Ноябрьданул 17-нний Дагъусттаннал БакIчи Сергей Меликов гьуртту хьунни «Субъектру электроэнергетикалул ва ЖКХ-лул объектру кIинтнил чIумуйн хIадур шаврил хIакъираву» тIисса масъала ххал бигьлагьисса батIаврий. БатIаву хьунни Москавлив АьФ-лул энергетикалул министр Николай Шульгиновлул каялувшиврий.
БатIаврий цаппара регионнал каялувчитурал бувсунни цалва субъектирттай кIинтнийн цукун хIадур хьуну буссарив.
Дагъусттаннай му масъалалул хIакъираву ихтилат бунни республикалул каялувчи Сергей Меликовлул.
Дагъусттаннал БакIчинал тIимунийну, республикалул электросетирдал комплекс къаххуйсса тагьарданий бур: 60-70-ку шиннардий бувсса электросетьру ва подстанцияртту бух бувккун бур сайки 70 %. Аьрасатнал Минэнерголул дурсса анализрал чIалачIи бувну бур 2018-ку шиная шинмай СКФО-рал регионнай сияхIрайн лавсун бушиву чIявусса халкь чани бакъа ливчIсса 35 иш, миннувату 27 иш хьуну бур Дагъусттаннай.
Ми ишругу хIисавравун лавсун, «Россети Северный Кавказ»- «Дагэнерго» ПАО-лул хIадур дурну дур кIинтнийн хIадур шаврин дуван аьркинсса давурттал программа. Сергей Меликовлул гьартану бувсунни цукунсса давуртту дуллай буссарив республикалий энергетиктурал, хаснува МахIачкъалалив, Къизилюртлив ва ЦIунтIиял райондалий.
Республикалул каялувчинал бувсунни Дагъусттаннай 2021-2024-ку шиннардий коммунал инфраструктуралул объектру цIубуккан баврил программалул хIакъиравугу.
