ЦIуминалийсса ЦIуссалакрал райондалул бакIчинал бигарду биттур буллалисса Сулайман Рамазановлул каялувшиврий хьунни ттукI лешлашаврил масъалартту ва энергооборудованиелул тагьар ххал дигьлагьисса совещание.
Шикку гьуртту хьунни ЦIуминалийсса щархъал бакIчитал, Сулакьрал участокрал Централ РЭС-рал мастер Аьбдулла ХIажимусаев.
КIицI лавгунни махъсса ппурттуву, дяркъу хьуну, цIуминалийсса щархъал агьали, ччя-ччяни ттукI лешлай, авара хьуну бивкIшиву.
Шяраваллал бакIчитурая Сулайман Рамазановлул тIалав бунни, хасъсса пишакартурайнгу оьвкуну, щархъавусса энергооборудование ци тагьарданий дуссарив ххал дигьин. Мукунма тапшур бунни ишбажаранчитурайн, коммерциялул ва цаймигу юридий объектирдал заллухъруннайн электроэнергия ишла баву низамрайн дуцинсса ва объектирдай мюхчаншиву дуруччинсса ххуллурду лякъин.
