![](https://ilchi.info/wp-content/uploads/2022/01/shaipova_ajza.jpg)
ЦIуссачIурттащиял 1-мур школалий 11-мур классраву дуклакисса Шаипова Айзал хьхьичIунсса кIану бувгьунни Щалагу Аьрасатнал литературалул олимпиадалий.
Январь зурул 13-нний Дагъусттаннал педуниверситетрал филологиялул факультетрай хьунни 9-11-ми классирттал дуклаки оьрчIал дянивсса Щалагу Аьрасатнал литературалул олимпиадалул региондалиймур ятIап.
Шикку гьуртту хьунни щалагу Дагъусттаннаясса 100 дуклаки оьрчI.
ЦIуссалакрал райондалия олимпиадалий гьуртту хьун бувкIун бия ЦIуссачIурттащиял школалиясса кIива дуклаки душ – Айза Шаипова ва Алжана Жамалуттинова. Олимпиадалул хIасиллайн бувну, Айза хьхьичIунсса кIанттурду бувгьуминнавух бур.
– Олимпиадалий ххуйсса ккаккияртту чIалачIи дан ттун мадара хIарачат бан багьунни. Ттула учительнащал на хьхьичIсса шиннардил олимпиадарттай диркIсса заданияртту дуллай бивкIра, буккав чIявусса луттирду, интернетраву ххал дав олимпиадарттай дикIайсса заданияртту. Ми бигьасса дакъая, – тIий бур Айза.
ДакIнийн бутан, дуклаки оьрчIал дянивсса Щалагу Аьрасатнал олимпиада дуллалиссар гьунар бусса, итххявхсса оьрчIру ялун личин баву ва ми хьхьичIунмай бан кабакьу баву мурадрай. КIицI лаган, олимпиадарттай лавсъсса дипломирттал ихтияр дуллалиссар дуклаки оьрчIахьхьун мукьра шинай экзаменну къадуллуна олимпиадалул профильданийсса Аьрасатнал ччимур вузравун буххан.
![](https://ilchi.info/wp-content/uploads/2022/01/hadizhat_magomedova.jpg)
Гьамиящиял 2-мур школалий 9-мур классраву дуклакисса Ххадижат МахIаммадовал хьхьичIунсса кIану бувгьунни Щалагу Аьрасатнаву нанисса дуклаки оьрчIал дянивсса оьрус мазрал олимпиадалий.
Январь зурул 14-нний хьунни Щалагу Аьрасатнал дуклаки оьрчIал дянивсса оьрус мазрал олимпиадалул региондалиймур ятIап. Шикку гьуртту хьунни Щалагу Дагъусттаннаясса 9-11-ми классирттаву дуклакисса 95 оьрчI.
Олимпиада хьунни Дагъусттаннал университетраву. ЦIуссалакрал райондалия олимпиадалийн бувкIун бия Гьамиящиял школалий 11-мур классраву дуклакисса Зураб Сулайманов (ларгсса шиналсса олимпиадалий хьхьичIунсса кIану бувгьусса) ва 9-мур классраву дуклакисса Ххадижат МахIаммадова. Олимпиадалул хIасиллайн бувну, Ххадижатлул бувгьунни хьхьичIунсса кIану.
– Ларгсса шинналминнух бурувгун, гьашинусса олимпиадалул заданияртту захIматсса дия. Дия школалул программалувун къадухлахиссагу. Амма мигу, ххуйну пикри барча, дан къашайсса дакъая, – тIий бур Ххадижат.
ДакIнийн бутан, январь зурул 11-нния байбивхьуну, февраль зурул 25-ннийн бияннин, 24 дарсирал олимпиадарттай дуклаки оьрчIал ккаккан бантIиссар цала кIулшивурттал даража.