![](https://ilchi.info/wp-content/uploads/2022/03/rukopashnyj_boj.jpg)
Февральданул 21-27-нний Орел шагьрулий хьуссар оьрмулул 14-17 шиннавусса чIава жагьилтурал дянивсса ва 18-21 шиннавусса юниортурал дянивсса каруннай бияврил бяст-ччал. Вайннуй гьуртту хьуссар Аьрасатнал Федерациялул 57 субъектраясса 1000-ннийн бивсса спортсментал. Шикку гьурттушинна дурссар 23 инсанная сакин хьусса Дагъусттаннал цачIундур командалулгу.
Дагъусттаннал чIава спортсментураву мусил медаллан лайкь хьунни Сайгид Багилов, Далгат ХIажиаьлиев, чарвитулминнун – МахIаммад Имавов, АхIмад АхIмадов. Вайннаву бур лараймур категориялул тренер, цалчинмур категориялул судья, ДР-лул карунний бияврил хъунама тренер, Шахьуйннал шяравасса Зураб Аьлиевлул тарбия бувсса спортсменталгу.
ХьхьичIунсса кIанттурду бувгьусса оьрчIру хъанахъиссар МахIачкъала шагьрулул спортрал «Полет» цIанилусса школалул тарбиялувтал. Шиккува кIицI лаган, уттинингу Зураб Кирамуттиновичлул тарбия буллалисса оьрчIру цимилгу ххув хьуссар личIи-личIисса бяст-ччаллай.
МедаллачIату шаттирал манзилданий ливчIун, пьедесталданий бацIансса ца часса тIайлабацIу биял къавхьуну, вай бяст-ччаллай 5-сса кIанттурду бувгьусса оьрчIавух ур ГьунчIукьатIрал шяравасса Чартаев Шахмиргу. Ва чIава жагьил 6 бойрава 4-нниву ххув хьуну ур.
Мукунма вай бяст-ччаллай ва аьрххилий бивкIсса лакравух кIицI лаганну ГьунчIукьатIрал шяравасса судья Чартаев ХIабибуллагьлулмур цIагу.
Орел шагьрулийнсса аьрххилия Зураб Аьлиев укун буслай ур:
– Вай хъанахъиссар жулва билаятрал бур учинсса каруннай биюлт гьуртту хъанахъисса ца бунияласса бяст-ччаллуну. Вайннуйн хIадур хъанай жул шин шайссар. Вайннуйн хъар хъанахъиссар жулва спортсментал Аьрасатнал сборнайлувун багьаву. Укун, вайннул хIасиллайн бувну, жула 2 спортсмен агьссар агьаммур сияхIрайн, 2 – резервныйлувун. Уттинин, тIайламур бусан, укунсса хIасиллу къархьуссар: Дагъусттаннал цачIундур командалул 2 мусил, 2 чарвитул медаллу ларсъсса. Ванияр хьхьичIсса соревнованиярттай дукIу, масалдаран, ванияр хъуннасса команда дунугу, ларсъссар 1 мусил, 1 арцул медаллу. Ва бакъассагу, цIанами бяст-ччаллай жула 4 оьрчIал бувгьунни 5-сса кIанттурду. Вагу ххуйсса хIасилли. КIушиврул ца-ца категориялуву бия 40-45-хъул язисса спортсментал, ва хъинну хъуннасса конкуренцияр. ХьхьичIунсса кIанттурду бувгьуминная къатIий, укунсса бяст-ччаллай анжагъ гьуртту хьушиврулгума чIалачIи буллалиссар спортсменнал лавайсса даража. Шиккун агьаншиврул оьрчIан цикссагу шачIантту лахъан багьайссар. Цал регионналулмур лагрулий цува чIалачIи уван аьркинссар, призертурал «тройкалувун» агьну, яла Ухссавнил Ккавкказуллал Федерал Округрай хьхьичIунминнавух хьун, Щалагу Аьрасатнал даражалийсса турнирдай ххув хьун ва вай цимурцаннуя махъри вай бяст-ччаллай гьуртту хьунсса ихтияр дулайсса. Жулва оьрчIал гьакссагу хIарачат бувунни, гьарцаннан тIайлабацIу къахьурчагу. Шикку ххув хьусса оьрчIру гьуртту хьунтIиссар дунияллул лагрулийсса бяст-ччаллай. ТIайлассар, цIанасса бигьа дакъасса тагьаргу хIисаврайн ларсун, цаппарасса бяст-ччаллу махънин бичлайгу бур. Умуд бур ччясса чIумуву дуниял паракьат хьунссар тIисса, – тIий.
Шиккува бусан, Орел шагьрулийсса бяст-ччаллай мусил медальлу ларсъсса Далгат ХIажиаьлиев гьуртту хьунтIиссар май зуруй УзбакIнаву, Бухара шагьрулий, хьунтIисса Дунияллул первенствалий, Сайгид Багилов тIурча, – Белоруссиянаву, Минск шагьрулий Европанал первенствалий.
ТIайлабацIу зун, дагъусттаннал, лакрал жагьилтал, оьрмулувугу, спортравугу.