Гъуниннал райондалий тарихийсса киносуратрал съёмкарду най дур вай гьантрай. Кинофильмран цIагу «Аманат» дур. Ларгсса нюжмардий Миллатирттал иширтталсса буллалисса федерал агентствалул хъунама Игорь Бариновгу ивунни съёмкарду дуллалисса кIанттурдайн республикалул Миннацрал каялувчи Энрик Муслимовлущал. Киносурат имам Шамиллул хъунама арс Жамалуттиннул оьрмулия бусласисса дур.
![](https://ilchi.info/wp-content/uploads/2021/07/image-20-07-21-10-26-1.jpg)
Шамил Жяъпаров
ЧIавасса оьрмулий Санкт-Петербурглив ширишилун гьан увну ивкIсса оьрчIах Николай 1 паччахIналгума къулагъас дурну дур цила чIумал. Дворяннал кIулшивурттугу, тарбиягу ларсъсса Жамалуттиннун Аьрасатгу ххира хъанай бур, генералнал душ Елизавета Оленинахгу эшкьи хъанай дур. Имам Шамилма Николай паччахIнайн къаршину талай ивкIун ур, арсгу шавай уцинсса хIарачат буллай. Вана укун дакIру гьалаксса асардал гьузиххин дуллалисса драмалул сюжет бур киносуратрал.
![](https://ilchi.info/wp-content/uploads/2021/07/image-20-07-21-10-26-2.jpg)
Рамазанов АьбдурахIим имам Шамиллул арснал Жамалуттиннул роль дургьусса Амин Хуратовлущал
[dropcap]Ч[/dropcap]ара бакъа кIицI лаган аьркинни ва киносуратрал генеральный продюсер ва сценарийлул авторну ушиву мархри ЧIурттащиял шяраватусса Шамил Жяъпаров. Ва Жяъпаровхъал цIанихсса тухумрал лайкьсса варис ур. Учин мукъун, Дагъусттаннал цалчинма лётчик-хъамитайпа Бавер Жяъпаровал уссил арс ур. Ва цувагу хъинну итххявхсса, бюхъу-бажар бусса, Аьрасатнаву сийлийсса шанма вуз къуртал бувсса инсан ур, Москавуллал ккавкказуллал клубрал каялувчинугу ур, Дубайливсса предпринимательтурал Аьрасатнал советрал членгу ур.
Жувагу чIа учинну ва хъуннасса даврил хъар цайнна ларсъсса лаккучунан тIайлабацIу!
[dropcap]Ш[/dropcap]иккува кIицI лаганна съёмкардаву жул, 1-мур ЦIувкIуллал, шяраватусса, МахIачкъалаллал 7-мур гимназиялий 10 класс къуртал бувсса Рамазанов АьбдурахIимгу гьуртту хъанай ушиву. Ванан съёмкардаву гьуртту хьун оьвтIисса баян баву бакIрайн дагьну, лавгун ур Гъунив. Оьруснал хIаписарнал роль дугьи тIий бивкIун бур, вананнив зунтталчу Меридлул роль дугьан ччан бивкIун бур. «КIай съёмкардаву гьуртту шаву оьрмулухун дакIний личIанссар, кинорал дунияллийн агьну чIявусса затру лавхьхьунни», – тIий ур АьбдурахIим. Балжину бусанну ва киносуратрая, сценарий чивчусса авторнащал хьунабакьинсса хIалу дагьарча.