Маршруткардахсса багьри:
Ростов-на-Дону – 18 къ.
Краснодар – 18 къ.
Ставрополь – 16 къ.
Астрахань – 15 къ.
Грозный – 15 къ.
МахIачкъала – 14 къ.
Владикавказ – 12 къ.
Назрань – 10 къ.
Зулайхат Тахакьаева
Сайки зурул хьхьичIва був­ккуна декабрь зурул 1-нния тинмай маршруткардал багьа лахъ бан най бур тIисса аваза. Му кьини ца маршруткалий нанийни ларсунни 14 къуруш, цамуний – 17 къуруш. Маршруткардал багьа ттигу цалий къабавцIуссар тIий бия. Хъиривмур кьини ттун багьуна Лакрал театрданущал Ухссавнил АьсатIиннавун гьан.
Цайми шагьрурдайнсса аьр­ххилия, дахIалай тайнначIасса низам, марцIшиву, хьувивав жучIарагу мукунсса низам тачIаврагу, тIисса пикрирдащал зана шара гьар мудан. Ва хху­л­лухгу мукунма. Владикавказрайн на цалчин лавгссара 12 шинал хьхьичI. Тара лащин яхьуну дия хIакьинугу. Дуллай бур тийхгу цIу-цIусса къатри, амма мунийну шагьрулул архитектура зия дуллай бакъар, яла-ялагу цавагу мурхь, цавагу къатIа кьувкьуну бакъар. Щюллишиврул хIурмат буручлай бур. Цавагу чагъарданул касак, цавагу семечкалул ккири итталунгу къабагьунни. Ччюрк дичайсса къуршал лагмахаллугу кIюрххилгу бия пIяй-пIяй тIийнма, гьанттайнмайгу. Яла-ялагу нава мяш хьунсса иш шагьрулувух жяматрал транспорт саргъунну заназавур. Бакъассар жучIава кунмасса пробкарду га яла «час пикрал» чIумалвагу.
Тиха зана хьунсса мугьлатвагу бакъа зия шай дакI – заназу цIунилгу ччюркливун бахьлавг­сса кIичIирттавух, бух шаврил къяркIа тIисса маршруткардай. Мури вил кьисмат! Вай махъру ккалаккийни бюхъай цаппарасса буккултрал ттуйн «къуш оькки бай ккаччи бура ина» куну, ссуггума дан. Дарча дувача.
Шанма гьантлийсса аьрххилиягу зана хьуну, ичIуваминнахь хьхьичIва-хьхьичI цIуххав маршруткардая. Зурул ахирданийннин тава багьа личIлачIиссар, увкунни. Бигьалагай гьантрай кьатIушав буккангу къабагьунни. Итни кьини бавчура даврийн, остановкалий — лухIи кьини халкьуннал. Найбунува щак багьунни маршруткардал шофертал забастовка дурну бушиврийн.
ТIайламур бусан, маршруткардал багьа лахъ буллалиссар увкукун, личIисса авара къадурссия. КIугу-кIулссия лахъ бантIишиву, бензин ххира хьуну бухьувкун. Налогругу шиная-шинайн лахъ дуллай дакъарив. Дагъусттаннай забастовкарду дуллай, цалвамур бацIан бан бюхъайсса контингент дурагу цар дусса — маршруткардал шофертал. Миннаща бюхълай бур. ПаччахIлугърал давурттай зузиминнащарив, маршруткарду бакъар куну, шаппа щябикIан хъанай бакъар: «Къаччай урав мазузра, хъунисса харжру буний зун насияра», — учин най буну тIий жухьва. Цуксса цавува цивппа рязи бакъа бухьурчагу, махъра-махъсса духьурчагу кIапIикI дуллуну, таксирдай гьан багьай давурттайн, хIатта яла мюрщими харжру ласласисса детсадирттал тарбиячиталва. Маршруткарду къазузийни таксирдангу давран шай, муссят лахъ бай багьа. «Зулгу иман дакъар, жулгу чара бакъар». Мунияту маршруткарду ххира бувну бур тIий цIуру-кIуру байссагу къаикIай, ччайнугу, къаччайнугу кьамул дай миннал тIалавшиннарду. Амма маршруткардал багьа лахъ бан къабитлай сукку шай чиновниктал, «простойсса» агьалинай аьтIий. Ва базилухгу хьунни мукунма. Жиплийх рищаву оьрмул-оьрмулухун духIан багьлагьисса (ихтилат так ца маршруткардал багьа лахъ баврия бакъар), мунийн ччянива вардиш хьусса «простойсса» агьалинал манеъшиву дакъая машруткардал багьа лахъ баврия. Амма маршруткардал шофертураллив агьалинал пикри бан аьркин­сса? Циванни Дагъусттаннай къабювхъусса цайми республикарттай кунна жяматрал транспорт ядан? Барчаллагь МахIачкъалаллал троллейбусрал управлениялун, цимилгу банкрот хьусса цалва идара ххассал бан бювхъусса. Бувагу бусса 10-15 троллейбусрай дарцIуну дия маршруткарду къазаназисса кьини. Амма хъинну ссибизлай бия, забастовка дуллалими шаппа-шаппа щякъабивкIун ягу шагьрулул майданнив къабув­ккун, троллейбусирттан ххуллу кьукьлай, остановкардай пробкарду буллалаврийн. Масалдаран, цIусса автостанциялул махIлалий маршруткардаха троллейбус ягу такси сукку бан шайсса иш бакъая. КIихсса зуманийра-зуманийсса остановкалия шагьрулувун заназисса машрутру чIярур: 4, 4 «а», 4 «б», 4 «к», 44, 45, 46, 18, 18 «а», 69 «а». Вайксса маршруткарду бяр хьуну бавцIусса кIанттайсса тагьар цукунсса дикIанссар. Сайки 20 минутI хьуна троллейбус сукку бан. Жяматрал транспортрая ябуцаврил, агьалинан остановкарду душиву хъамава бивтун бухьун­ссар, «бацIан ба» тIий пюрунтирттайх заккантту бишлашиссагу бия. ХьхьичI кьини мукун бацIан буллайгу бия. Амма дянивсса ва махъсса нузардива буклакиминнаву чан бакъая арцу къадуллунма лаглагиссагу. Ци чинну, дунил духлаглай дур жувурагу инсаншиву. Маршруткардал масъаламур ттигу ца чулийн бутан бувар. Гьай-балики, ля­къинхьуви «простойсса» агьалинай аьтIинал маршруткалул шоферталгу, агьалигу рязину личIансса чаран.