Райондалул агьалинахь ялун нанисса шин барча дан бувкIун бия ДР-лул Халкьуннал Мажлисрал депутат Марат Илиясов, захIматрал ва соцразвитиялул министрнал хъиривчу Рашид Аьлиев.
Байрандалий гьуртту хьунни райондалул каялувчитал, идарарттал каялувчитал ва зузалт, дуклаки оьрчIру.
Юсуп МахIаммадовлул, бавтIминнахь ялун нанисса ЦIусса шингу барча дурну, чIа увкунни цIуллушиву, тIайлабацIуртту ва дакьаву. Бувсунни яла нанисса шинаву райондалий дан бювхъусса давурттая, тIайлабацIурттая ва ялун нанисса шинаву хьхьичI бивхьусса мурадирттая. Лахъсса зунттал районнал дянив жулла район гьашинугу социал-экономикалул ккаккиярттаву цалчинмур шачIанттуйн лахъавугу кIицI лаглай, чIурчIав дурунни район хьхьичIунсса ххуттайн дукканшиврул цума-цанналгу бивхьуну бушиву цала захIматрал бутIа. Барчаллагь увкунни райондалул иширттаву чIарав бацIлай бушиврухлу.
«Цуксса хIайпнугу, яла нанисса шин дакIний лирчIунни, хьхьичIуннайшивурттайну дакъасса, билаятрал ялун дуркIсса хIасратсса кьинирдайнугу. Украиннал аьрщарай нанисса хасъсса аьралий операция сававну, жула миллат язисса арсваврацIа хьунни. Умуд къакьукьинну вайннал оь экьибутIаву нахIакьсса къахьунтIишиврийн, жула арсру ххувшаврищал зана хьунтIишиврийн. Кабакьинну тайннацIун жувагу жула захIматрайну, уттинин бивкIссаннуяр ххисса гьавасгу, гужругу ишла бувну. Аллагьнал рахIму-цIимилущал, дакьаврищал ва барачатращал ялун най лякъиннав ЦIусса шин!».
Агьали барча бунни Марат Илиясовлул ва Рашид Аьлиевлулгу.
Щала Аьрасатнаву баян бувсса «Мурадирал елка» акциялул лагрулий елкалия мурадирттащалсса кIива конверт ливккунни Юсуп МахIаммадовлул, ца-ца конверт ливккунни Марат Илиясовлул, Рашид Аьлиевлул, Абубакар Къюннуевлул, Явсупи ХIамзаевлул, Рамазан Майрановлул, Ансар Къажлаевлул, Илияс ХIажиевлул, Темирлан МахIаммадовлул, Макьсуд Макьсудовлул.
Цала гьунардайну бавтIми хIайран бувсса Гъумучиял детсадрал ва ОьрчIал магьирлугърал школалул оьрчIан Дякъил Ттаттал Нажвадиннул ва Марххала душ Залинал цала талихIрал кьуцурттува бавчIунни ссайгъатру.
Байран къуртал хьунни райондалул магьирлугърал къатлул зузалтрал концертрайну.