Асият Раджабова, 3 оьр­чIал нину:
– Ца шинал хьхьичI на вакциналийн ца яла къаршимур ва ттуйнмагу, ттула мачча-гъаннайнгу му бан рязи къахьунтIишиврийн мукIрумур бухьунссияв. Вакциналия бав-бавми хавардайнгу вих хъанай.
Яла оьрмулул цила кка­ккан бунни ттунгу, ттул уссур-ссуннангу ва оьсса азарданущалсса ччалаччаву жунна ххирану дарцIушиву. Ларгсса кIинттул, цаннал хъирив ца азарханалийн багьну, нинугу, ппугу яла лавгун махъ, бувчIунни ттущава итххявхсса гъалатI. ЩихьчIав вичIигу къадирхьуну, ттула бугьара­сса нитти-буттахь вакцина бан маслихIат банссияхха тIий бура. Аллагьу Тааьланал цучIав ва дунияллий итайсса аьдат дакъар, амма, кIира нюжмар ляхну, цаннал хъирив ца нинугу, ппугу лагаву хъинну кьурчIину бур. Ласгу къашавай хьуну, азарханалий захIматну ­уссия. Мунияту кулпатраву вакцина цалсса на ва ттула студентсса душнил барду.

Рукьижат Абакарова, ишбажаранчи:
– ДукIу кIинттул му ­оьсса азарданул къабувгьуссания, мунил ттуллагу, ттула ласналгу цIу­ллу-сагъшиврийн биян бувсса заралдания къакIулну ва къюкIну нагу бикIанссияв вакциналийн вихшала дакъа. Вакцинагу бувну, дакI паракьатну хъиннихха ттуршийлагу, азарханалийн багьаяр. Яла агьалинавугу бакъасса журалул хаварду бакъар, азарханардай халкь литIлай бур, даруртту биялну бакъасса бур, ургъил-аякьа дакъасса дур тIисса. Куклусса хаварду чансса бакъар яла вакциналул лагма-ялттугу. Бизарда гьарнал тIимуния ва лагмава хъанахъимуния. Ва азар дух дан бювхъусса чIун дуркIун ччива, яла щихчIав вичIи дихьлансса, гьарнал тIимунихгу къулагъас дуллансса хIалгу, гъирагу бакъар.

Анжелика Абачараева, Машиностроениялул ва сервисрал колледжрал преподаватель:
— На дував вакцинация нава рязину. На пикри бав, гьар мудангу лахъай азарду прививкарттай хъин дуллай бивкIун бур, ковидгу мукунна дух дан багьлай бухьунссар куну. Ялагу, ттул ичIува бур бугьарасса нину-ппу. На нигьачIи бияв нава сававну вай къашай къахьун. Оьвкуна Москавлия душнилгу.
– Щалагу дунияллий дуллай бур прививкартту, Дагъусттан дянивмур аьсрулий яхьуну бу­ссаксса иш бур, – тIий, дан аьркиншиву буслай бия.
На дував кIира ятIапрай дай­сса, Спутник V прививка июль — август зурдардий. Ва вайминнуяр ххишаласса чIумуй – кIира шин ва дачIиннуй диянтIиссар увкунни хIакиннал. Мунияту лахъисса чIумуй дияймур дан пикри хьунни.

Ххадижат ЦIаххаева, Москавуллал Муххал ххуллул азарханалул ПЦР лабораториялул зузала:
На цалчинмур щатIи бивщу­сса чIумалва къашай хьунав ковидрал. Хъинну захIматсса тагьарданий буссияв. На даврийн бувксса чIумал дахьва бувккун бия вакцина, циняв булувкьуну прививкарду дуллай бия, нагу дур­ссия. ЧIявусса инсантал кьатI бунни ва лавмартсса азарданул, вания бурувччуну бикIаву мурадрай, вакцинация дан аьркинну чIалай дур ттун. Гьай-гьай, прививка даннин ххал дан аьркинни инсаннал цIуллу-сагъшиврул тагьар, къабучIи буллалисса кIанттурдувагу бакъарив кIул бан. ХIакинтурал тIутIимунийн бувну, вакцинация дурсса инсан къашавай хьурчагума, захIматсса тагьарданувун къаагьан тIий ур. Вакцинация дулларча, къашавай хъанахъими чан хьун тIий бур.
Цинявннахьхьун цIуллушиву дулуннав, хъинмур чивчуну ля­къиннав.