Гьашину Гъумучиял дянивмур даражалул школа къуртал бунни 23 оьрчIал, миннавагу 6-ннал – мусил медальданийну. Ва кIулшиву дулавриву ччя-ччяни тикрал шайсса иш бакъар – ца классрава, хIатта ца школалиягума, ца шинал 6 медалист уккаву. Ва Гъумучиял школалулгу, Лакрал райондалулгу, лакрал щалва миллатралгу пахру бувансса, дакI ххари хьунсса кIану бур. Вайнна миннал цIарду: Буттаева Соня Шарапуттиннул душ, Кьурбанова Маликат Жяъпардул душ, АхIмадова Рукьижат Кьурбан-МахIаммадлул душ, Аьлишаева ПатIимат Муртазялил душ, Апанниев МахIмуд Юсуплул арс, Абакаров Абакар Оьмардул арс.
Ттул ттуллагу ца ххаришиву ххисса дур – вай ряхагу медалистнавасса шама ттущала архIал школалий дуклай бивкIсса оьрчI-душваврал оьрчIру бушиврия.
Вай шиннардий оьрчIру кIулшивурттал ва элмулул ххуллийх нани бувну, цалва гужгу, чIунгу оьрчIан харж дуллай бивкIсса учительтурахь барчаллагьрай бур оьрчIал нину-ппу.
– Ва классраву ттулва душ дуклай буну тIий къатIиссара, гиччава най бунува ххуйсса класс бия, байбихьулул школалий Абакарова Жамиля МахIаммадовнахь бивкIсса.
Ванил цила чIумал вайннаву кIулшивурттал цIакьсса гьану бивзссар. На нава, нину хIисаврайгу, педагог хIисаврайгу, ванил хъинну чIярусса дарсирдай хьуссара, гъирарай лагайссияв, щябикIайссияв миннуй. Ванил тIайла бувсса ххуллия тий-шийнмай къавхьуну най бия ва классгу. Шайссар-къашайссар, дулайссар-къадулайссар медаллу тIисса, чIумуцIун дархIусса къача-къучшивурттугу махъ лирчIун, ларсунни вай ряхагу оьрчIал медаллу.
![](https://ilchi.info/wp-content/uploads/2021/07/edd28f8d-4bde-436a-ae2e-010.jpg)
Ттулва чулухагу, махъсса Гъумучиял дянивмур даражалул школалул оьрчIал нитти-буттал чулухагу хъунмасса барчаллагь тIий бура, оьрчIру кIюрххи-кьуннил консультациярттайн буцлай, шаймур буллай, оьрчIал кIулшивурттайн, каширдайн вихну бивкIсса, вай оьрчIал чIарату 5-мур классрая шийнмай букъавкьсса Кьурбанова Зугьра Рамазановнахь, завуч ХIасанова Асият Абумуслимовнахь, классрал каялувчи ХIамзатова Эльвира Илдаровнахь, школалул каялувшиндарахь, учительтурал щалвагу коллективрахь.
Хъунмасса барчаллагь чин ччай бура райондалул бакIчи Юсуп ХIамидовичлухьгу, ва давриву кабакьу бувсса. Барчаллагь тIий бура мукунма УО-рал каялувчину цIуну зузисса Тамерлан МахIаммадовлуйнгу, оьрчIал дакI дуванмур бувну, чIарав авцIусса, – тIий бур райондалул УО-рал методист Каминат Буттаева.
Шиккува кIицI лаган, райондалул кIулшиву дулаврил тарихраву цалчин ва выпускрал оьрчIал обществознаниялул ЕГЭ-лий хъинну ххуйсса хIасиллу ккаккан дунни, мукунна цайми-цайми ЕГР-рду дуллунни хъинну ххуйсса хIасиллай, чIалачIи бувунни цивппа медаллангу, цайми наградарттангу лайкьсса бушиву, учительтуралгу, нитти-бутталгу, райондалул каялувшиндаралгу цайнна вихшала багьавай дирхьушиву.
Ва лайкьсса ххувшавугу, ккаккиярттугу барча дуллай, чIа тIий буру Лакрал райондалул, лакрал миллатрал цIа-кьини лайкьну ккаккан дурсса оьрчIан гихунмайгу гьарца дуллалимуниву тIайлабацIу!