Ноябрь зурул 22-нний Лакрал театрданул залдануву хъунна­сса уттарашинна дия. Агьали бавтIун бия Дагъусттаннал халкьуннал шаэр, прозаик, публицист, жяматийсса ишккакку, ДР-лул культуралул лайкь хьусса зузала, Шолоховлул премиялул лауреат, ДР-лул ПаччахIлугърал премиялул лауреат Космина Исрапиловал юбилей барча дуван.

Мажлис усттарну бачин був­ну бия Дагъусттаннал хал­­кьу­н­нал артистал Аслан Ма­хIам­мадов ва Саният Рамазанова. Да­гъусттаннал Чичултрал союзрал председатель МахIаммад АхIмадовлул, барча бавурттал хъиндайдихьу дуллай, цала ихтилатраву кIицI лавгунни Косминал творчествалул дагъус­ттаннал литература гьаз дувавриву биялсса бутIа бивхьушиву ва ванил юбилейгу республикалул культуралул оьрмулуву агьамсса ишну хъанахъишиву. МахIачкъалаллал шагьрулул собраниялул председатель Марис Илиясовлул Косминан дуллунни шагьрулул собраниялул чулухасса ХIурматрал грамота. Косминал творчествалия ва оьрмулул ххуллия бувсуна «ЦIубарз» журналданул редактор, чичу, аьлимчу Хизри Илиясовлул. Мариян Илиясовал «Дараччи» фонд хIасул бувния шинмай Космина фондрал чIарату хIура къавхьу­сса, мудангу хIала-гьурттунувасса инсан бушиврий чIурчIав дурунни фондрал президент Гульшан Хасаевал. Да­гъусттаннал Музыкантътурал союзрал цIаниятусса ХIурматрал грамота дуллунни Хан Башировлул. МахIачкъалаллал «Россия – моя история» паркрал директорнал хъиривчу, тарихрал элмурдал доктор АхIмад Кьурбановлул, Шахьуйннал шяраваллил жяматрал цIанияту Космина барча буллай, кIицI лавгуна шяраваллил жямат мудангу пахрулий бушиву, Дагъусттаннай бакъагу, Аьрасатнал цайми регионнайгу Косминал творчество кьиматрай душиврия. Дагъусттаннал Хъаннил союзрал хъунмур Интизар Мамутаевал барчаллагь увкуна Космина Хъаннил союзрал къайгъурдавугу гьуртту хъанай бушиврухлу. Поэтесса барча буван сахIналийн бувккуна философиялул элмурдал доктор Асият Буттаева, политикалул элмурдал доктор Марзижат Буттаева, «ЧIавалачин» журналданул редактор Сиянат ХIажиева ва цаймигу.
Мажлисрай дурккуна Москавливсса Дагъусттаннал Культуралул центрданул Президент Арсен ХIусайновлул цIаниятусса барча буллалисса телеграммагу: «Косминал цIа абадлий цIакь хьуссар лакрал ва Дагъусттаннал халкьуннал рувхIанийсса культуралуву. Ванил дакIнийхтунусса, аьчухсса ва аьдилсса литературалул произведенияртту куртIсса пикрирдал ва яргсса лишаннал вибувцIуну бур, вайннуву буттал кIанттухсса ччаву ва миллатрал бучIантIимунил ялувсса хъунна­сса дакI цIуцIаву дур»,– тIий бия телеграммалий.
Лакрал театрданул коллективрал хIадур дурну дия ххуйсса программа. Усттарну, асар хьунну ккалай бия Косминал назмурду. Экьинай бия Косминал му­къурттийсса балайрду. Театрданул артистурацIун мажлис чIюлу бувна Жанна Кьурбановал балайрдалгу.
Косминал цилагу бувккуна бюххансса шеърирду. Ахирданий ванил барчаллагь увкуна лавай­сса даражалий мероприятие дуван­сса хIарачат бувсса Лакрал театрданул коллективрахьгу, чIарав бавцIуцириннахьгу.