ТачIав оьрмулуву зана дитан къашайсса шанна зат дур: чIун, увкусса махъ, бюхъу-каши. Мунияту аьркинну бур оьрмулуву чIун оьнна гьан къаритан, учайсса мукъул ялув ацIан, бюхъу-каши мюнпатну ишла дан. Вай аькьилсса калимартту мудан тикрал дуллан ххирар Адамов АьвдурахIман МахIаммадлул арснан. Вана вай калимартту асар хьуну, мудангу гьарица нара дуллалимунил ялув пикри буллан икIара.
Мяйжаннугу, жулва оьрмулул барашиннанугу хъанай дур чIун. АьвдурахIман МахIаммадовичлул оьрмулувурив цурда ца кьини хьуну дакъар зукъазий оьнна ларгсса. Оьрмулул 18 шинавусса жагьил бетонщикну зун увххун ур Дагъусттаннал Строительствалул управлениялул Муххал конструкциярду дайсса заводрайн. Та заманнайсса циняв жагьилтурал кунма, АьвдурахIманнулгу Совет Аьралуннаву къуллугъ бувну бур. Германнаву аьралуннаву къуллугъгу бувну, зана хьуну Дагъусттаннал пединститутрал физикалул ва математикалул факультетрайн дуклан увххун ур. Му къуртал бувну, дуклан увххун ур Дагъусттаннал паччахIлугърал технический институтрал строительный факультетрайн. КIива кIива лавайсса даражалул ВУЗ-ирдаву ларсъсса кIулшивурттайнугу гьашиву къадурну, АьвдурахIман МахIаммадовичлул дурурччуну дур «Стратегия управления социально-экономическим потенциалом муниципального образования» тIисса диссертация. Дагъусттаннал политехнический институтрал Аьлимтурал элмийсса советрай хьхьичIунну диссертациягу дурурччуну, экономикалул элмурдал кандидат хьуну ур.
«Дува хIакьину цайминнаща дан къабюхъаймур» тIисса махъругу ххирар ванан ччя-ччяни тикрал буллан. Цалла давриву ва оьрмулувугу му кьяйда бувгьуну зийгу ур. АьвдурахIман МахIаммадовичлул жагьилнийсса шиннугу комсомолданул ва коммунист партиялул давурттацIун дархIусса дур. Оьрмулул дахьра 26 шин хьусса чIумала ва каялувшиву дуллай ивкIссар республикалул 13 азарунния ливчусса сияхI дусса жагьилтурал кьюкьлуй. Ва цалва студентътурал кьюкьлущал икъавсса Дагъусттаннал цуппа ца мурцIу бакъахьунссар. Миннащал зий ивкIссар стройкардай, совхозирттай, колхозирттай, консервардал предприятиярдай ва мукунма чIявусса цаймигу кIанттурдай. 1970-1980-шиннардий ванал каялувшиндаралусса Дагъусттаннал студентътурал кьюкьри дирссар Архангеллал, Тюменнал, Амурдал, Белгорадрал областирдайн, Узбакисттаннайн, Сочилийн, Костромалийн, Къиргъизнавун. Та чIумалсса жагьилтурал агьаммур хасият дия цайнна тапшур дурсса даву дакIнийхтуну, жаваблувну бартдигьлагьаву. АьвдурахIман МахIаммадович каялувшиву дуллалисса студентътурал отряд 1983 шинал яла хьхьичIунмунин ккалли дурну, вайннан буллуссар СССР-данул Министртурал советрал ЦК КПСС-рал занази ЯтIул Ттугъ. Тай шиннардий ми отрядирттаву зий бивкIсса хьхьичIунсса тамансса студентътал лайкь хьуссар СССР-данул орденнан ва медаллан. АьвдурахIман Адамович цувагу студентъсса чIумал, хьхьичIунсса дуккаврихлу ва жагьилтурал оьрмулуву дуллалисса чялишсса давурттахлу, ДАССР-данул Верховный Советрал Президиумрал чулухасса ХIурматрал грамоталун лайкь хьуну ур. Муния махъгу ва лайкь хьуну ур ДАССР-данул Верховный Советрал Президиумрал, ДР-лул ПаччахIлугърал Советрал, Дагъусттан Республикалул Президентнал ХIурматрал грамотардан. ХIакьинусса кьинигу яла цанна ххирами наградарттавух ядуллай ур ВЛКСМ-рал чулухасса цинярдагу наградартту, миннувух дур «За трудовую доблесть» тIисса медальгу. Яла хъунмур наградалунгу ванал ккалли бувай хIакьинусса кьинигу дусшиву яхьусса, тай шиннардий цащалва дуклай, зий бивкIсса, цIана хьхьичIунсса къуллугъирттай зузисса личIи-личIисса миллатирттал вакилтал.
«Ва куна уздансса, дуллалисса даврил хIал кIулсса, цала биялдаралуминнащал дакI тIайласса, хасиятрал авкьусса каялувчи ттун цама хьунакъаавкьуссар. ХIакьинусса кьинигу ва жул яла хIурмат бума дусгу, насихIатчигур», — тIий ур хьхьичIвасса комсомолданул зузала, МВД-лул полковник Р. РахIимов.
«Нава оьрмулуву лавхъсса шачIану, ттулла хьхьичIуннайшивуртту АьвдурахIман МахIаммадовичлул ка-кумаграцIух, ванал насихIатирттайнур хьусса. ХIакьинугу ванал хIурмат ттучIа хъунмассар, ва ттул яла хьхьичIунма дусгу, насихIатчигур», — тIий ур ишбажаранчи Теруч Аьбдуллаев.
АьвдурахIман МахIаммадовичлул бувгьуну ивкIсса къуллугъру чансса бакъар: Кировский РК КПСС, МахIачкъалаллал КПСС-рал горком. Тамансса шинну дурну дур КПСС-рал областьной комитетрал аппаратраву строительствалул отделданул инструкторну, партиялул ва кадровый даврил отделданул жаваблувсса сакиншинначину, Лакрал Райком партиялул цалчинма секретарьну, Лакрал райондалул Халкьуннал депутатътурал советрал председательну. Ва райондалийгу ванан каялувшиву дуллан багьну бур яла захIматми, билаятрай яла ччанарккуми 80-90-ку шиннардий. Ми шиннардийгума Лакрал райондалул шяраваллил хозяйствалул бакIлахъия ххишалану дучIан дайсса диркIун дур Къурахиял, Ахвахуллал, Агъуллал районнал цачIунияр. Райондалий зий бивкIун бур уссал ва янна дуруххай фабрикартту, ювелирный цех, диркIун дур цалла строительный организация (МСО), 20 колхозраву ва 2 совхозраву бивкIун бур 113 азарунния ливчусса яттил хIайвант, 5 азаруннийн бивсса лухIи ризкьи, зий диркIун дур «Райсельхозхимия» тIисса управление, мукунна Сулакьрай диркIун дур ччимур журалул сельхозтехника дакьин дувайсса предприятие. Тай шиннардий республикалий ххуйсса бакIлахъия дулайсса Лакрал райондалул хозяйстварду — хьхьичIунсса колхозру ва совхозру машгьурну диркIун дур. ХIакьинугу АьвдурахIман МахIаммадович хIурматрай дакIнийн дичлай ур Райком партиялул кIилчинма секретарь М. С. Ссунгъуровлул (цIана Лакрал ЦСЗН-лул хъунама), Райисполкомрал председательнал хъиривчу А. М. Къюннуевлул (хIакьину «Лакрал район» МО-лул администрациялул хъунама), Гъумуксса Ювелирный цехрал каялувчи Н. Куяевлул, С. ХIабиевлул цIанийсса колхозрал председатель О. МахIаммадовлул, К. Маркслул цIанийсса колхозрал председатель А. Аьлиевлул, «Искра» колхозрал председатель Ш. Аьвдуразакьовлул, Орджоникидзел цIанийсса колхозрал председатель М. Малладовлул ва цайминналгу цIарду.
АьвдурахIман Адамовлуйн мукунма тапшур бувну бивкIссар «Росвнешторг» Щалагу Аьрасатнал объединениялул Дагъусттаннайсса вакилханалий каялувшиву дан. Таний жула хIукуматрай так ва ца организацияр диркIсса чил билаятрая кьай-кьуй дучIан давриха ва жулла энергоресурсру дазул кьатIув тIайла дуккавриха зузисса. Ва идаралул даврил ххуйсса ккаккиярттая таний цимилагу кIицI лавгун бур цалва докладраву Дагъусттаннал ХIукуматрал председатель А.М. Мирзабековлул.
Жаваблувсса къуллугъирттай зий савсъсса, каялувчинал опыт бусса АьвдурахIман МахIаммадовичлуйн 2000 шинал тапшур бувну бур МахIачкъалаливсса агьали давурттал дузал баврил центрданий каялувшиву дан. Шикку зузиссаксса хIаллайгу ванал цалва бажарданийну, дух хьусса, дияйнийн дирсса центрданул къатри цIудуккан даву дакъассагу, ххуйсса ккаккияртту чIалачIи дурну дур центрданул сияхIрайн лавсъсса, давуртту дакъа ливчIсса агьали дуккингу бувну, давурттал дузал бавривугу.
2007 шинал ванайн оьвкуну бур Пенсияртту булайсса центрданийн (ОПФР по РД) хъунаманал заместительну.
Укун буслай ур ДР-лул ОПФР-данул хъунаманал хъиривчу Нуруллагь Сулайманов: «АьвдурахIман МахIаммадович увкIуна зун Пенсионный фондрайн каялувчинал биялсса опытращал. 188 инсан усса хъунмасса коллективравух най унува хIала увххуна. ЧIирисса чIумул дянив ванаща бювхъуна центрданул бигьа дакъасса давугу лархьхьуну, мугу кIанийн дуртун, коллективрангу бусравну зун. Ванащал зун бигьанугу, тIааьннугу бикIайва. Цала дакIнил аьчухшиврул ваначIан цинявппа зузалт кIункIу тIун бикIайва. Пенсионертурал иширттацIун бавхIусса яла захIматми масъалартту ванайн тапшур байва. Жун кIулссия мунахун багьсса цуппа ца масъала щаллу къавхьуну къаличIантIишиву. Най дур чIун, гъан хъанай дур АьвдурахIман МахIаммадовичлул юбилей.
Жу, ванащал зий бивкIсса, ванал хIурмат бусса, Пенсионный фондрал зузалт, дакIнийхтуну барчагу уллай, чIа тIий буру АьвдурахIман МахIаммадовичлун цIуллушиву, мукуна кашигу, гуж, кьудратгу дунува личIаннав».
Махъсса шиннардий ва зий ур Дагъусттан Республикалул ВацIлул хозяйствалул комитетрай пресс-службалул хъунаману. Жагьилсса оьрмулуву акъанугу, шиккугу цалла даву гъирарай, шавкьирай дуллалисса куццул циняв хIайран бай. Ва къуллугърайгу ванаща ккаккан бан бювхъунни цува даврил сант кIулсса, лавайсса даражалул пишакар ушиву. АьвдурахIман МахIаммадовичлул канилух цимигу пиша бувккун бур, ми кIулшивурттугу ванал цалва бувгьусса цумурцагу къуллугърай мюнпатну ишла дай. Ва цувагу хасиятрал авкьусса, цимурцаннуя хавар бусса ва уххаву къакIулсса зузала ур. ЦIанасса цалва къуллугъгу ванал лавайсса даражалий бачин бувну ур. Ххуйсса пресс-секретарь му – бюхъу ххисса PR-менеджергу хъанахъиссар. Ванаятур хъар хъанахъисса цалва идаралул ва каялувчинал сий гьаз давугу. АьвдурахIман МахIаммадович ур цила икIайкунсса мукъул усттар. Гьарца кьини ванан журналистурал суаллахьхьун жавабру дуллан, сайтрайнсса информациярду чичлан багьайссар. Му даву куртIсса кIулшивуртту, интеллект дусса, мукъуйгу цIу бусса инсаннаща дакъа дан къахьунтIиссар.
Укунсса, мудан инсантуращал хьунаакьлакьисса, къуллугърай унугу, ва хIарачат буллан икIай итталун къаагьанну, чIяву къахьунну цалла даву дан. Мунийнугу цува зузисса идаралул сий гьаз дувай.
— На, комитетрал каялувчи хIисаврай, мудангу икIара ттулва зузалтрахь АьвдурахIман МахIаммадович хIукуматрал къуллугъирттай зий савсъсса инсаннича, ванацIа зун лахьхьияра тIий. ВацIлул аралул зузалтран ванащал зун бигьану ва тIааьнну бур. Мунияту ва увчIунни вацIлул арардал зузалтрал профсоюзрал рескомрал председательнугу. ЧIа тIий ура ванан цIуллушивугу, давриву хьхьичIуннайшивурттугу,- тIий ур Аьлибаг ХIажиев.
АьвдурахIман МахIаммадович зун увкIния шихунмай ва комитетрал прессалущалсса дахIаву чIаланну ххуй хьунни. Ванал хIарачатрайну хьхьичIва-хьхьичI итабакьлан бивкIунни «Лесные вести» тIисса ва идаралул цилва кказит. Комитетрал дуллалисса циняв давурттавух чялишну гьурттугу хьуну, чIярумур чIумал миннухлусса жаваблувшиннагу цала бакIрайн ласай.
Август зуруй хьусса профсоюзрал конференциялий АьвдурахIман МахIаммадович, хьхьичIунсса ва опыт бусса зузала хIисаврай, увчIунни ВацIлул арардал зузалтрал профсоюзрал рескомрал председательну. Умуд бур ва къуллугъгу ванал лайкьну бачин банссар тIисса.
АьвдурахIман Адамовлун хIат-хIисав дакъа ххирар цала Ватан Дагъусттан, ляличIинува ххирар цалва миллат. Ва усса кIанай хъярчирайвагу ванан хас къабизансса зат лакрайн учин къабучIиссар. Ванал бувчIин ччинан бувчIинну бусантIиссар лакрал миллатрал узданшиврия, хьхьичIуншиврия, ххаллилшиврия. Му иширавугу мунащал бяст бансса, мунал тIутIимунищал къаакьинсса къауккантIиссар. Шикку кIицI къабувну къабучIир, ва цала буттал шяраву Хъусрахь дуллалисса чIярусса хъин-хъинсса давурттал сиптачигу, сакиншинначигу хъанахъишиву. Ванал кабавкьуссар цала буттал шяравун щин дуцлацинигу, ххуллурду буллалинигу, школалун кумаг аьркиннийгу. Хъусращиял шяравасса, аьпа баннав цал, Камалуттин Кубачановлул ва «Илчи» кказитрал хъунмур редактор Качар ХIусайнаевал пикригу хъин чулий ккавккун, АьвдурахIман МахIаммадовичлулгу ка-кумаг бувуна шяраву Надир-шагь ххит увсса иширттан хас дурсса гьайкал дацIан дурссар. Хъусращиял шяраваллил кьини кIицI лаглагинигу, хъатIай-хъиншивурттай ва бивкIу-буккурдайгу АьвдурахIман хьхьичIа-хьхьичI уссар. Цала шяраву акъассагу, АьвдурахIман МахIаммадович бусравну ур щалагу Ккуллал райондалийгу. Мунин барашинна дуллай бур ванан «Почетный гражданин Кулинского района» тIисса бусравсса цIа дулаврилгу.
Ихтилат багьний АьвдурахIманнул учай: «Къуллугърал, орден-медаллал цIаний тачIав щилчIав лавай къаавцIуссара, ттула хъуниминнайнгу мудан дакI тIайлану зий ивкIссара, мукунма тарбия буллай ура ттулва арсругу. Адаминал гьарицагу ишираву цалва позиция бикIан аьркинссар», — куну.
АьвдурахIман МахIаммадовичлул бур бавкьусса, ххаллилсса кулпат, 3 арс, 4 арснал оьрчI. Ва кулпатраву бувагу бусса ца хъамитайпа, АьвдурахIманнул кулпат Лизал хIурматгу вайнначIа ляличIиссава бур. Бухху-букку тачIав чан къашайсса ва кулпатраву Лизал аякьа ва дакIнил гъилишиву дияй цинявннайннагу.
АьвдурахIманнун ххирар ччя-ччяни тикрал буллан: «Оьрмулул мяъна-мурад ва дунияллий бувтсса гьантраву бакъарча, му чIумул мутталий дурсса, халкьуннан мюнпатсса давурттавур бусса, хъинну захIматссар, цалла цIагу, яхI-къириятгу дурурччуну, узданну оьрму бутан», — куну. Вана укунсса тарап дургьуну зий, занай, яхIирай оьрму бутлай ур АьвдурахIман МахIаммадович.
Вай гьантрай АьвдурахIман МахIаммадович кIицI лаглай ур оьрмулул юбилей. Юбилейращал барчагу уллай, чIа тIий буру АьвдурахIман МахIаммадовичлун цIуллушиву, давриву тIайлабацIу, кулпатраву нахIу-хIалимшиву. ЛичIаннав ина вилва кулпатраягу, наслулиягу щалихханнин.
В. Б. Ферзуллаев,
ДР-лул ВацIлул хозяйствалул комитетрал председательнал хъиривчу
ХIадур бувссар Имара Саидовал
