Сентябрь зурул 23-нний Санкт-Петербурглив хьунни 21 шинавун бияннинсса оьр­мулувусса чIаважагьилтурал дянивсса дзюдорал Щалагу Аьра­сатнал турнир. Ваний цалчинсса кIану бувгьунни Ккур­ккуллал шяравасса Робертлул арс ХIажимурад Магьдиевлул.

Щалагу Аьрасатнал турнирданий гьуртту хьун Дагъусттанная гьан бунни сентябрь зурул 18-нний хьусса региондалул чемпионатрай ххув хьуми.
Финалданий ХIажимурад, Аьрасатнал чемпионнащал ччалли увккун, ххув хьунни. ХIа­жимурадлун 19 шин дур. Ва дуклай ур Дагъусттаннал университетрал юридий факультетрал 3-мур курсрай. Утти­нингу ванал личIи-личIисса бяст-ччаллаву хьхьичIунсса кIанттурду бувгьуссар.

Барча тIий буру ХIажимурад­лухь бюхттулсса ххувшаву.
ЦIуллушиву дулуннав, оьр­мулулгу, спортралгу ххуллий хьхьичIуннайшивуртту, тIайлабацIуртту чIяву баннав.