[dropcap]М[/dropcap]арт зурул 18-нний МахIачкъалалив хьунни Къирим АьрасатнацIун цачIун хьуну 8 шин шаврин ва Донецкаллал,
Луганскаллал республикартту цала биялдарайсса республикарттуну хIисав даврин хас дурсса митинг-концерт.

Шикку гьуртту хьусса АьФ-лул ПаччахIлугърал Думалул ва ДР-лул Халкьуннал Мажлисрал депутатътурал, жяматийсса идарарттал вакилтурал бувсунни 8 шинал хьхьичI хьусса, тарихравун багьсса, хъуннасса агьамшиву дусса иширая.

[dropcap]М[/dropcap]итинграл даву дайдихьлай, АьФ-лул ПаччахIлугърал Думалул депутат Сайгидпаша Умахановлул кIицI лавгунни, мяйра шинал хьхьичI кунма, хIакьинугу жула агьали, цинявппа цачIун хьуну, Украиннаву нанисса дяъвилул операциялуву гьуртту хъанахъисса Аьрасатнал аьралуннал чIарав бацIан буржлувшиву.

– Жунма цинявннан кIулсса куццуй, хIакьину Украиннава жула аьрали ва экономикалул чулухуннай нанисса нигьачIаву мюхчан даву мурадрайсса дяъвилул операциялуву гьуртту хъанай бур жула уссурвал. Миннава тамансса жагьилтурал къучагъшиврий жанну дуллунни. Вайннал чувшивуртту мудангу абадссар, дакIнийхтуну кьурчIишиву кIидачIлай ура дяъвилул иширттаву жанну дулун багьсса оьрчIал нитти-буттахь ва цинявппагу гъан-маччаминнахь,– увкунни Сайгидпаша Умахановлул.
Ванал мукунма кIицI лавгунни цIанасса ппурттуву вай иширттал хIакъираву Па­ччахIлугърал БакIчи Владимир Путиннул тIайласса хIукму бувшиву ва ванал дачин дурсса политикалул чул бувгьума цувагу хъанахъишиву.

«Мяйра шинал мутталий най бивкIссар цалийн бучIансса маслихIатру. Амма, цуксса хIайпнугу аьрали ишру байбишин багьунни»,– увкунни Сайгидпаша Умахановлул.
Митинграй хъирив ихтилат бунни ДР-лул Халкьуннал Мажлисрал председательнал хъиривчу Камил Давдиевлул.
– Къирим АьрасатнацIун цачIун хьуния шийнмай хьуссар тамансса хъин чулиннайсса дахханашивуртту. ХьхьичIва-хьхьичI та полуостроврайсса агьалинал дяниву цIакь хьуссар дакьаву ва дусшиву. Мяйра шин ларгунни референдум дурну, Къирим АьрасатнацIун цачIун бувну. Ми шиннардил мутталий Къиримнаву бувссар цикссагу школартту, оьрчIал багъру, поликлиникартту, аэродром, машгьурсса «Къиримнал ламу» ва цикссагу социал объектру. Жунна цинявннангу чIалай дур ДНР ва ЛНР хIасул хьусса тагьар.

Киеврай дачин дурну дур агьалинай зулму-къия дуллалисса режим. Мукунсса тагьар жуннагу нигьачIаву дусса хъанай дур. КIул хъанай бур та аьрщарай биологический ярагърал хIал ххал бигьлагьисса 30-хъул лабораторияртту зий бивкIшиву. Му бакъассагу, зий бивкIшиву тикку ядерный ярагъгу сакин бавриха. БувчIлай бур, Западрал хIукуматирттал увкумур буллай сакин хьусса режим хIасул хъанай душиву. Жула Президентнангу, дяъвилул операция баву бакъасса, цамур ххуллу къаливчIунни ми иширттая жувагу, Донецкаллал ва Луганскаллал республикарттал агьали буруччинсса, – увкунни Камил Давдиевлул.
ДР-лул Халкьуннал Мажлисрал депутат Самир Аьбдулхаликьовлул цала ихтилатраву кIицI лавгунни Къирим ва Севастополь АьрасатнацIун цачIун баву тарихраву итабавкьусса гъалатI тIайла бацIан баврин ккаллисса ишну хъанахъишиву. Къиримнал агьали барчаллагьрай бур, АьрасатнацIун цачIун хьуну, паракьатну, вас-ццах бакъа ялапар хъанай бушиврухлу.
Асар хьунсса ихтилат бунни «Лезгинка» ансамбльданул директор Жамбулат Ма­хIаммадовлул.

«Аьрасат – жу вищал буссару. Ва дяъвигу жува къабайбивхьуссар. Жува ва къуртал буллалиссару. Украиннава нанисса нигьачIаву чIалай, жула БакIчинан багьунни Донецкаллал, Луганскаллал республикарттал агьали тикку най диркIсса оьхIалсса режимрая мурахас баву мурадрайсса дяъвилул операция баян буван. Аммарив, западрал хIукуматру тIурча, дур жува тайннайн «ххявхминнан» ккалли буллай. Ссаву ци буссарив тIурча, кьюлтI буллай бур. Мюхчан баяр, цала агьали дяъвилул операциялул хьхьичIун бакьлай бур. Тана, тукун, тай иширттавугума чIалай бур цала инсантурай зулму буллай бушиву.

Циван, ци аьркиншиву дуну? НАТО кьилвалул чулухунмай бачиншиврул. На дакI дарцIуну ура жува цукунчIав му иш хьун къабитаншиврий. Цумур-цагу хIукуматрал ярагъуннил гуж цавайнналвагу лагьсса бакъар. Аммарив, бакъассар минначIа Аьра­сатнал, Дагъусттаннал кунмасса къучагъсса аьралитал. ХIакьину жула аьралитурал, цала жандалий хIайп къаувкуну, ккаккан буллай бур цивппа цукунсса патриотътал буссарив. Дагъусттаннал ниттихъахь барчаллагь учин ччай ура къучагъсса, виртталсса арсру тарбия баврихлу. ЧIа тIий ура Дагъус­ттаннан, Аьрасатнан ва щалагу дунияллун дакьаву», – увкунни Жамбулат МахIаммадовлул.

Ихтилатирттал лях-карах най дия патриот зумунусса концертрал программа. Концертрай гьуртту хьунни «Лезгинка», «Волна» ансамбльлу Даггосфилармониялул ва Опералул театрданул ва балетрал солистътал.

Украиннаву дяъвилул операциялуву гьуртту хъанахъисса жула аьралитурал дакIру даву мурадрай, дяркъу дусса, марххала буллалисса кьини дунугу, Аьрасатнал ттугъругу канихьну, шагьрулул майданнив бувккун бия цикссагу азарахъул инсантал.
Къирим АьрасатнацIун цачIун хьусса кьинилун хас дур­сса митингру-концертру ва автопробегру хьунни Къиримнал полуостроврай ва Аьрасатнал цаймигу регионнай.