Февраль зурул 15-нний, Авгъаннава совет аьрал буккан бувну 33 шин там шаврин хасну, Гъумучиял школалий «Жагьилтал экстремизмалийн ва терроризмалийн къаршину» тIисса цIанилу дирхьунни «Чувшиврул дарс».
Ватандалухсса ччаву загьир даврил, интернационалист-талаталтрал аьпа буруччаврил цIанийсса мероприятие хьунни хъун хъанахъисса ник ватан ххирану тарбия даврин хас дурсса программалул лагрулий.
Цувгу сакин дурну дия Магьирлугърал, жагьилтурал иширттал, спортрал ва туризмалул центрданул Гъумучиял школалущал цачIуну.
Чувшиврул дарсирай гьуртту хьунни райондалул администрациялул, Лакрал ва Ккуллал районнал аьрали комиссариатрал зузалт ва Авгъаннавусса дяъвилий гьуртту хьуми.
Микку ихтилатру бувсса Лакрал ва Ккуллал районнал аьрали комиссар ХIасан Масуевлул, призыврал отделениялул каялувчи Ажуб Юсуповлул, кIирагу райондалул Авгъаннаву талай бивкIминнал союзрал хъунама Аьвдулгъапур Оьмариевлул, Гъумучиял школалий тарихрал дарсру дихьлахьисса Эльмира Хъунбуттаевал бувсунни Авгъаннавусса дяъвилия, тикку жула ватанлувтурал дурсса чувшивурттая, авгъаннал агьалинан билаят ччаннай бацIан бан бувсса кумаграя. КIицI лавгунни чIявусса солдатнан Авгъаннавусса дяъви хьушиву духIан захIматсса хIасратну, миннал ниттихъан тIурча дард-хажалатну.
КIицI ларгунни Авгъаннаву интернационал бурж лажин кIялану лавхъсса ватанлувтурал цIарду. Лакрал ва Ккуллал районная Авгъаннаву талай ивкIун ур ряхцIалаксса жагьил.
Муния махъ ккаккан дурунни авгъаннал иширттан хас дурсса видеоролик. Дуклаки оьрчIал дурккунни авгъаннаву талай бивкIминнан хас дурсса назмурду. Интернационал талаталтрал аьпалул кьинилун хас дурсса мероприятияртту хьунни райондалул цаймигу школарттай.