Советрал батIаврий ххал бивгьунни 2030-ку шинайннин ДР-лий дуккаву ляду­ккан даврил концепциялул ва республикалул дуккаврил сакиншиннардаву тарбиялул давур­тту дачин даврил хIакъиравусса ма­съалартту.

БатIаврий Сергей Меликовлул баян бунни 2022-ку шин Дагъусттаннай Дуккаврил шин хъанахъишиву.
Республикалул каялувчинал тIимунийну, республикалул паччахIлугърал политика­лул дуккаврил лагрулувусса гьануми задачарттавусса цану личIлай бур инсантал дуккаврил ихтиярдал щаллу баву, дуккавугу дикIан аьркинсса дур лавайсса даражалул.
МуницIунма Дагъусттаннал БакIчинал бувсунни дуккаврил ххуллийсса диялдакъашивур­ттаятугу.
Сергей Меликовлул тIи­му­нийну, агьамминнун ккаллину дикIан аьркинну дур миллатирттал мурадру лябуккан буллан тIайла дацIан дурсса элмийсса проектру. Цинярда приоритетирттал мурадну хьун аьркинну бур агьалинал оьрмурдал даража лахъ баву.
Сергей Меликовлул бувсунни аьркинну бушиву лябуккан буллан жагьилтал дуккаврихун ва элмулухун бичинсса чаранну. Жагьилсса ник дуккаврихун машхул шаву мурадрай, гьашину, июньдалий, республикалул каялувчинал къулбас дурну дур ДР-лул грантирттал дуцин гьарза даврил хIакъиравусса ХIукмулий. Мукунма хIукму хьуну бур студентътуран ва аспирантътуран стипендияртту гьаз буван ялун нанисса шинал январьданий.
Дагъусттаннал дуккаврил ва элмулул министрнал буржру биттур буллалисса ЯхIия Бучаевлул бавтIми кIул бунни 2030-ку шинайннинсса ДР-лул дуккаву лядуккан даврил Концепциялул проектращал.
Министрнал бувсунни ду­ккаврил иширттавусса циняв захIматшивурттая ва ми духлаган дувансса ххуллурдая. ЯхIия Бучаевлул тIимунийну, школар­ттаву 3 чIумуйсса дуккаврил низам духлаган даншиврул, пландалий ккаккан бувну бур республикалий буван уттигу 105 школа. ЦIанасса ппурттуву региондалий бур 598 школа, ми циняв бакьин буван багьлай бур.
Советрал батIаврий хьхьи­чIунну зузисса аьлимчунан ва хъинну дуклакисса оьрчIан дуллунни наградартту.