Махъсса ппурттуву жулла республикалул шагьрурдай ва районнай, Дагъусттаннал БакIчи Рамазан АьбдуллатIиповлул бивхьусса бигарданийн бувну, тIитIлай бур Аьрасатнал халкьуннал аслийсса культуралул Центрду. Уттинин тIивтIуну бур 42 Центр. Уттигъанну Аьрасатнал халкьуннал аслийсса культуралул Центр тIивтIунни Каспийскалийгу.
Вай давуртту дуллалаврил агьамми мурадругу буркультуралул ва тарихрал ирс, халкьуннал канил касмурду ядаву ва машгьур даву, агьали миллатрал культуралухух гьан баву, махъа нанисса ник патриот зумуну тарбия даву.

Бадрижамал Аьлиева
Каспийскалий Аьрасатнал халкьуннал аслийсса культуралул Центр тIивтIунни «Дагдизель» Культуралул дворецраву. Му шадлугъравух гьуртту хьунни ДР-лул БакIчинал кумагчи Жамалуттин Оьмаров, ДР-лул культуралул министрнал хъиривчу, ДР-лул Культуралул министерствалучIасса Респуб­ликалул Халкьуннал творчествалул директор Марита МухIадова, «Город Каспийск» шагьрулул округрал бакIчи МахIаммад Аьбдуллаев, «Город Каспийск» шагьрулул округрал администрациялул бакIчи ХIури Пирсяидова ва чIявусса цаймигу инсантал.
Махъ лахълай, бавтIми Каспийск шагьрулул культуралул оьрмулуву хъанахъисса ва иширащал барчагу бувну, Марита МухIадовал увкунни:
— Жулла дур хъуннасса аваданшиву – культуралул ирс. Культура – му жулва бучIантIимурди. Жулла ляличIийссара къавтIавуртту, балайрду, аьдатру, янна-ка, музыкалул инструментру – вай цимурца, жулва ттаттахъал жуйнна ирсирай диян дурмур, дуруччин, никирая никирайн диян дуллан аьркинссар. Ва давривурив хъунмасса кIану бугьлагьиссар дукIуния шинмай жулла республикалул муниципал сакиншиннардий тIитIлатIисса Аьра­сатнал халкьуннал аслийсса культуралул Центрдал. Мукун­сса Центрду тIитIаву – му хъуннасса ккаккияр, куннал культура куннан кIулну душаврил кумаг буллалиссар жунма куннан кув бувчIин, нахIуну, бавкьуну ялапар хъанан, — увкунни Марита Велихановнал.
Каспийскаллал шагьрулул администрациялул Культуралул ва жагьилтурал политикалул управлениялул каялувчи Пайзанат Абачараевал бувсунни хъамаллурахь ЦентрданучIа зий бушиву ОьрчIал творчествалул центр, ОьрчIал технический творчествалул центр, оьрчIал эстрадалул школа «Моряна». Хъамал ялтту бувккунни ва идаралуву думунил, кIул хьунни Аьрасатнал халкьуннал аслийсса центрдануву зузисса студиярдал ва сакиншиннардил давурттащал, Ссихьрал «Солнышко» театрданущал, интернационал дусшиврул «Дом мира» клуб­ращал, ххал дунни выставка «Золотой фонд Дагестана».
Центрдануву яла-яла итталун багьлай бия хьхьичIара ичIура ишла дуллай бивкIсса кьай-кьуй, музыкалул инструментру, миллатрал лаххия дусса мурцIу. Стендирттай ккаккан бувну бия жулва халкьуннал хьхьичIавасса оьрму, багьу-бизу.
Аьрасатнавугу, Дагъусттаннайгу хьхьичIунминнувасса цаннин ккаллийсса Каспийскаллал художествалул школалул тарбиячитурал ккаккан дунни цалла дирхьусса суратру ва каруннил дурсса давурттив. Хьунни сурат дишаврил, бартбисуртту щащаврил, кIунулул ва цайми-цаймигу давурттал мастер-классру. Хъамаллурал хьхьичIун музыкалул программалущал бувккун, балай учаврил ва къавтIавурттал гьунарду ккаккан бунни «Ссалам», «Каспий», «Азамат» ансамбльлал, Социал щаллушиннарал центрданучIасса ветерантурал хорданул, оьрчIал эстрадалул «Моряна» школалул ва цаймигу коллективрдал.
Ва Центрданул директор Башикар Вагьабовал шадлугърайн бавтIминнахь бувсунни цалла гихуннай дуллансса давурттая, миллатрал культура, багьу-бизу, аьдатру ядаврил ва гихуннайгу дачин дуллалаврил цIаний дуллансса мероприятиярдая.
Центрдануя тIий, ванил ув­кунни:
— Жу хIарачат буварду ва Центрдануву цачIун батIин Аьра­сатнал миллатру, амма циняв шивун гьагу къагьанссар. ЧIяву миллатру бусса Аьрасатнал миллатирттал культурардал, багьу-бизулул, аьдатирттал цачIун буллалиссару жува, цIакь дуллалиссар миллатирттал дянивсса дусшиву.
Шиккува ца-кIива хха Башикар Вагьабовая циявагу. Бувну бур Башикар 1972 шинал майрал 26-нний ШавкIуллал шяраву ва шяравасса Гадаев ХIасаннул ва ГьунчIукьатIрал шярава­сса Гадаева Аслил кулпатраву. ГьунчIукьатIрал дянивмур дара­жалул школагу 1989 шинал къуртал бувну, Башикар бувххун бур ДГУ-рал филологиялул факультетрайн. Мугу 1994 шинал къуртал бувну, оьрус мазрал ва литературалул дарсирдал учительну зий бивкIун бур Кас­пийскаллал шагьрулул 3-мур школданий, мукунма КМШИ-лий (Кадетская морская школа-интернат). Ванил нину-ппу бур лакрал, дагъусттаннал культура ххираминнан хъинну ххуйну кIулсса инсантал: Гадаев ХIасан Исмяиловичлул марцIсса ххювардащал къуртал бувну бур Москавливсса Щукиннул цIанийсса театральный институт, цикссагу шиннардий зий ивкIун ур Апанни Къапиевлул цIанийсса Лак­рал театрдануву; Гадаева Асли ХIусайннул душ зий бивкIун бур ГьунчIукьатIрал магьирлугърал къатлул методистну, профсоюзрал председательну. Асли Гадаевал щаллу буллалисса ххаллилсса балайрду къабавссарив лакраву нажагьсса бакъа бакъахьунссар. Укунсса, творчествалул кулпатрава бувксса Башикардулгу цийнна тапшур дурсса даву лавайсса даражалий даншиврийн, ва Центр культуралул, халкьуннал аьдатру дуруччаврил ца яла хьхьичIунмур кюруну бикIаншиврийн щаквагу бакъар.
ТIайлабацIу баннав гьарца дуллалимуниву!