Ноябрь зурул 6-нний, ххуллункьини, «Анжи-Ареналий» Да­гъусттаннал халкьуннал художник, ДР-лул ПаччахIлугърал премиялул лауреат, скульптор МахIаммад-Аьли Аьлиев увсса кьинилун хасну тIивтIунни ванал цIанийсса цIусса АРТ-галерея.

Шикку гьуртту хьунни АьФ-лул ПаччахIлугърал Думалул депутат Хизри Абакаров, ДР-лул БакIчиначIасса Хъунисриннал советрал председательнал хъиривчу Сиражуттин Ильясов, политик Деньга Халидов, ДР-лул Промышленниктурал ва ишбажаранчитурал союзрал президент Анварбаг Кьадиев, «Пять сторон света» школалул гьану бивзсса ХIусайн Магомаев, ДР-лул халкьуннал артистътал Хан Баширов, МухIсин Камалов ва цаймигу.
Мукунма мажлисрай гьур­тту хьун бувкIун бия Москавлиясса ва дазул кьатIувсса хIукуматирттаясса хъамал.
Жагьилсса художниктурал творчество машгьур даву мурадрайсса галерея тIитIинсса кабакьу бувну бур Хизри Абакаровлул. Галерея тIивтIусса кьини тамашалий бивхьуну бия жагьилсса художниктурал давуртту цачIун дурсса цалчинсса экспозицияртту.
– Галерея тIитIин хIадур хъанахъисса гьантрай, на хъинну буруккинттарай ивкIра, хьунавав ва даву цил багьайкун дузрайн дуккан дан тIий. КIицI лаганна галерея тIитIин хъунмасса кумаг бувшиву Хизри Абакаровлул. ЦIусса галерея бикIан аьркин­ссар, республикалул художниктуран бакъассагу, Аьрасатнал ва чил билаятирттал художниктуран цачIусса. Му бакъа­ссагу, ва тIитIаврийн бувну, жула художниктурал творчествалул опыт Аьрасатнал регионнал ва чил билаятирттал галереярттащал кIибачIинсса сант ххишала хъанахъиссар, хIасил, гьарта-гьарза хъанахъиссар искусствалул дазурду.
Утти цIусса галереялуву искусствалул, творчествалул гьунарду ккаккан бан ихтияр ду­ссар Дагъусттаннал художниктурахь. На ттула оьрмулуву лархъссар бигьа дакъасса лахъазанну. УзбакIнаву, Аьрасатнаву ва Дагъусттаннай ттул захIматран бивщуссар лайкьсса кьимат. Мунийн бувну, ттун дакIнийхтуну ччай бур жагьил­сса художниктурал творчество машгьур дан, гьунар бусса художниктал аьлтту бан ва миннал чIарав ацIан,– увкунни МахIаммад-Аьли Аьлиев­лул.
Сиражуттин Ильясовлул кIицI лавгунни МахIаммад-Аьли, Дагъусттаннай акъассагу, Аьрасатнаву ва дазул кьатIув машгьурсса скульптор ушиву, Дагъусттаннал, УзбакIнал ва Аьрасатнал искусствалул тарих авадан бавриву хъунмасса бутIа бивхьушиву.
Галереялуву тIиртIусса цал­­чинсса выставкалий бур МахIаммад-Аьлил, цала зумуну, лавайсса даражалий був­сса композитор Мурад Къажлаевлул бюст. Мукуна ва хъанай ур ПартIу-ПатIимал, Расул ХIамзатовлул, АхIмад-Хан Султаннул, АьвдурахIман Данияловлул, Низами Гянджевил ва цаймигу машгьурсса инсантурансса ххаллилсса бюстирдал автор.
Выставкалий мукунна дия ттизаманнул Дагъусттаннал художниктурал – Закарья Закарьяевлул, ПатIимат ХIусайновал, МахIаммад Моллакаевлул, Юсуп ХанмахIаммадовлул, ХIабибуллагь ХIайбуллаевлул ва цайминнал давуртту. Му бакъассагу, итабавкьуну бия выставкалий гьурттушинна дур­сса художниктурал творчествалул буклет.
Ахирданий бусравсса хъамал ва интеллигенция, цачIун хьуну, жапрай бия ссупралух.
ЧIал къавхьуну Арт-гале­реялуву дикIантIиссар байбихьлахьисса ва цIа ларгсса художниктурал давуртту. Вайннун кьимат бищун ва тамаша бан учIан бюхъайссар ччима инсаннаща. КIулну бикIаншиврул, галереялувун бучIавугу уквассар.