Август зурул 17-нний ЦIуссалакрал райондалул прокурор Светозар Оьмаровлул аьрххи хьунни Гьамиящиял шяравун.
Шяраваллил администрациялул къатраву прокурорнал кIирахъул ссятрал мутталий кьамул бунни агьали.
Му давривух гьуртту хьунни Гьамиящиял шяраваллил бакIчи ХIабибуллагь Рашидовгу.
Прокурорнал ва кьини кьамул унни 6 инсан. Агьалинал гьаз бувсса масъалартту бия социал ихтиярдал, бизан баврил, аьрщарал ихтиярду цIакь даврил, щинал, газрал, ттукIрал ва цаймигу хIакъиравусса.
Светозар Оьмаровлул цачIанма бувкIсса агьалинал масъаларттал хIакъираву бунни маслихIатру, бувчIин бунни закондалийн бувну къуццу тIунсса куц. Му бакъассагу, ванал балжийсса жавабру дуллунни агьалинал гьаз бувсса суаллахьхьун. Цаппара масъалартту, цува ялув авцIуну щаллу баншиврул, лавсунни цала аякьалийн.
