Щурагьсса педучилище мудангу ккаллину буссар хьхьичIунсса кадрарду хIадур бувсса дуккаврил идаралун. Шичча бувкссар цикссагу бюхттулсса учительтал, тарбиячитал, лавайсса даражалул пишакартал.
Миннавух бур чIявучин кIулсса, ххаллилсса педагог, тарбиячи ПатIимат Фаталиева (ХIусайнаева). ПатIимат бур Занналва педагогну ляхъан бувсса, гьарца увкусса мукъуйгу, бивзсса шаттирайгу цIу цIанпир бусса инсан. Ва хIакьинусса кьинигу хIурматрай дакIнийн бутай ваничIа дуклай бивкIминнал ва архIал зий бивкIминнал.
![](https://ilchi.info/wp-content/uploads/2022/04/phataliev_3.jpg)
ПатIимат бур Хъусращиял шяравасса цIанихсса ХIусайнахъал агьлу-авладрал душ. ЧIявусса оьрчIру бусса ХIусайнал ва Марияннул кулпатраву ва чIанма-чIивимур бивкIун бур. Бава-буттагу мащилий буну, чIярумур чIумал ПатIимат шаппа цинма цуппалу бикIайсса бивкIун бур. Дарс лахьхьи учинсса, ялув ацIансса цучIав акъанугу, цалвагу дарс къалархьхьуну школалийн къалагайсса бивкIун бур.
Бигьалагай кьинирдай, бургъилух-дякъивух, гъаравух-марххалттанивух нитти-буттачIан мащилийн лавгун, тайннангу кумаг байсса бивкIун бур. Итникьини, чани хъяхъа чиннин бивзун, 18 километралул ххуллугу бивтун, дарсирайн чIал къавхьуну бучIайсса бивкIун бур. Цинма цуппалу ххуллийх нанисса душнин ца чIумал барцI хьунабавкьусса ишгума хьуну бур.
[dropcap]З[/dropcap]ирангсса, сивсусса ПатIимат, ссаячIав нигьа къабувсун, балайгу тIий, ххуллу бялахъан буллай бачайсса бивкIун бур. Жагьилний ЧIяйннал школалий зий ивкIсса, махъ чIярусса шиннардий Щурагьиял педучилищалуву дарс дихьлай ивкIсса ПатIиматлул учитель ва коллега Аьли Аьйдаев (аьпа баннав цал) дакIнийн бичавурттаву буслай ур ЧIяйннал школалий ва дуклай бивкIсса класс яла итххявхми, гьунар буми оьрчIру бусса класс бивкIшиву, миннавугу ПатIимат ляличIинува итталун багьлагьисса бивкIшиву.
ПатIимат школалий гьуртту шайсса бивкIун бур цинярдагу мероприятиярттавух, чIяруминнул сиптачигу, сакиншинначигу цуппа бивкIун бур. Цилагу, цинявппа ХIусайнахъал кунма, ххуйну балайгу учайсса бивкIун бур.
[dropcap]Ш[/dropcap]кола ПатIиматлул марцIсса ххювардай къуртал бувну бур. Гихунмай дуклансса гъирагу хъунмасса бивкIун бур. Амма, нину-ппу бугьарасса буну, вайннах аякьа дулланма аьркиннихха тIий, дуклан гьанна учин сикъаслай бивкIун бур.
-Ца ппурттуву кьатIату увкIсса буттал цIувххуна: «Ина дуклан буххан документру булав?» – куну. «Цукун булуви, зу кьус-кьус бивкIун бурухха, зугу кьабивтун, на цукунна лагайсса дуклан», – куссия на. Та ахттайн чIун дия. Буттал увкунни: «ОьрчIру документру буллуну бувкIунни тIий, буслай бия ккурчIав, ттигу къачIалссарча, ша дири ба, насу, була документру», – куну. Мукун, гьармуниву низам дусса чIун дияхха, даву къуртал къархьуну шавай цучIав къалагайва. Ахттая махъ лавгун, бивра Ваччав, инсантал давурттай бия, булав документру. Ца нюжмардува, ттуйн экзаменнайн оьвтIисса чагъар бувкIуна.
![](https://ilchi.info/wp-content/uploads/2022/04/phataliev_4.jpg)
Шагьрулийн тIайла буклакийни буттал увкунни: «Бургу, ттул душ, цIугу, цIайннагу цачIун дирукун, цIу лачIайссар, оьрчIгу, душгу цачIун хьувкун, наслу бизайссар. Жу хъунив хьуну чIалай бурив, вил оьрчI ябан жуща къахьунтIиссар. Ххюра шинава институт къуртал байхту, щар хьунссара, муниннин вихь ихтияр дакъассар щар хьун», – куну.
Буттал дарсгу лаларсун, лавгра дуклан. Та чIумал ттун чIявусса пишардаягу къакIула, хъинну ххирасса дикIайва математика. Ттул уссил щарнил чайссия, махIаттал хьуну бикIара, балайгу тIий математика дайсса ца ина бакъа къаккавкссар куну. На школалий дуклакисса чIумал захIматсса чертежру дикIайва. На ми оьрчIахь дува учайссия, нава гайннал задачартту байссия. Институтраву дуклан нанисса чIумал, пикри бав, навания гиву чертежру щихьчIав дува къатIунссара, ттунна литературагу ххирар, бухханна филологиялулмур факультетрайн куну. ХIакьинугу дакIний дур литературалул экзамен. Максим Горькийл творчествалуцIун бавхIусса билет бия. ДакIних буккав «Песня о Соколе», «Песня о Буревестнике». Экзамен кьамул дуллалисса педагогнал, махIаттал хьуну, увкуна, гьанттайннин вичIи дишивияв вих куну. Ххуйну дуклай бивкIра. Къадуклансса чара бакъая. Институтраву ПатIимат хьхьичIунну дуклай бивкIун бур, ласайсса бивкIун бур лавайсса стипендия. Ва буцайсса бивкIун бур хъуними курсирдайн дарс цукун бусан аьркинссарив ккаккан дангума.
Итххявхсса студентка хIисаврай ва щала институтраву кIулну бивкIун бур. Буйнакскаллал Хъаннил педучилищалул директор, Верховный Советрал депутат Асият Гаранова бувкIун бур ПатIимат цачIанма зун гьан бувара тIий.
![](https://ilchi.info/wp-content/uploads/2022/04/abachara_fat.jpg)
– Училищалувун ххюра шинал стаж бусса, хьхьичIунсса учительтал бакъа кьамул къабайсса бунува, на гьан бувра училищалуву зун. АрхIал дуклакими ттущал хъинсса бикIайва, на миннангу ттущава шайсса кумаг байссия. Буйнакскалийн гьан буллан бивкIукун, га цаннил ттухь увкуна, ттул буттал къатри дуссар кIикку, ина жунний яхьунтIиссара куну. Ттущал дуклакисса, Буйнакскалиясса душваравух бия Жанна Абуевал нинугу. Танилгу, цила адресгу бувсун, ччимур чIумал жул къатрал нузру вин тIиртIуссар куна. Мудангу дакIний бикIай ттухра ниттил куннасса аякьа дуллай бивкIсса Ахкуева Шуаьнат. Ва чIярусса шиннардий Гъумучиял педучилищалул директорну бивкIун бия. На зузисса чIумал училищалуву биологиялул ва химиялул дарсру дихьлай бия.
ПатIимат учительтурал коллективрангу, студентътурангу най бунува ххира хьуну бур. Та дусса-дакъасса заманнай, личIи-личIисса ахIвалданул кулпатирттава дуклан бувкIсса студенткахъай дакI цIуцIисса, аякьа дусса бивкIун бур. КIюлану лархсса студенткахъан циятура лирккун лаххи-ликкиягу дулайсса диркIун дур.
Ххуйну дакIний дур ванин студентътуращалсса цалчинсса хьунабакьаву. Ва хьунабакьавугу хIазсса хьуну дур. Студентътурайх бавчIуну бивкIун бур лакьинсса кабинетру. Ялун бувкIсса ПатIиматгу студентка ххай, ванингу шюшинсса чIавахьулу ккаккан бувну бур. ПатIиматлулгу, ссихI-чIитI къадурккун, цинна ккаккан дурсса даву дурну дур.
Хъиривмур кьини дарс дишин классравун ПатIимат буххайхту, га преподаватель бивкIшиву бувчIусса студентътал пахъ багьну бур. «Нач мадару, ттун зу лахьхьува ххира хьунну», – куну, ПатIиматлул гайннал намус ххиен бувну бур. Та цалчинсса выпускравасса душвавращал оьрмулухунсса дахIаву хьуну дур ванил. ХIакьинусса кьинигу тайннаясса шанма душ бур Киеврай, Георгиевскалий яхъанай. Цаппара шиннардил хьхьичI ПатIимат, хъамалу оьвтIий, тихунгу лавгун бур.
![](https://ilchi.info/wp-content/uploads/2022/04/phataliev_5.jpg)
Шиккува кIицI лаган, ПатIиматлул лас АбутIалиб Фаталиевгу тай шиннардий цалчинмур педучилищалуву дарс дихьлай ивкIун ур. Вагу чIявучин дакIнийссар гьунар бусса педагог хIисаврай. Ца ппурттуву АбутIалиблул гьан бувну бур ПатIимат цува зузисса училищалувун ца кьинисса литературалул дарс дишин.
– Бувхра, хъуни-хъунисса оьрчIру бур классраву, цавагу душгу бакъар. Гайгу ттух бакIрагу дугьлай бакъар. Бивзрув, бурувгу куну, цIувххуссия шардайн лахьхьин ци дуллуна куну. Жун къакIулли куну, жаваб дуллуни. Журнал тIивтIуну, бурувгра: М. Горькийл творчество лахьлай бия. На ганал биография буслай байбишайхту, хIурхIа цала-цала кIанттай щябикIлан бивкIунни, пахъ багьунни, чIявусса затру бусав. Занг рирщуну на бувккун бачайхту, цинявппа лагма лавгунни. Жун ина жухьра дарсру дихьлай ччива тIун бивкIунни. Мунияр махъ ми цимилагу директорначIан лавгун бия, на цахьра дарс дихьлан буцара тIий. Учин ччимур мури – кIулшивурттал бияла хъунмасса бия. КIулшивурттал гьаз дайва чув бухьурчангу, ттул сий. Ттухь инсантал цIухлан бикIайва, мийксса луттирду буккинсса чIун цукун шай вил тIий. Луттирду буккайссия шанан къабивкIун. Цалчин на бувккуссар Москавлив МГУ-луву дуклакисса чIумал ттула уссил, Абачарал, лавсун увкIсса «Робинзон Крузо» ва «Путешествие Гулливера» тIисса луттирду .
Тания шийнмай ПатIиматлул къушлийсса яла кьимат лаваймур хъус-ххазина луттирду бур. ХIакьинугу ванил ичIува авадансса библиотека бур.
ПатIимат ххаллилсса педагог бушиву буслай бур ванил дарсру дишаврил методикалулгу. ОьрчIру дарсирдахух гьан бансса, миннавун гъира-гьавас бутансса кьяйдарду лякъайсса диркIун дур ванил. Литературалул дарсру дихьлахьийни, оьрчIавун произведение буккинсса цIу дагьаншиврул, дакIних бусайсса бивкIун бур яла тамашамур парча.
– Тти пикри буллай, та чIумалсса учительтал ларайсса кIулшивуртту ларсъссагума къабивкIун бур, амма, цала ккалай, лахьлай, куртIсса кIулшивуртту дусса бия циняв, – тIий бур ПатIимат.
ПатIиматлул сакин дурну дур 2-мур, 3-мур классирттансса лакку мазрал дидактикалул материаллу, 8-мур, 9-мур классирттансса лакку мазрал учебникру, хрестоматияртту. Ва хъанай бур 7-мур классрансса учебник-хрестоматиялул соавторгу.
ПатIимат бур «ДАССР-данул лайкь хьусса учитель», «Дагъусттаннал просвещениялул отличник», дянивсса хасъсса кIулшивуртту дулайсса дуккаврил заведениярттал хIурматлувсса зузала, захIматрал ветеран.
АбутIалиблул ва ПатIиматлул хъунама арс Рамазан Фаталиев Дагъусттаннал Композитортурал союзрал председательли. Ва лайкь хьуссар Дагъусттаннал ПаччахIлугърал премиялун. Душ Ламара, нину кунма, ххаллилсса педагог бур. ЧIярусса шинну хьуну дур ванилгу Щурагьиял педучилищалуву дарсру дихьлай. ЧIивима арс ХIажимурад хьхьичIунсса кардиолог ур.
Ватандалийн кьини дурксса чIумал, Пат1иматлул хъуними уссурвал – Рамазан, Абачара, Саэд цалчинсса кьюкьравух дяъвилийн лавгун бур.
– Дяъви байбивхьусса чIумал, на хъиннува чIивисса бивкIун бура, та чIумал ттун ттула уссурвал дакIнийвагу бакъар. Ттун ми кIул хьусса дяъвилия зана хьуну махъри. Цалчин дяъвилийн лавгун ия Рамазан тIима уссу. Буслан бикIайва та шяраву хъинну сий дусса жагьил ивкIшиву, танах эшкьи хьусса душругу чансса къабивкIшиву. Рамазан ивкIусса чIумал дяъвилия бувкIсса чагъарданий чивчуну бия, ва жул бакIру бакьин бувуя, чIири бичуя, кьянкьасса ва сивсусса жагьил уссия тIий. Рамазаннун Виричунал цIа дулун ккаккан бувну бивкIссар. Амма муния чивчусса чагъар, буттал Орджоникидзелий Пехотный училищалуву дуклакисса АбачарачIан гьан бувну, бяйкьуну бур.
Вайми уссурваврал, Абачарал ва Саэдлулгу, дяъвилул цIараву чувшивуртту ккаккан дурссар, кIиннайннагу захIматсса щавурду дирссар. Абачара, дяъвилия зана хьуну, балчаннуй най ур тIий, буслай бивкIун бур буттахь. ХIусайнал, макьгу нани дурну, щарссанихь увкуну бур: «Ина ттуяр кьянкьасса дурача, дургула, арснал ка дакъарив, ччан бакъарив», – куну. Марияннулгу: «Каругу чIалай дур, ччаннугу чIалай бур», – увкуну бур. Ххарисса нитти-буттал, ккашилсса чIун дунугу, гьарзат щина-цIарайн дирчуну, инсантурайн оьвкуну, ссупра тIивтIуну бур. Ва иш хьуннин ХIусайнал шамагу арснал хIакъиравусса извещенияртту дуркIун диркIун дур. Шяраваллил жяматрал, нитти-буттахь бусан сикъаслай, шамилчин дуркIмур извещение кьюлтI дурну дур. Саэдлул мяйку хьхьу дуллалисса чIумал ганаясса чагъар бувкIссар, итаавкьунна, шавай най ура тIисса.
Арсру сагъну зана хьуннин бухьунссия, ца кьини ХIусайнан къатлувун бувхсса кIива хьхьи ххал хьуну бур. Гай, кIива къувгу кьабивтун, левххун бур. ХIусайнал увкуну бур щарссанихь: «Вил арсру зана хьун най бур», – куну. Гьунттий кьини бувкIссар шавай най ура тIисса Саэдлуясса чагъар. ЧIал къавхьуну Абачарагу увкIссар. Сахаватлувсса, ка тIиртIусса нитти-буттал цадакьартту хьхьичIун багьхьунссия, Абачаран ва Саэдлун дяъвилия зана хьунсса кьисмат хьуну бур.
ХIусайнахъал агьлу-авладрая, вайннал наслулия цикссагу бусансса лякъинссар. Хъуннасса ххаришиву дур вайннал наслугу лайкьсса, тухумрал цIа-кьини бюхттул дуллалисса бушиврия.
Андриана Аьбдуллаева
Имара Саидова