Ца-кIива зурул хьхьичIсса «Дагестанская правда» кказитрай бия тарихрал, археологиялул ва этнографиялул институтрал батIлай буссар тIий яруссаннал халкьуннал зукьлурду ва зайрду. Жулва лакрал ва чулухуннайсса даву ччянира, Х. Халилов, К. Къажлаева хьхьичIунну, цикссанналгу дурунни, дуллайнмагу бур. ВаницIун бавхIуну, ттунгу ччан бивкIунни цаппара бювхъу-къабювхъусса ххару чичин.

Ца чIумал жула шяравучунал ттухь бувсуна укунсса зат:
— Ца кьини шярава шагьрулийн увкIсса ттула ниттиу­ссищал шагьрулувух най ура. КIичIираву хьунаавкьунахь ягу тий-ший щябивкIсса, цачIу бавцIусса инсантурахьхьун, бакIгу кьус дитлай, ниттиуссу ур «ссалам» буллай, цанма кIулсса инсантурахьхьун кунма. Амма ганал ссалам ласайсса нажагьссавагу хъанай акъая, хIатта кув чIумал бавккунугума буругайва жул чулийнмай.
— Ниттиуссуй, инава кIий, Ккулув, усса ххай урав? Тайннавуния вин кIулсса цаягу инсан акъар, шикку оьрусгу буссар, жугьутIгу буссар, — куну учав.
— Му хьунни хавар, — тIий ур ниттиуссу. — КIулнугу, къакIулнугу хьунаавкьуманал чIарах ссихI къадурккун цукун лагайссар?
— Ва шагьрур, ниттиуссуй. Шяравалу дакъар. КIий циняв куннан кув кIулссар. Инава ссалам буллалиний цаппарасса хъяйгума чIалай бакъаяв?
— Хъяй уракьай тайннай на, тукун мяърипат дакъа ялапар хъанахъисса, -хъиннува къаччан бивкIсса куна хьуна ниттиуссу.
Цамургу. Москавлий гостиницалуву ура. ТтучIа номердануву ца цама адаминагу ур. КIилчинмур кьини дур цачIу. Га гьалмахчунал я ялун ухлайни ссалам-калам бакъар. Ттущал кIул хьунния чари, ссихI ду­кканссарагу кьаст къадунни. Я увккун наниний ссихI къадуккай. Ттуяра хъунассагу ур, къаччай ухьунссар оьрус «лухIиманащал» кIул хьун, гъалгъатIун куну, нагу итав. Ахиргу, ци савав хьунав къакIула, «Ина шиву лахъи лагантIиссарав?» — куну цIувххунни ттухь. Гания махъ ттухьхьунгу ихтилат сукку бан­сса сант диривунни. Га Ленинградраясса ия. Бусав нава часса уссаривгу. Ганалмур цIа-бакIгу цIуххав.
— Петр Алексеевич, — тIий ура ганахь, — багъишла итича, бусикьай, вай Москавливми вакссава цавунма цивппа лавгсса, яхши-хаш бан къаччисса циванни? Жул вайннаясса пикри цамур куццуйссаяхха бикIайсса?
Чансса пишгу куну, ганал кунни:
— Зул щалва Дагъусттаннай буссаксса халкь ца кьинилул му­тталий ва Москавливн бучIайссар, лагайссар. Вай, дакIру кьянкьа хьуну, биччибакъулшиву дуллалаврийн вардиш хьуссар, ва шагьрур, шяравалу дакъар. АцIукьай шяраваллавумур тагьаргу укунна даххана хьуннин, шяраваллурду шагьрурдал канай…
— На махIаттал хьуну ивкIра, ина ялун ухлахийни, ссалам къабулурча, ссихIрагу къадуклакисса цанни тIий. ЖучIа мукун къабикIайссар.
— КIул акъасса, цурив къа­кIулсса инсаннахь на ци тIун­тIиссияв? – къаччан бивкIсса куна хьунни га.
— ЖучIа мукун ялун увхма къакIулсса унугу, чара бакъа ссалам булун аьркинссар. Къабулайма мяърипат дакъаманан ккалли айссар. КIул акъасса унугу, инсаннал чIарах ссихI къадурккун, цучIав къалагайссар. КкурчIав, чIирах бавцIуминнал ялун инава ивукун, ссаламгу буллуну, «ккурчIа бувну бурув», учайссар. Гайнналгу, ссаламгу лавсун, «вингу ххуллухъин баннав, ххарину зана хьуннав» учайссар. Ппухълунная шихуннай нанисса аькьилсса аьдатри, — куну.
Мукун на ттула къатлул гьалмахчунахь дарс дирхьуссия.
Ча, жула зунттал инсаннал багьу-бизулуву, гьарца шаттираву тIийни кунна, ишла дуллан, дуручлан буржлувсса аьдатру личIину захIматсса дакъассар­хха. Амма цIанасса жагьилминнан ми личIину бусравну, сийлий дакъар. ТIайлассар, шярал кIанттурдай, нитти-буттахъах, оьрмулул бугьараминнах буруглай, нахIу-хIалану оьрму бутлан хIарачат буллан бикIай. Шагьрурдай, тIурча, цамур тагьар дур.
Ца чIумал шагьрулий дук­лакисса ца студент шяравусса ниттихь телефондалувух цIухлай ивкIун ур:
— Га жуна маччасса ХIасан дуснакьрайн авкьуну ур тIар, ганал гъанминнахь цукун, ци учин аьркинссар на? — тIий.
— Ци чинна, ниттил, къахъина, ххуйсса иш къавхьуну бурхха, хъуниминнан хъиндакIнийн багьну, ччяни мурахас хьуннав, ххишала дуснакь нясив къабаннав уча, — куну бур.
Ттул пикрилий, шикку жагьилсса студентнай аьй дакъар­хха. Ванихава лавхьхьусса ишир­ттаву учайсса махъру – зукьлурду, дуаьрду жунна, хъуниминнангума, кIулну къадикIайхха. Щил, чу, та лахьхьин буллай бур ми?
Ца чIумал, нава Ваччиял школданий лакку маз ва да­гъусттаннал литература дихьлай уну, дакIнихсса творчество лахьлай буна, оьрчIахь цIухлай ура: хъу гъайтIийни, хъу дугьлагьийни, ттихIлахIийни, ччар дуллалийни, гьарахъа-чараха наними хьунабавкьуни, хъатIи бан хIадур хъанахъийни, кутIану учин, гьарца багьу-бизулуву хьунабакьайсса иширттаву ялун увкнал ци учайссар, лувминнал цукунсса жаваб дулайссар тIий. АцIуннава цаннанвагу кIулну бакъа, хъяй бур.
Яла гьарцаннайн тапшур бав, нитти-буттахъахь, бугьараминнахь цIувххуну, бюхъайссаксса гьарзану батIияра зукьлурду, чIа учавуртту, саннарду, дуаьрду, миннущалва, цуксса къаччарчагу, зайрдугу, цIуххара куну. Цанмагу хIаз бивзхьунссия, лап чIявусса бавтIун бувкIуна. Хъярчиран кунма, цивппагу яла махъ ми ишла буллай, тикрал буллай бикIайва.
ХIасил, ххуйсса мукъул, зукь­лулул, дуаьлул инсаннал дакI рахIат дуллалиссар. Жунмарив ми махъру (зукьлурду) тIайлану, багьайний ишла буллан къакIулли. Оьрмулуву тIурча хьунакъабакьайсса, хьукъашай­сса иш бакъар. Хъирив лавну кIул барча, гьарца иширан цанма-цанма лайкьсса махъру – зукьлурду, чIачавуртту, дуаьрду дур масала, цIуну оьрчI увний, га кIанттуву цалчин ахIайни, аьрххилий ххуллийн увкний, зана хьуний, гьарахъа наниний, ккурчIал чIарах наниний, цIусса янна лархнахь, хъу дугьлагьинахь, ччар дуллалиминнахь, хъатIи буллалиминнахь, хъамаличунахь учайсса, миннал жаваб дулайсса м.ц. Цаппара укунсса ишру бур аьдатрайн багьну буллалиссагу. Микку учайсса махъругу – ми иширттаха лавхьхьусса: цIусса шин дайдихьу, интнилхьхьу, хъурдуккаву, хIаллил лакьаву. Мукун чIиви-чIиви тIий батIлай, ттучIа цачIун хьуну личIи-личIисса иширттай учайсса махъру, калимартту, ми циняв чичларча, щаллусса жуж хьунссар. На анжагъ кIицI банна Ккуллал шяраваллил ва цайминналгу ишла байминнавасса цаппара.

НувцIи бивхьуминнал ялун бивукун:
«Аьму-чIамурду, кабакьиннав, цIуллу-ххарину буканнав!».
Хъу гъайтIиминнахь:
«Кабакьиннав, дюхъан Аллагьнал даннав, дюрхъусса бакI­лахъия хьуннав!».
Гьарахъа наниминнахь:
«Баврув, хъинбивтрув! ХъатIун-хъиншиврул харж бан нясив хьуннав!».
ХъатIи буллалиминнахь:
«Барча хъатIи! Тирххандарайн букканнав, талихI булуннав! ХъатIун-хъиншиврун бакъа ва къатлуву ччатI къабишиннав!».
Пяп-чарил дуллай, къатта-къуш буллалиминнахь:
«ТIайлабацIу! Ххарину оьр­му бутлансса хьуннав. Къа­тта оьрчIал буцIиннав, бухкIулу марцIну къаличIаваннав! Къатлухун барачат къюеннав!».
Жалин тIайла дуккайни:
«Насу, ххуллухъин баннав! Буттал къатлийн ттиликIсса, ласкъатлийн лажинсса хьуннав, вин лавгний кIану бакьиннав! Жалиндалул кIараллий кIинилул кюру баннав, наврузбагнал бакIччаннай барча-давран бацIаннав !».

Цалчин бувсса оьрчI кIан­ттуву бахIайни, щинавун бучIан бувайни дувайсса аьдат­ру, бай­сса зукьлурду гьарзар. Масала, дуккайссар ва дуаь:
Ва чIивитIул барачат
Щалла щарнийн бияннав.
Ххари-хъиншиврун бакъа
Ини-щин къалияннав,
ЧIивитIуя нарт хьуну,
ХъатIи буллай ккакканнав!

***
Ташулул оьрчI ках уллай,
Ччяни хъунасса хьуннав,
Ва оьрчIал кIану кунма,
Ватан ххирасса шивуй.

Нитти-буттал дяниву
Хъуна хьун нясив шивуй,
Укунсса бусравшиврий
Оьрмулуву личIивуй.

***
Я оьнал яру лещаннав,
Маз бунал маз бякъиннав,
Оьсса чувнал я къалачIуннав,
Оьсса мазрал лавмартная уруччиннав.

Ниттил мурадиран увсса,
Буттал давлатран увсса,
Хъунасса хьуннав.

Ина вила буттан цIакьсса арс хьуннав!
Зула тухундалун пахруну хьуннав!
Оьсса кьини дуркний лахъан бюхъансса,
Виричугу хьуннав щалва жяматран!

Буттал-ниттилгу дувайссар укунсса дуаь:
«Яллагь, ттул арс, ина арула уссил уссу хьуннав, вил багьну, чил къабацIаннав, вий давла бацIаннав, вил барачат гьарцаннайнгу бияннав. Бавал буттукьа букансса душ къатлуву къахьуннав. Буттал ярагъ баххансса арс къахьуннав. Чув мяш хъанансса адамина хьуннав!».

Утти, кIицI банвагума къа­тIааьнсса бунугу, оьрмулувугу хьунабакьлай, дакIнихсса творчествалувугу цин лав­хьхьусса кIану бугьлай бухьувкун, ца-кIива махъ халкьуннал зайрдаягу учинна.
Ца чIумал ца шяраву совет­рал председатель дяъвай увкIун ур маз оьшиврул цIа дурксса ца щарссанийнча, ганил укунсса жуав дурну дур:
— Я ина инара кIяла ларххун, гъанминнал лухIи лаххивуй, укьу ттул хьхьичIа», — куну.
Гагу лавгун шавай, щарссанихь буслай ивкIун ур:
— Валлагь, Загьи оьссар тIий, гания хъинсса диркIун дур. На цийна дяъвай унагума, ттуха зукьлу бунни, — тIий, ганил увкумур бувсун бур.
— Да, дахмах, му «зукьлулул» мяъна кIуллив вин? Му инава ивкIуну, кIяла суру бивхьуну, махъминнал дягъу дургьуну, лухIи лаххи тIиссар, — куну бур щарссанил.
— Агь, шатлул маз, на данна га кIяла лахлахи — куну, махъунай лавгссия тIар.
Бур зайрду шаммардай-балай­рдайссагу.

На ка тIитIирча, лахъ шай
Лахъ мурхьирай ятIул гьивч.
Яллагь, аьяннав хьхьемал,
Улхъа уринийн багьну.

Хъаралу щар дирчIивуй,
Лякьлуя оьрчI кьакьивуй,
ХъункIултIутIул вилаххав
ЛухIи хъатIу бацIивуй.

БакIрал ххуйсса дучIаннав,
Ажал къинттуллух бусса,
Хъус чIярусса дучIаннав,
Муххал чIатлу канихьсса.

Вил чIярусса хъус хьуннав,
Хайрданийн къадукканнав.
Хъунисса къатри хьуннав,
Душмантурал зеххиннав.

Вил бидавсса чу хьуннав,
Тавлалий чапур хьуннав,
Чаннаннил ярагъ хьуннав,
Мюрай сситтул буканнав.

Чичлачимур кутIа буллай, учивияв жула халкьуннал дакIнихсса творчествалул ца бутIа хIисаврайгу, оьрмулул багьу-бизулувусса аьркиншин хIисаврайгу, чIа учавуртту, кIулминнал къакIулминнахь буслай дикIан аьркинсса дур.
Гьарун ХIасанов