Ноябрьданул 21-нний Вихьуллал дянивмур даражалул школалий дунни хъунасса оьруснал шаэр Михаил Юрьевич Лермонтов увну 200 шин там шаврин хас дурсса литературалул вечер. Му хIадур дурну дия 6-мур классрал.

Вечерданий каялувшиву дуллай бия Вихьуллал школалул оьрус мазрал ва литературалул дарсирдал учительница Аьшаева Аьшура КьурбанмахIаммадовна. Дуклаки оьрчIал хорданий щаллу дурна Аьрасатнал гимн. Яла бувсуна Лермонтовлул оьрмулия. КIицI бувна чIивисса оьрмулий хъинну чIявусса произведенияртту чивчуну бивкIшиву шаэрнал, Пушкиннул хъирив нанисса, шеърирду чичаврил чулуха пагьмурду Аллагьнал буллусса шаэртал ми кIиягу ивкIшиву, Лермонтовлун Къапкъазнаву апатI хьушиву Къапкъазнал халкьуннан хъиннува кьувтIуну бикIайшиву. Бувккуна оьрчIал шаэрнал Къапкъазнан хас бувсса шеърирдугу, мукунма жулва лакрал шаэртурал лакку мазрайн таржума бувсса Лермонтовлул шеърирдугу. Увкуна ххуй-ххуйсса ганал мукъурттийсса балайрду. ОьрчIан укун ххуйну шаэрнал творчество кIулшиву гьай-гьай, хъанай бия вайннал учительница Аьшаева Аьшурал хIарачат. Хъинну ххуйну гьуртту хъанай бия оьрчIру ва давривух. ОьрчIал дурсса вечерданий бия школалул директорнал хъиривчутал ХIасанов МахIаммад-ТIагьир, Чаринов Оьма ва школалул учительтал.
Вечерданул ахирданий оьрчIал щаллу дуруна, лакрал гимн, МухIуттин Чариновлул 1914-ку шиналва чивчусса «Лакку кIану» тIисса балай. Вечер хIадур дурсса учительницахь ва оьрчIахь хъунмасса барчаллагь увкуна ХIасанов МахIаммад-ТIагьирдул.