсса аьралий аэродромрал авиациялул полкрал медициналулмур бутIул начальникну. Ва полкраву космосравун биянцIакул лехлахисса летчиктурал цIуллушиврул ялув ацIаву дан багьлагьисса, гьаваллавун леххан хьхьичI ва левххун махъсса летчиктурал мюхчаншиву дуруччаврил жаваб дулун багьлагьисса, хъуннасса тIалавшинна дусса даву вихшала дурну диркIун дур Заурбаглуйн. Муния махъ ва тIалав увну ур Тирасполь шагьрулийсса аьралий авиациялул дивизиялул медициналул хъунаману зун.
Одессалий вайннал кулпатран дуллуну дур къатри. Тай диркIун дур 1981-86 шинну. Гьарица чулухуннайсса куртIсса кIулшивуртту дусса Заурбаг ца кIаная цамур кIанайн тIалав уллай икIайсса ивкIун ур. Мукун, Одессалия Заурбаг цIуницIакул гьан увну ур Польшанавун. Та ппурттуву Польшанал аьралий авиациялул армиялул командирну ивкIун ур генерал А. И. Лебедь. Та полкраву ларсун дур Заурбаглул подполковникнал чингу. Польшанава цIунилгу Заурбаг гьан увну ур Одессалийн авиациялул округрал медициналул къуллугърал хъунама офицерну. 1993 шинал, Совет аьрал дазул кьатIувсса билаятирттая зана хъанан бивкIукун, Заурбаг кулпатращал ивзун ур МахIачкъалалив.

Пенсиялийн уккан хьхьичI 10 шин дурну дур ванал Каспийск шагьрулийсса Минобороналул аьралий поликлиникалий медициналулмур бутIул хъунаману зий.
Аьралий медициналул ххуллий бивхьусса захIматрахлу Заурбаг лайкь хьуну ур цикссагу медаллан, барчаллагьрал чагъардан.
Заурбаглулгу, Галиналгу дянив ур кIия арс. Буттан цIа дирзма арснал, АьвдурахIманнул, бувккуну бур Дагъусттаннал халкьуннал хозяйствалул институт. АьвдурахIман ххуйну кIулссар МахIачкъалаллал «Бродяги» командалул гьурттучи ва «Кин­сса» группалул солист хIисаврай. МахIаммад тIима арснал, нитти-буттал пиша язи бувгьуну, къуртал бувну бур Мединститут.
Вай гьантрай Заурбаглул ва Галинал цачIу оьрму бутлай хьуну дур 53 шин. ХIакьинугу вайннал кулпат бур цала наслулунгу, цайминнангу эбратрансса. ЧIа учинну вайннан цIакьсса цIуллушиву, гьарца ишираву тIайлабацIу, цала наслулия щалихханнинсса оьрмулул шинну!