Снайдердун нахIу дирзун дия Дагъусттаннал дукрарду

Декабрьданул 6-нний Дагъусттаннал БакIчи Сергей Меликов хьунаавкьунни лачIунбуккаврил Олимпий чемпионтал Аьбдурашид Сяъдуллаевлущал ва Кайл Снайдердущал, мукуна Турциянахлу уклакисса ингушнал лачIунукку Залимхан Картоевлущал.

Республикалул каялувчинал миннахь барчаллагь кунни Дагъусттаннайн бучIаврихлу. «ТIааьнну бур кIицI лаган, цIанасса ппурттуву­сса пан­демиялуцIун дархIусса захIмат­шивурттахгу, ссуссукьушивурттахгу къабурувгун, зуща жучIан бучIан бюхъаву. Гьалбатта, на ххарира бяст-ччаллаву муттаэталну хъанахъисса спортсментал укунсса чIумал хъин­сса дусталну личIаврий», – кунни Сергей Меликовлул.
Аьбдурашид Сяъдуллаевлул дакIнийн бувтунни Владиккавкказрай бяст-ччаллал чIумал Кайл Снайдердуйн оьвкуну бивкIшиву Дагъусттаннайн. «Та чIумал Снайдердул бакIрайн лавсуна жула республикалийн учIан», – кунни Сяъдуллаевлул.
Кайл Снайдердул Сергей Меликовлухь барчаллагь кунни ненттабакI тIивтIуну кьамул аврихлу. Хъамаличувнал бувсунни ялунайгу учIантIишиву Дагъусттаннайн цалва кулпатращал, ганин Дагъусттаннал дукрарду дуллан лахьхьиншиврул.
Республикалул каялувчинал Снайдердухь тавакъю бунни Да­гъусттаннайн ччя-ччяни учIаван, зунттал билаятрал ххаллилшивурттащалгу кIул хьуншиврул.