Дагъусттаннал хъуними ва цIанасса ппурттуву экономика яларай дагьан къаритансса чаранну ляхълай бур. Вай агьамсса масъалартту гьаз бувна ларгсса итникьини ХIукуматрал хъунама Аьбдулмуслим Аьбдулмуслимов каялувчину хьусса Оператив штабрал заседаниялий.
Цалчинма вице-премьер Руслан Аьлиевлул балжину бувсуна цIанакул республикалий цукунсса тагьар дуссарив ва, магърибуллал санкциярттая агьалинан зарал къахьуншиврул, цукунсса чаранну ккаккан аьркинссарив. Бизнесран кумаг баврия, социал выплатарттая, кредитирттансса куклушиннардая, предприятиярттансса ка-кумаграя бия ихтилатру. Миннуя балжину бувсун бур ХIукуматрал официал сайтрай. Ххал бивгьуна къабагьавай багьри гьаз буллалаврицIун бавхIуми суаллугу. Республикалий хIасул дурну дур, даххултрал багьри къабагьавай гьаз бувну бухьурча, оьвчинсса «горячая линия».
