Вай гьантрай ЖКХ-лул объектру кIинтнийн хIадур байсса шагьрулул оператив штабрал заседание хьунни ЖКХ-лул ва энергетикалул министрнал бигарду биттур буллалисса Ризван Мурадовлул каялувшиннаралу. Шикку гьуртту хьунни Госжилинспекциялул каялувчи Сергей Касьянов, МахIачкъала шагьрулул муниципал управлениялул вакилтал.
Шагьрулул объектру кIинттулнин хIадур бан бакIрайн лавсъсса идарарттал вакилтурал бувсунни ГИС ЖКХ-лул ва Республикалул Госжилинспекциялул графикрай ккаккан дурну диркIсса давуртту дузрайн дуккан дуршиву.
Шагьрулун кIинттулсса чIумуйн хIадуршиву тасттикь буллалисса паспорт буллуну бунагу, заседаниялий кIицI ларгунни уттигу ялув бацIан ва бакIуйн дуккан дан аьркинсса цикссагу диялдакъашивуртту лирчIшиву. Исват хьунни, инсантурал буллалисса аьрзирдайн бувну, хъунмурчIинсса масъалартту чIяру зивурду дусса къатравусса коммуникациярттацIун давхIусса душиву.
«Аьмну хIисав дурну, вай идарарттал шагьру кIинттулнин хIадур буллай дурссар чIярусса давуртту. Амма уттигу ялув бацIан аьркинсса тамансса диялдакъшивуртту лирчIун дур. Инсантал кIинттул чIумал цала ужагъирттай гъилину ва паракьатну ялапар хъананшиврул, анаварсса мутталий вай масъаларттугу дузал бан аьркинссар»,– увкунни Ризван Мурадовлул.
Ахирданий бунни вай объектирдай зузисса хасъсса идарарттал биттур бан аьркинсса амрурду.