Тталаткьини Расул ХIамзатовлул цIанийсса Национал библиотекалуву ДР-лул ХIукуматрал хъунаманал хъиривчу Муслим Телякавовлул каялувшиндаралу хьунни КIулшиву дулаврил ва элмулул министерствалул коллегия.
2023-ку шинал федерал даражалий зузи бан тIий бур педагогтуран кабакьулунсса Щалагу Аьрасатнал лагрулийсса конкурсру. Масалдаран, «Учитель года России» Щалагу Аьрасатнал конкурсрай ххув хьусса учительнал дулун ккаккан дурну дур ца миллион къуруширттал, кIилчинмур ва шамилчинмур кIантту бувгьуминнан – ххютту-ххюттуршазарда къуруш. «Воспитатель года России», «Директор года России», «Педагог-психолог России», «Учитель-дефектолог России», «Мастер года», «Сердце отдаю детям» тIисса пишакаршиврул конкурсирттай ххув хьуминнан – кIитту-кIиттуршазарда къуруш.
![](https://ilchi.info/wp-content/uploads/2023/02/2d-1-e1675411633165.jpg)
Микку ДР-лул виваллил иширттал министр Аьбдурашид МахIаммадовлул бувсунни кIулшиву дулаврил идарартту террордания мюхчан баврил ххуллий цукунсса чаранну ляхълай буссарив:
– Виваллил иширттал министерствалул зузалтрал цайми ведомстварттащал цачIуну дуллай буссар кIулшиву дулаврил идарартту мюхчан баврил ххуллийсса давуртту. ЦIусса шинал бухкIуллий гьарцагу дуккаврил идаралий ци даражалий дуссарив ххал дайссар мунил террорданиясса мюхчаншиву. Ми ххал бигьавурттал хIасиллайн бувну, цIакь дайссар ялув бацIавугу, – кунни министрнал.
КIулшиву дулаврил идарартту террордания мюхчан баврил ххуллийсса чараннавух ванал кIицI лавгунни дуклаки оьрчIащал бакIра-бакIрах буллалисса профилактикалул ихтилатру, нитти-буттахъащалсса батIавуртту.
Министрнал тIутIимунийн бувну, укунсса давурттайну бювхъуну бур чан дан дуклаки оьрчIал дянивсса тIулдакъашивуртту.
КIулшиву дулаврил министр ЯхIия Бучаевлул бувсунни Дагъусттаннал БакIчи Сергей Меликовлул Дагъусттаннай КIулшиву дулаврил шинну баян бувсса 2022-ку шинал даврил хIасиллая.
Ведомствалул дурну дур личIи-личIисса журалул 120 мероприятие.
«2022-ку шинал федерал органнал ва цайми регионнаясса кIулшиву дулавриву зузисса вакилталгу гьурттуну дурссар республикалул кIулшиву дулаврил система хьхьичIуннай даврил масъаларттайн дагьайсса кьура конференция ва ккуркки столлу, ххюра хъуннасса форум», – увкунни министрнал.
Республикалий кIулшиву дулаву хьхьичIуннай дансса ххуллурдая буслай, ЯхIия Бучаевлул кIицI лавгунни гьанусса тезисну хъанай бушиву республикалий цасса кIулшиву дулаврил пространство хIасул даву ва мукунма кIулшиврул даража лавай бансса ххуллурду цинявппа оьрчIан цакуцну тIитIаву.
Му бакъассагу, ванал бувсунни 2023-ку шинал Дагъусттаннал халкьуннал шаэр Расул ХIамзатов дунияллийн увккун 100 шинан хас дурну республикалий дан ккаккан дурну душиву тамансса мероприятияртту.
Хъирив кIулшиву дулаврил министрнал хъиривчу Аида Далгатовал бувсунни Педагогнал ва насихIатчинал шинан хас дурну 2023-ку шинал дан ккаккан дурсса давурттая.
«Педагогнал ва насихIатчинал шин хас дуллалиссар, так учительтуран дакъасса, оьрчIан ялун ххисса кIулшиву дуллалисса зузалтран (миннавухва магьирлугърал идарарттангу) ва спортрал тренертуран. 2023-ку шинал лажиндарай хъуннасса лагрулий дуллантIиссар республикалул ва федерал даражалийсса пишакаршиврул форумру, конференцияртту», – увкунни Далгатовал.
Сентябрь зуруй хьунтIий дур Педагогнал ва насихIатчинал шинан хас дурсса Хъуннасса педагогический диктант ва Щалагу Аьрасатнал дарс. Октябрь зуруй хьун тIий дур Хъуннасса учительтурал нюжмар. Мукунма хьун тIий бур пишакаршиврул конкурсру «Учитель года», «Воспитатель года», «Педагогическая династия», «Лучший молодой ученый» ва цаймигу.
«2023-ку шинал федерал даражалий зузи бан тIий бур педагогтуран кабакьулунсса Щалагу Аьрасатнал лагрулийсса конкурсру. Масалдаран, «Учитель года России» Щалагу Аьрасатнал конкурсрай ххув хьусса учительнан дулун ккаккан дурну дур ца миллион къуруширттал, кIилчинмур ва шамилчинмур кIантту бувгьуминнан – ххютту-ххюттуршазарда къуруш. «Воспитатель года России», «Директор года России», «Педагог-психолог России», «Учитель-дефектолог России», «Мастер года», «Сердце отдаю детям» тIисса пишакаршиврул конкурсирттай ххув хьуминнан – кIитту-кIиттуршазарда къуруш», – ххи бунни министрнал хъиривчунал.
Докладру бувну махъ, коллегиялий гьуртту хъанахъиминнал бувсунни цала-цала пикрирду.
Коллегия къуртал бунни 2022-ку шинал дуккаврил шинал хьхьичIун ливчусса педагогтуран ДР-лул КIулшиву дулаврил министерствалул чулухасса наградартту дулаврийну.