ЦIу лещан дувултрал касму бучIир хIисав дуван спортсментуралмунивух. Циван учирча, нажагь цIу дагьний, цамур иш хьуний, вайннангу багьлай бур зирангну цала даву дуллан.
Дагъусттаннал МЧС-рал гьарца шинах бувай цIу лещан дувултрал частирдал зузалтрал дянивсса бяст-ччаллу, конкурсру. Ми бикIай теориялул зумунуссагу, практикалул иширттайнуссагу. Ми конкурсирттавух муданмагу гьуртту шай Ккуллал райондалийсса частьрал зузалт. ДукIусса шинал ахирданий вайннан дуллуну дур, ми конкурсирттаву ххув шаврил хIисав-сан дурну махъ, мукьра зава. Буслай ур Ккуллал райондалул цIу лещан дувултрал частьрал хъунама Къудуев Зайнуллагь:
– Цалчинмур кIану бувгьуну увкIунни Руслан МахIаммадов, 2-мур кIану бувгьуну увкIунни Кьурбан Мутаев «Яла ххуйма водитель» тIисса номинациялий. «Отделениялул яла ххуйма командир» тIисса номинациялий 2-мур кIану бувгьунни Жабраил Кьулчиевлул. Аьмну Ккуллал райондалул цIу лещан дувултрал частьрангу буллунни, Дагъусттаннал циняв частирдал дянивсса бяст-ччаллу хIисавравун лавсун, 3-мур кIану.
2019-ку шиналгу жул, 32-мур цIу лещан дувултрал, частьран буллуссия «Нива-Урбан» тIисса чIиви машина.
Жувагу чIа учинну укунсса, тIирхъасса, цала касму магьирну кIулсса, зузалтран цIуллушиву, ххари-хъиншивуртту!