Вай гьантрай МахIачкъалалив хьунни «Сакля Гамзатова» тIисса спецпроектрал презентация. Ва дур Расул ХIамзатов ниттил увну 100 шин шаврин хасъсса проект. Ванил автортал бур Дагъусттаннал ЦУР-лил (Центр управления регионом) каялувчи Султан Аьбдуралимов ва ванал хъиривчу Гянжеви ХIажибалаев.

Му проектрал автортал хьунабавкьунни Дагъусттан Республикалул культуралул министр Зарема Буттаеващал ва гьарта-гьарзану бувсунни цалла сипталия.
Проектрал пландалийн бувну дувантIий бур шаэрнал таржумачитуращалсса, дустуращал­сса, кулпатравуминнащалсса ва уртакьтуращалсса эксклюзив журалул видеорду, датIлантIий бур шаэрнацIун дархIусса дакIнийн бичавуртту. ЦачIун дурну дур шаэрнал архивравасса видеорду, ванал шеърирдащалсса фотокарточкарду, ванал мукъурттийнусса балайрду.
Проектрал автортурал бур ванил география гьарта-гьарза дансса пикри.

– Расул ХIамзатов ивну ур личIи-личIисса билаятирттайн ва регионнайн, ванал дустал бакъасса кIану къабивкIун бур. Жул пикри буссар проектравух гьуртту хьун буван шаэрнал СНГ-лул билаятирттаясса ва цайми регионнаясса дустал, ванащал кIулну бивкIми. Умуд бур ва проектрая культуралул ва информациялул цийнура цурдасса портал хьунссар тIисса, – увкунни Г. ХIажибалаевлул.

Зарема Буттаевал цила чулуха ххи бунни ва сипта бакIуйн дуккан давриву цищава шайсса кумаг бувантIишиву.
– Ттул пикрилий, ва проектрал рубрикарттал формат, ва щаллагу концепция цара-цану хIаз дизанссар оьрмулул хъуниминнан ва жагьилминнан. Жу хъуннасса ххаришиврущал ва даврил чIарав бацIантIиссару, – кунни ванил.