![](https://ilchi.info/wp-content/uploads/2021/08/gulizar.jpg)
ДухIан захIматсса кьурчIишиву дирунни магьирлугърал ккурандалул ва щала Дагъусттаннал ялун. Мяйц1аллий шанна шинал оьрмулуву лавгунни жуятува Дагъусттаннал язисса душ, Аьрасатнал магьирлугърал бусравсса ишккакку, искусствоведениялул элмурдал кандидат, ДР-лул паччахIлугърал премиярттал лауреат, Дусшиврул ордендалул кавалер, дак1 марц1сса ва чаннасса Гулизар Султанова. Цил цIа машгьурну дуссия так, ца жула республикалул творчествалул аралуву дакъасса, республикалул дазул кьатIувгу. 1965 шинал Гулизар Султановал хьхьич1унну къуртал бувссар Ленинградуллал паччах1лугърал Театрданул, музыкалул ва кинематографиялул институтрал театроведениялул факультет.
ХхюцIалунниха лирчусса шиннардил дянив лавайсса даражалий зий бивкIссар цув Дагъусттаннал художествалул культуралул буруккинттаха: миллатирттал театрду хьхьичIунмай шаврил ва ттизаманнул драматургиялул тагьар ахттар дуллалисса аьлимчу хIисаврайгу, театровед ва театрал критик хIисаврайгу, творчествалул проектирдал ва программарттал автор ва сакиншинначи хIисаврайгу. Багьа бакъасса элмийсса ахттаршиннарду дурссар Гулизар Султановал Дагьусттаннал цинявппагу театрду ликкурай бацIаврил ва хьхьичIунмай шаврил цалчинсса шаттирдая байбивхьуну, хIакьинусса кьининийн бяннинсса тарих хIасул буллай.
Хаснура агьамшиву хъуннасса захIмат бивхьуссар Гулизар Султановал машгьурсса дагъусттаннал артистурал, режиссертурал, театрал художниктурал цIарду, миннал захIмат магьирлугърал ирс тарихраву ялун нанисса никиран ябаврил цIаний. Ванил хIасул бувсса театрал ирсирал махъ бакъа лайкьсса кIану бувгьуссар Аьрасатнал аьмсса магьирлугърал ххазналуву.
Ссайн ка лаярчагу, гьарца ишираву ялун личайва Гулизар АхIмадовнал гьунар ва кьаст дусса личность. Цил бусса оьрмулул мяънану хьуссар марцIсса пикри, ларайсса мяърипат ва ва къирият. Замана чунмай баххана хьурчагу, Гулизар АхIмадовна тачIав хаин къавхьуссар цила хIуччалийн, яхIлийн ва къириятрайн.
Гулизар АхIмадовна лавгунни цила ласнал Киров Абакарович Султановлул хъирив, коронавирусрал цIуцIаврища ххассал хьун къабювхъуну.
Вайннал цаннал цаннахсса, мачча-гъаннахсса, миллатрахсса, ватандалухсса ччаву дия гьарцаннан эбратрансса. Гулизар АхIмадовнал чаннасса аьпа абадлий личIантIиссар жул дакIурдиву.
ДакIнийхтуну хъуннасса кьурчIишиву кIидачIлай, жижара буллай буру Киров ва Гулизар Султановхъал арснахь Абакардухь, душнихь Светланахь, оьрчIал оьрчIахь, мачча-гъанцириннахь, щала Дагъусттаннал илданухь.
Цал рухIру хъинний дишиннав! Махъминнал оьрмурдай барачат б шиннав!
Лакрал театрданул коллектив