ЦIуссалакрал шяравусса «Буратино» тIисса оьрчIал садрай июнь зурул 17-нний хьунни кIива хъуними группа итабакьлакьисса выпускной бал. «Фиксики» ва «Умницы и умники» тIисса вай группардавусса оьрчIру уттигъанну кунма нитти-буттал кару дургьуну бувцуну бувкIссия садикрайн. Янил ляпI учиннин ларгунни шинну. Утти вай бачинтIиссар школалийн, байбишинтIиссар цIусса оьрму. ОьрчIру ца чулуха ххарину бия цивппа хъуни хьуну, школалийн лагайсса оьрмулувун бивну тIий, ца чулухагу къуману бия кIилчинмур ужагъну хьусса садикрава лаглай.

Ва кьини садикрал залдануву ляличIисса уттарашинна дия. ЧIюлусса залданувух цавунма цивппа къалаглай занай бия авурну лархсса оьрчIру ва балданул гьухъравусса мюрщи принцессахъул. Ва кьини тарбиячитуралгу, нитти-бутталгу хьхьичI вайннал ккаккан бунни цинявппагу цалва гьунарду. ЛичIи-личIисса магьравасса парчри оьрчIал бивхьунни бунияласса артистурал кунма. Дюхханну, асар хьунну дурккунни назмурду, увкунни балайрду, бивзунни къавтIун. Магьрал персонажирттал суаллахьхьун жавабру дуллай, оьрчIал кка­ккан дунни цалла кIулшивуртту. Хъирив, цинявппа кьатIув був­ккун, итабавкьунни гьаваллавун дакьаврил лишанну хъанахъи­сса чагъаруннил хьхьигу, ранг-рангсса шардугу.
Садикрая нанисса оьрчIахь ххуллухъин тIисса ихтилат бунни садикрал заведующая Гулжагьан Сутаевал.
-Ттун ххуйну дакIний бур зу, садикрайн къаччай, нитти-буттахъал хъирив аьтIий бивкI­сса куц. ХIакьинурив зу хъювусул бувккун буру садикрая най. Зул хьхьичI хъиннува тяхъа­сса ва илкинсса ххуллу тIивтIуну бур. Школалул партардах зу бизантIиссар куртIсса кIулшивурттал гьану. Зу кка­ккан бантIиссар зулва гьунарду, дуккавриву, спортраву ва цаймигу иширттаву. Уттиния тихунмайсса оьрмулувугу дусшиву дуну бикIияра. Хъамамабитару зулва садик, — увкунни Гулжагьан СутIаевал.
Ихтилат къуртал хьуну махъ ванил буллунни оьрчIахьхьун садик къуртал бувсса дипломру ва ххуллухъиндарал махъру чивчусса грамотартту.
ОьрчIал нитти-бутталгу цала чулуха бахшишру дунни садик­рал тарбиячитуран.
ХIадур бувссар
А. Аьбдуллаевал