ЦIубутIуй жула халкь нигьа бувсун бия прививкартту дан. Амма чIумул чIалачIи бунни чаран цамур бакъашиву. Цала цивппа бурувччуну, личIлулну бикIан багьлай бур инсантуран, хаснува иммунитет хьхьараминнан. Прививкалул най дуна цIакь къадувайссар иммунитет. Му дурсса чIумалгу цIуллу-сагъшиврул хьхьарасса инсантуран чIявусса халкь бусса кIанттурдая архну бикIан аьркинссар.
Пишакартурал бусласимунийн бувну, вакцинация дурсса инсантурайнгу бюхъайссар азар диян, амма ми захIматсса тагьарданухун къабагьайсса бур, оьрмулуцIа къашайсса бур.
Мунияту ттунгу оьвчаву дан ччива жула шагьрулул агьалинайн: зулагу, зула гъан-маччаминналгу цIуллу-сагъшиву дуруччаву мурадрай, дувара прививкартту.
КьатIув буккайни лаххияра маскарду, дуруччияра марцIшиву. Вай тIалавшиннарду щаллу дарча, зу мюхчан хьунтIиссару зувагу ва мюхчан бантIиссар зула гъан-маччамигу, лагма-ялттумигу.
ЦIуллушиву дулуннав!
Ширин ХIажиева, ДГУ-лул журналистикалул отделениялул магистрант
