![](https://ilchi.info/wp-content/uploads/2021/09/butaeva.jpg)
Ларгсса нюжмардий Сербиянаву, Белград шагьрулий, хьуссар Аьрасатнал рувхIаний культуралул кьинирду. Тикку гьурттушинна дуллалисса Дагъусттаннал культуралул министр Зарема Буттаевал, «Аьрасатнал ва Сербиянал культуралул гьанур ххачпараснал дин» тIисса конференциялий, «Христианство в Дагестане: от истоков к современности» тIисса доклад бувунни.
Министрнал докладраву бувсун бур диннугу, миллатругу чIявусса жулла республикалий ххачпараснал дин ччянира цIакь хьусса душиву, Дарбантлив ва цаймигу шагьрурдай ци килисарду буссарив. Масалдаран, Шамиллул райондалийсса Датуна тIисса шяраваллил чIарав ххяллал каньондалий куртIну яхьуну бушиву 10-11-ми аьсрурдай бувсса ххачпараснал храм. Министрнал кIицI лавгунни хIакьинусса кьинигу ххачпараснал агьлу республикалий, цайми динну дуллалиминнащалгу бавкьуну, нахIуну ялапар хъанай бушиву, 1990 шиная шинмай Дагъусттаннай 8 храм ва часовня бувшиву, Къизлардайсса Георгий Победоносецлул собор цIу буккан бувшиву ва тиккува, Къизлардай, хъаннил монастырьгу бушиву. Бувсунни 2015 шинал Дарбантлив Дунияллул культуралул ва диннал тарихрал музей тIивтIушиву, тиккугу циняв диннал агьлу бавкьуну къуццу тIий бушиву.
Зарема Буттаевал ихтилат бунни конференциялул заседаниялийгу. Бувсунни Дагъусттаннал ва Сербиянал хIала-гьурттушиврийсса арарду цIакь даву мурадрайсса давурттив дуллан дакIний бушиву, Сербиянал творчестволул агьалинайн оьвкунни хъиривмур шинал МахIачкъалалив хьунтIисса «Горцы» фестивальданий гьуртту хьун. Бувсунни мукунма Дагъусттаннал творчестволул коллективругу Сербиянаву хьунтIисса «ЭтноФест Белград» тIисса фестивальданийн гьан буван хIадурну бушиву.