МахIачкъалаллал Ленинский райондалий полициялул участокрал цIусса пункт тIивтIунни. Пункт тIитIлатIисса кIанттурдай гьуртту хьунни Дагъусттаннал БакIчи Сергей Меликовгу. Ва хъанай бур муниципалитетрал арцух тIивтIусса, циняв тIалавшиннарду щаллу дурсса цалчинсса полициялул участокрал пункт. Уттинин пункт буссия инсантал ялапар хъанахъисса къатраву.
[dropcap]О[/dropcap]бъект ххал буллай, МахIачкъалаллал Ленинский райондалул каялувчи МахIаммад Алхасовлул бувсунни Дагъусттаннал бакIчинахь къатри дуллай бивкIсса куц.
КIицI лавгунни участокрал къатри дуршиву закондалуцIун къабавкьуну дарххуну диркIсса, администрациялул зана дурсса аьрщарай. Махъсса 8-9 шинал дянив МахIачкъалаллал Ленинский райондалий личIину, цинма куну бувсса полициялул участокрал пункт къабивкIссар. Мунияту, Ленинский райондалул администрациялул сипталуцIун бавкьусса райондалул депутатътурал хIукму бувну 2021-ку шинал ляркъуссар налогирттаясса доходрая дакъасса 5,8 миллион арцул полициялул участокрал пунктрансса къатри дансса.
Пунктрай зий икIантIиссар 8 участковый. Зузалтрансса кабинетру бакъассагу, шикку бикIантIиссар вещдокру ва документру ябуллансса къатригу. Лагма-ялттусса кIанттурду бакьин бувну, бантIиссар сквер.
[dropcap]С[/dropcap]ергей Меликовлул Дагъусттаннал виваллил иширттал министр Аьвдурашид МахIаммадовлущал ххал бивгьунни Дагъусттаннал районнай полициялул участокрал пунктру баврил ва ми аьркинмунил дузал баврил, мукунма техникалул кумаграцIух низамрал ялув бацIаврил масъалартту. Республикалул бакIчинал барчаллагь увкунни Аьвдурашид МахIаммадовлухь, кIира шинал мутталий коронавирусрая буруччаву мурадрай дуллалисса давурттаву властьрал органнан кабакьу баврих. Ванал лавайсса кьимат бивщунни Дагъусттаннал полициялул даврин.
Дагъусттаннай полициялул зузалтрансса участокру щаллу даврил хIакъираву гъалгъа буллай, Аьвдурашид МахIаммадовлул бувсунни МахIачкъалалив ва масъала ттуршвагу процентрал щаллу хьуну бушиву. Му бакъассагу, махъсса шинал республикалий циняв шартIирдал дузалсса 11 райотделданул типовой къатри бувшиву.
